رواية اهدتني معاقا (لكنه القدر) الفصل الرابع عشر 14 بقلم اسماء عبدالهادي
رعد وهو يضرب الحائط بيده _الكلاب فلتوا من ايدي
حاول حازم الوقوف_انا عايز اطمن على يامن ارجوك يا عمى
استجاب رعد لطلبه فلقد رأى فى عينيه لهفته على صديقه فاسنده على كتفه وذهبوا مرة اخرى بجوار غرفه العمليات بانتظار خروج يامن
رعد_مازن ،يامن اخباره ايه
حازم بخوف شديد_عمى ارجوك ،قولى ان يامن بخير
(للتذكير،رعد زوج نور ،لؤى زوج همسه،مازن زوج ريم ,,حازم بن زياد ابن عم لؤى ورعد و زوج زينه ،،فهمتوا حاجه)
مازن_ان شاء الله هيكون كويس ،ماشاء الله الولد قوى جسمه قدر يتحمل الضربات كلها من غير ما يتأذا بشكل كبير
تنهد رعد وكذلك حازم _الحمد لله
حازم _طيب هوا فين مش بيخرج ليه
مازن _لؤى معاه وهيخرج بيه خلال دقايق،انا خرجت اطمنكم بس
بعد عدة دقائق خرج لؤى وخلفه يامن النائم على الترولى ورأسه محاط بالكامل بالضماد وكذلك يده وبعض الاماكن فى جسده ويبدو انه لم يفق بعد من تأثير المخدر
اقترب منه حازم ببكاء_يامن قوم ،تحمل يابطل ،منهم لله انت متستاهلش اللى حصلك
لؤى وهو يربت على كتف حازم_ان شاء الله هيقوم ،انا مشفتش حد بقوته دى ،ربنا يبارك فيه ،حد غيره كان زمانه متكسر تماما ،بس هوا كان عنده مشكله فى أيده ورجله مش كده
حازم باسف_اه ياعمى ،للاسف وبسبب ده يامن اتعرض للسخريه والاهانه كتير فى حياته ،يامن انسان طيب جدا
ميستاهلش اللى حصله ده
لؤى_علشان كده ربنا نجاه منها
رعد_يعنى هيقدر يقوم على رجليه تانى
لؤى بتفاؤل_ان شاء الله
حازم _الحمد لله الحمد الله ، ثم وجه حديثه لرعد:شكرا يا عمى،انى ازعجت حضرتك
رعد لحازم_ازعاج ايه بس يا ولد ،اه لو كنت لحقتهم ،
لو عرفت اى حاجه على الكلاب دول بلغنى علطول،
حازم _حاضر
ثم وجه رعدحديثه الى مازن ولؤى_انا همشى انا علشان اتأخرت على الشركه ،
مازن _تمام يارعد متقلقش
الممرضه_دى الحاجات اللى جات مع المريض والتلفون بتاعه مبطلش رن
****
فرح بقلق جلى_رد يا يامن متقلقنيش عليك اكتر من كده
نغم_يمكن لسه فى المحاضرة وعامله سايلنت مش سامعه
فرح _لا انا عارفه الجدول بتاعه ،المفروض يكون خلص من بدرى ،ربنا يستر،انا خايفه اوى يا نغم
نغم _ان شاء الله خير ،متقلقيش
فرح _رد اخيرا،،ايوة يا يامن ،انت فين ومش بترد عليا ليه كل ده
حازم_انا حازم ،يا فرح
فرح بخوف ويدها ترتعش _ح..حازم ،يامن فين
حازم باسف وخائف من وقع الصدمه عليها_ فرح يامن كويس اطمنى ،هوا بس تعب شويه وفى المستشفى،،فرح ،،انسه فرح ردى عليا
لم تستطع فرح الرد عليها لانها كانت قد فقدت الوعى عندما علمت أن مكروها اصاب اخيها
امسكت نغم الهاتف_انا نغم صاحبتها ،ارجوك قولى فى ايه خلاها يغمى عليها كده
حازم _لا حول ولا قوه الا بالله ،يامن فى مستشفى ....،ارجوكى خليكى معاها
نغم _ متقلقش ،هفوقها ونيجى علطول
نغم وهى تضع البرفيوم لفرح الفت الفتيات حولها
_فرح ايه اللى حصلها
_يابنات ابعدوا علشان النفس بس
نغم وهى تقرب البرفيوم من انف فرح_فرح فوقى ،اخذت تربت على خدها بلطف
_الحمد لله ابتدت تفوق
نغم_،الحمد لله ،تماسكى يافرح
صرخت فرح بقوة بعد أن استردت وعيها _ يااامن
نغم وهى تهدئها _اهدى يا فرح ،تعالى يلا هنروحله المستشفى ،حازم بيقول انه كويس اطمنى
قامت فرح مهرولة الى السيارة للاطمئنان على اخيها وهى تدعوا الله طوال الطريق أن يسلم اخيها من كل مكروه
قادت نغم السيارة الى حيث عنوان المشفى الذى اعطاه لها حازم
نغم_وصلنا
ترجلت الفتاتان من السيارة ،هرولت فرح الى الداخل تسال عن اخيها
نغم_استنى هكلم حازم تانى اساله فى اى اوضه
اخبرها حازم برقم الغرفه وخرج بانتظارهم بالخارج
لم تستطع فرح تمالك اعصابها عندنا وجدت حازم يقف بالخارج ورأسه محاطه بضمادة
فرح ببكاء _يامن فين ،نظرت الى راس حازم وايه اللى حصل
حازم _مفيش حاجه حادثه بسيطه متقلقيش ،يامن جوا بس لسه مفاقش من البنج
دخلت فرح مسرعه الى غرفه يامن الغائب عن الوعى عندما رأته وضعت يدها على فمها من هول الصدمه واجهشت فى البكاء كانت جل ما تخشاه أن يؤثر ما حدث على قدمه فلا يستطيع المشى مجددا
ظلت تردد_لا حول ولا قوة الا بالله مرارا وتكرارا
حزنت نغم كثيرا على ما اصاب يامن واشفقت على صديقتها فرح _ ان شاء الله هيكون كويس
حازم _انسه فرح ،ارجوكى اهدى ،الدكتور طمنا وقال انه هيبقى كويس،ادعيله بس
فرح ببكاء _هوا فين الدكتور عايز اطمن منه بنفسى ،حاسه انك مخبى عليا حاجه
حازم _صدقينى ،عامه هكلم الدكتور تساليه
حازم_ دكتور لؤى اخت يامن صاحبى عايزة تتطمن على حالته ،،طيب تمام
نظرت فرح له باستفهام
حازم _الدكتور جاى ،خلال لحظات
طرق دكتور لؤى باب الغرفة (وحشتنا يا دكتور والله ،،همسه امل اتعلقت بيها جدا)
جرت فرح نحوه_دكتور ارجوك طمنى اخويا اخباره ايه،وهيقوم تانى على رجليه ؟!!
لؤى بتواضعه المعهود_اطمنى يابنتى ،يامن ان شاء الله هيكون كويس،وباذن الله يقدر يمشى على رجليه ،الحمد لله مفيش كسور فى رجله فى ايده بس ،ودماغه اخدت كم غرزة الحمد لله انها جت على قد كده ،دعواتك ليه
فرح وهى تتنفس الصعداء _الحمد لله يارب،متشكرة لحضرتك يا دكتور ،اسفه على الازعاج
لؤى بابتسامة هادئة _ربنا يطمنك عليه
فرح_امين،بس انا معرفتش ايه اللى حصل
نظر لؤى الى حازم فههم حازم على الفور علم انه لايريد منه أن يعلمها بالحقيقه
حازم_حادثه بسيطه
أشار لؤى الى حازم ليتبعه للخارج
لؤى_انا فى مكتبى لو احتجتوا لأى حاجه ،يامن دقائق وهيفوق وكم ساعه وهاجى امر عليه ،السلام عليكم
نغم وفرح_وعليكم السلام
خرج حازم مع عمه لؤى
لؤى_انت هتفضل واقف هنا ميصحش تقف معاهم جوا
حازم _بس يا عمى انا عايز اطمن على يامن
لؤى _لما يفوق ادخله واخرج على طول ،وخليك برا علشان لو احتاجوا حاجه مفهوم
حازم_مفهوم ياكتور
***
فاق يامن اخيرا
فرح بسعاده _يامن حمدا لله على سلامتك ،انا قلبى كان هيقف من الخضه عليك
نغم_حمدا لله على سلامتك يا يامن
خرجت نغم لتخبر حازم أن يامن افاق
يامن بالم_انا فين ،،فرح انتى بتعملى ايه هنا ،ايه اللى حصل
حازم بحب_حمدا لله على سلامتك يا صاحبى
يامن بخوف_حازم انت كويس
حازم_انا كويس وقدامك اهو ،شد حيلك انت يابطل وقوم يلا
يامن بتذكر ما حدث،كاد التحدث الا أن حازم ،اقترب منه هامسا_فرح متعرفش حاجه عن اللى حصل ،بلاش نقلقهم ،انا برا لو احتجت حاجه
يامن بضعف_شكرا لك يا حازم ،متحرمش منك
يامن _فرح كلمى بابا طمنيه ،زمانهم قلقانين
نغم_هروح اجيبهم ،واجى
فرح _بس كده هنتعبك يا نغم
يامن_بلاش تخليهم يجوا
فرح _لازم هيجوا ،مش هيقدروا،يعرفوا وميجوش يطمنوا عليك
ذهبت نغم لاحضار والدى يامن
جاء محمود واحسان مهرولين ليطمئنوا على ابنهم الغالى ،كان حازم جالسا على المقعد خارج الغرفة،وقف عندما رأى محمود واحسان وعلى وجوههم القلق _حازم اطمن ياعمى يامن كويس ،اتفضل ادخله
احسان ببكاء فشلت فى كبته_يامن ابنى حبيبى،جرالك ايه وايه اللى عمل فيك كده
فرح_ماما حبيبتي يامن كويس ،الدكتور طمنا
محمود_الف سلامه عليك يابنى ،قدر ولطف
استغلت نغم إنشغال الجميع وذهبت الى الحسابات لكى تدفع حساب المشفى الخاص الذى به يامن
***
_بتقول ايه يا حيوان ،هوا انت كنت عايز تقتله
_ ياباشا دى اوامر شهاب باشا قالنا نقتله
_وانت يا زفت منك ليه بتاخد اوامر منى ولا منه ،انا مش عايز قتل ،كنت عايزكم تروقوه شويه وبس،اغبيه ،الحمد لله انه مماتش ،علشان كنت هموتكم وراه ،غوروا من وشى
_حسابك تقل معايا ياشهاب الزفت انت كمان ،كنت عايز تلبسنى مصيبه ،كله الا القتل (لا والله فيك الخير)
*****
جاء دكتور لؤى ليطمئن على حالة يامن
لؤى _السلام عليكم، اخبار حضراتكم ايه
محمود_وعليكم السلام ،الحمد لله يابنى نحمده على كل حال
لؤى _ربنا يطمنك عليه ،ثم وجه حديثه الى يامن_تسمح لى يابطل اطمن عليك
يامن بفرحه من رؤيته للؤى الذى كثيرا ما سمع عنه وود أن يعمل معه بشركته هو ورعد _حضرتك دكتور لؤى الصياد
لؤى بهدوء_ الظاهر حازم حكالك عنى
يامن _انا اسمع عن حضرتك وعلى باشمهندس رعد من قبل ما اتعرف على حازم ،وبصراحه معجب بيكم جدا
لؤى_ربنا يعزك يا بنى
لؤى_يامن انت هتضطر تفضل معانا هنا اسبوع فى فحوصات واشعه لازم تتعمل
محمود _هوا حالته ايه يادكتور
لؤى_الحمدلله،شويه كسور فى ايده وفى جسمه أن شاء الله يبقى كويس ،ماشاء الله ياحج ،بركه دعائكم ، يامن عدى منها على خير ،كان فى نزيف داخلى بس الحمد لله قدرنا نوقفه ،
اصاب محمود الخوف والصدمه معا
لؤى_انا مش بقول لحضرتك كده علشان اخوفك انا حبيت اعرفك قد ايه ربنا رحيم جدا وانه نجا منها باعجوبه ،
احسان_الحمد لله يارب الحمد لله
لؤى_حضراتكم تقدروا تروحوا ،هنا فى رعايه شاملة متقلقوش عليه ،يامن فى عينينا
فرح_اه ياماما روحى انتى وبابا وانا معاه هنا
احسان _لا انا مش هسبب ابنى ابدا
لؤى متفهما_تمام زى ما تحبوا انا هحجز لكم الاوضه اللى جنب دى علشان تاخدوا راحتكم،والف سلامه عليك يا يامن
***
لؤى_يلا يا حازم علشان نرجع القصر مامتك قلقانه عليك
حازم_انا كلمتها ياعمى ،هدخل اطمن على يامن واجى مع حضرتك
***
محمود _المستشفى هنا شكلها غاليه اوى ،هروح اشوف الحسابات اكيد عايزين الحساب
محمود للممرضه _قوليلى يابنتى حساب الليله هنا بكام
الممرضه _على حسب ياحج ،الاوضه اللى حضراتكم فيها دى vip
محمود _يعنى ايه يابنتى
فرح_يعنى دى للناس المهمه ،ثم وجهت حديثها للممرضه_غاليه مش كده
الممرضه _ايوة يا فندم ٥٠٠ جنيه فى الليله
محمود _ياربى ،واحنا هقعد هنا اسبوع وكمان حاجزين اوضتين
احسان _هتعمل ايه يا محمود
محمود_متقلقيش ،ربك هيفرجها ،هروح اسأل المبلغ المطلوب بالظبط واروح اجيبه
الممرضه_فى قسم فوق كامل بالمجان للى مش بيقدر على تكلفه المستشفى،دكتور لؤى مشرف عليه بنفسه
محمود_اها ربنا يجازيه خير يارب
****
لو سمحت يابنى _عايز اعرف حساب غرفه ٢٠٥كام من فضلك
الممرض وهو ينظر للحاسوب امامه _ثوانى يا حج ،بعد لحظات _الحساب مدفوع يا حج ،حساب الاسبوع وتكلفه الفحوصات والاشعه اللى هتتعمل كمان
محمود_ازاى يابنى انا لسه مدفعتش حاجه
الممرض_ده اللى ظاهر قدامى ياحج،المريض اسمه يامن محمود مش كده
محمود _ايوة يابنى
الممرض_تمام ياحج الحساب اندفع خلاص،الف سلامه عليه
استغرب محمود ،وظن أن نغم هى من دفعت التكاليف وخاصه بعد اختفائها وعودتها بعد فترة وقرر أن يذهب ويحضر للملبغ ويرده لها كاملا
****
احسان_نغم يا حبيبتي تقدرى تروحى ،اهلك ممكن يقلقوا عليكى ،كتر خيرك يابنتى
نغم_هفضل معاكم شويه ياطنط وبعدين همشى ،
فرح_ماما قصدها منسببش لك مشاكل فى البيت يانغم
نغم_فرح انا حتى لو بت برا البيت محدش هيأخد باله انى مش موجوده ،
دهشت فرح مما تسمع
نغم _متستغربيش يافرح ،انا يعتبر عايشه لوحدى فى الفيلا ،
احسان _ياحبيبتى يابنتى.
نغم _عادى ياطنط انا اخدت على كدا خلاص
جاء محمود من الخارج _نغم يابنتى لو سمحتى عايزك
نغم_نعم ياعمى
محمود_اتفضلى يابنتى المبلغ اللى دفعتيه تكلفة المستشفى ،كتر خيرك يابنتى
نغم_ بس انا مدفعتش حاجه
استغرب محمود
نغم _انا فعلا روحت اعمل كده ،بس عرفت هناك أن الحساب اندفع ففكرت أن حضرتك دفعته
محمود_ يبقى اكيد حازم صديق يامن،بكرة الصبح هكلمه
نغم_اه فعلا اكيد هوا
محمود_تسلمى يابنتى ،ونعم الصديقه ،فرح محظوظه بصديقه زيك
نغم_صدقنى ياعمى انا اللى محظوظه جدا انى اتعرفت على اسرة طيبه وحنونه زيكم ،ربنا يبارك يارب
احسان_اعملك حاجه يا يامن ياحبيبى
يامن بتعب_متحرمش منك يا امى ،انا بس عايز انام
****
فى الصباح
جاء حازم للاطمئنان على يامن قبل ذهابه للجامعه
طرق الباب ففتح له محمود_اهلا ياحازم يابنى تعالى
حازم_انا اسف انى جيت بدرى ،بس مقدرتش اروح الجامعه قبل ما اطمن علي يامن
_تيجى فى اى وقت يابنى ،انا كنت عايزك قبل ما تمشى
_حاضر ياعمى ،هطمن على يامن واجى لحضرتك
بعد أن اطمئن حازم على صحه يامن
_ايوة ياعمى ،حضرتك كنت عايزنى
_الفلوس اللى انت دفعتها تكلفة للمستشفى ,اتفضل اهى،ربنا يبارك فيك
_انا مدفعتش حاجه يا عمى
محمود بدهشه _امال مين اللى دفعها ،غريبه
_المستشفى بتاعة عيلة الصياد ومش معقول هنحاسب حضرتك على حساب يامن اللى اصبح واحد من العيال خلاص
محمود _بردو يابنى كتر خيرك ، ربنا يزيدكم يارب ،
حازم _خد فلوسك يا عمى ،انت عايزنى انطرد من القصر ولا ايه
محمود_ربنا يجازيكم خير ،الحمد لله ربنا رزق اولادى بصحبه لو لفوا الدنيا كلها مش هيلاقوا زيها
خازم_ربنا يكرم اصلك ياعمى ،،يامن انا مشفتش ولا هشوف حد فى اخلاقه وطيبته ،ربنا يبارك فى تربيه حضرتك ياعمى
محمود _ده توفيق من ربنا يابنى ،وانت كمان ربنا يبارك فى تربيه والديك بجد
****
يامن _فرح انتى مش هتروحى الجامعه
فرح _لا انا هفضل معاك هنا
احسان _انا معاه يا فرح ،روحى انتى يابنتى الامتحانات قربت
فرح_خلاص ياامى هروح بكرة ان شاء الله ،بس النهارده هفضل مع يامن
احسان _ماشى يابنتى
دخل محمود _ ربنا يكرم عيلة الصياد دى بجد ،ناس ادب واخلاق ورحمة بجد
احسان _خير يامحمود
محمود_ الناس كتر خيرهم نقلوا يامن على هنا وانقذوه على وجه السرعه وكمان كان بامكانهم يحطوه فى القسم اللى بالمجان لكنهم حطوه فى احسن واغلى قسم ومش بس كده لما روحت ادفع الحساب ،قالوا أن الحساب مدفوع خلاص
سعدت احسان كثيرا_ربنا يباركلهم يارب
اقتربت فرح من اخيها_برافو يامن عرفت تختار الصديق الصدوق
****
_امجد ،ممكن لو سمحت ،تبعد عن فرح
امجد بلا مبالاه _ليه
نغم_فرح صاحبتى ومسمحش اى حد يأذيها لا هيا ولا عيلتها يا امجد
_موعدكش ،اخرجى انتى برا الموضوع يا نغم
_امجد ارجوك لو ليا خاطر عنك سيبها فى حالها ،حرام عليك اللى حصل لاخوها
امجد بتظاهر البراءه _ايه اللى حصل لاخوها
_انت عايز تفهمنى انك ملكش دخل باللى حصل ليامن محدش يقدر على ده الا انت ياامجد
_وليه متقوليش أن اخوكى اللى عمل كده ،حب يوجب معايا بعت الرجاله علشان يخلصوا عليه
صدمت نغم مما سمعت وهى لا تكاد تصدق
_انا صحيح كنت هبعت له حد من تبعى يعلم عليه ،لكن فؤجئت أن شهاب باعتله بلطجيه يموتوه
نغم_لااا شهاب ؟!
امجد_نغم ،انا مدين ليكى بالكتير ،،بس فرح ،موعدكش انى اسيبها فى حالها ،
نغم_امجد بليييز ،دى صاحبتى
امجد وهو يرحل _سورى يا نغم ،يس اوعدك انى مش هأذيها ،بس انا مش بسيب حد غلط فيا من غير ما يتعاقب
