رواية عمر وفريدة ( قدري ان احبك ) الفصل الثالث عشر 13 بقلم يارا سمير
13) والاخيره
يوم الخطوبه خالد راح اخد فريده من البيت وكانت الخطوبه ف فندق كبير اول ما نزلت من العربيه رجلها مااستحملتش تمشى وكانت هتقع مسكها خالد
خالد: يلا نروح
فريده بتجمع نفسها: لا هدخل .. دا اختيارى وقدرى
وصلوا عند باب القاعه كانوا وصلوا متاخر وقبل ما تتدخل من ع الباب شافت عمر بيلبس ياسمين خاتم الخطوبه وهو لبس الدبله والكل سقف مستحملتش ومشيت وخالد وراها ... اخدها وراح ع مكان وقعدوا لغايه ما هديت
فريده بصوت حزين: الفرح امتى
خالد: سمعت انه كمان شهرين بس ف لندن مش مصر
فريده ودموع نازله من عنيها : ربنا يسعدههم
خالد بعد اذنك من انهارده اخبار عن عمر مش عاوزه اسمع ممكن
خالد: حاضر
قعدت فريده وخالد فاضل يبصلها ومره واحده اتكلم
خالد : فريده
فريده بصتله: نعم
خالد مسك ايدها : تتجوزينى
فريده اتفجئت: ها
خالد طلع علبه من جيبه: انا الخاتم دا اشتريته ف يوم ال عرضت عليكى الارتباط ف لندن وانتى رفضتى واحتفظت بيه كان السبب عمر وعمر دلواقتى بدء حياته مع ياسمين ..انتى كمان ليكى حق تعيشى وتبتدئ حياتك ... القدر بيختار مين يقربهم ومين يبعدهم ,, وقدرى انى اقابلك وابقى معاكى ..ا بحبك يافريده ..بحبك من اول مره شوفتك واتمنيت تكونى معايا ...رجوكى ادينى فرصه اثبتلك حبى وتبقى معايا.. تتجوزينى
بصت فريده لخالد ولخاتم ومسكت العلبه و بعد لحظات هزت راسها بالموافقه و قفلت العلبه وبصت لخالد :
فريده: حاليا صعب يا خالد ..انا موافقه بس مش دلواقتى
انا لسه موجوعه ومجروحه وعاوزه وقت تشفى جروحى ومش هاخد وسيله انسى بيها .... اخد وقتى وبعدها نقرر دا لو ينفع معاك
خالد مسك ايد فريده : انا معاكى وهستنى العمر كله طول ماانا معاكى
فريده بتدى خالد العلبه: انا محتاجه وقت اتعود ع الوضع دا ..
خالد رجعلها العلبه: خليها معاكى وقت ما تقررى البسيه وهعرف ساعتها انك موافقه
فريده بصت لخالد: انا دلواقتى عاوزه حاجه وبفكر فيها
خالد: خير
فريده: عاوزه اشتغل ..عاوزه مستسلمش لوجع
خالد: عاوزه تشتغلى ايه محدده حاجه معينه
فريده: اى حاجه بس المهم تكون بعيد عن مجموعه رافت محمود ..انا بفكر افتح مشروع صغير انا بابا سايبلى مبلغ صغير هبتدى بيه ..
خالد سكت لحظات: طيب ايه رائيك تشاركينى
فريده: اشاركك ازاى
خالد: تدخلى شريكه بــ اسهم ف مجموعتى ..فيها سياحه ومقاولات وصناعه
اختارى عاوزه ايه وتبقى من الصبح شريكه فيهم
فريده : بجد ينفع
خالد: ينفع طبعا... ونبقى ع الاقل شركا ف حاجه وتبقى بدايه خير لشركه الكبيره
فريده : خلاص .. هروح اسحب الفلوس واجبهملك تمام
خالد: بس مش هتقعدى ف مصر الشركه الرئيسيه بره ف سان فرانسيسكو فى امريكا ايه رائيك ؟
فريده سكتت ..خالد: اهو تغيرى مكان وجو وناس واهو تتعودى ع وضع جديد يساعدك ..ها ؟
فريده : مش عارفه
خالد: لا خلاص .. جهزى نفسك هنسافر مع بعض قريب
فريده معرفتش ترد ووافقت ع كلام خالد وشويا وروحت البيت ... قعدت فى اوضتها وماسكه السلسله وبتضغط ع صدرها وبتعيط ..مش مستوعبه انه فعلا خلاص عمر اختفى من حياتها وحصلها نفس ال حصل لباباها نفس القدر .... شويا وقامت اتوضت وصلت وقرت قران شويا وقعدت تفكر وسؤال محيراها مش لاقياله اجابه : ياترى ال جى شكله عامل ايه ؟
______________________________________________
تانى يوم رامى اتصل ع فريده
فريده: الو
رامى: ديدا ..صباحو
فريده: ازيك يارامى اخبارك
رامى: الحمد الله .. انا قلت اطمن عليكى لانى مسافر كمان شويا وكويس انك مجتيش امبارح ؟
فريده: لا انا جيت بس مدخلتش .. لكن شوفت عمر وبيلبس ياسمين الدبله
رامى تنح ف التليفون: ومتصلتيش عليا ليه اخرجلك
فريده: مش كنت لوحدى كان معايا خالد ... وكويس انك اتصلت كنت عاوزه اقولك حاجه
رامى: خير
فريده : انا هسافر انجلترا مع خالد
رامى: هتتجوزوا
فريده: انت بتسمع ازاى ..بقولك هسافر معاه هشتغل معاه
رامى : نعم.. طيب مقولتليش ليه انا كنت اشوفلك شغل معايا
فريده بتضحك: تانى يا رامى .... بابا سايبلى مبلغ كنت هعمل مشروع بيه وخالد اقترح ادخل معاه شريكه بــ اسهم واسافر معاه ..انا محتاجه ابعد عن كل حاجه تفكرنى بالفتره ال فاتت ..عاوزه ادخل دنيا جديده اعرف ناس جديده ... ابدء بدايه جديده
رامى مش كان عارف يرد على فريده : معاكى حق ... انا اسف يافريده لانى كنت سبب رئيسى لبدايه كل ال حصل لولا اصرارى ع انك تبقى معايا مكنش حصل ال حصل
فريده: متعاتبش نفسك يارامى ال حصل قدر وانا راضيه
رامى: طيب هتسافرى امتى ولا متعرفيش
فريده: اخلص شويا اوراق وع اخر الاسبوع هنسافر
رامى: ديدا.. هتنسينى مش هتعرفينى تانى
فريده : عيب يارامى .. داانا هبيعك
رامى بيضحك: هى دى ديدا حبيببتى ..
اول ما تستقرى كلمينى او ابعتيلى رقمك وعنوانك .. دا عمر .....
فريده قاطعته: رامى متكملش .. انا عاوزه ابدء بدايه جديده وقفلت الصفحه القديمه ... ولو بتعزنى بجد متجبش لا سيره ولا اخبار عمر ولا باباه ولا تبلغ عمر اى اخبار عنى ,,, لو سئلك قوله متعرفش لان يارامى لو عرفت انك قلت صدقنى مش هتعرف مكانى تانى
رامى : اسف خلاص
فريده اتكلمت عادى : سورى يارامى ع الاسلوب .. المهم تسافر بالسلامه وسلملى ع نونا واشوفكم قريب بقى
رامى: اكيد ..هتلاقينى ناططلك
فريده : ان شاء الله
قفلت فريده مع رامى واتنهدت تنهيده وجعت صدرها ومسكت جامد ف السلسله ... ورامى قفل ووقعد سرحان هنا قربت منه بتكلمه مبيردش
هنا بصوت عالى: رامى
رامى اتخض: ايه دا ..
هنا ماانت مش سامه مالك سرحان كده ليه
رامى: مفيش ... مفيش
هنا: كلمت ديدا
رامى: اها وبتسلم عليكى
هنا: سألتك ع عمر ؟
رامى بص ل هنا: لا ومش هتسأل عليه خلاص هى قفلت الصفحه وموتت قلبها علشان ابوكى يفرح باابنه
هنا: انت ليه بتكلمنى كده وانا ايه ذنبى
رامى: ذنبك انك بنت رافت محمود يا هنا .. بنت دراكولا بجد
وقام رامى بنرفزه وهنا مش قادره تعمل حاجه .....
_______________________________________
مر اقل من الاسبوع وخلص خالد كل الاوراق وفريده حولتله الفلوس ع حساب الشركه فى امريكا ... وقبل ما تسافر راحت تزور مامتها وباباها قبل سفرها بيوم وراح معاها خالد وطلبت منه يخرج ويسيبها معاهم وخرج خالد ووقفت ديدا تقرا الفاتحه وبعدا اتكلمت معاهم :
فريده : ماما .. بابا ... انتم كويسين صح ..انا مبسوطه انكم مع بعض .. انتى يا امل مع حبك عمر افندى .. وانت ياعمر افندى مع حبك فريده وامل يا بختكم بجد... كان نفسى ابقى زيكم لكن انا لوحدى مش معايا حد غير ربنا وبدعيله يصبرنى ع فراقكم وانى اقدر اعيش ,,, انا هبدء حياه جديده ف مكان تانى وهقابل ناس تانيه ومش عارفه هنسى الناس ال عرفتهم ولا لا ....
مسكت السلسله وضمتها لصدرها ودموع نزلت من عنيها : انا جيت اعرفكم انى مسافره وهغيب بره كتير بس هبقى اجى كل فتره اطمنكم عليا ومتقلقوش عليا طول ما معايا السلسله انتم معايا متقلقوش ...
مسخت دموعها وخرجت ل خالد وع وشها ابتسامه : يلا بينا
خالد مسك ايدها وع وشه ابتسامه : يلا بينا
وسافرت فريده مع خالد وهى ف الطياره بتبص ع مصر من الشباك وهى سيباها وبتقول ف نفسها: ياترى هسيب كل حاجه زى ما سايبه البلد كده
_______________________________
سافر خالد وفريده ف نفس اليوم راح عمر لبيت عند فريده وكان متردد يطلع واخد قرار يطلع ليها خبط ع الشقه مفيش رد نزل قابل البواب
عمر: لو سمحت
البواب : ايوه يا حضرت
عمر: الانسه فريده عمر مش فوق
البواب: الانسه ديدا سافرت الصبح
عمر: سافرت فين وهتغيب
البواب : معرفش سافرت فين بس واضح انها هتغيب علشان سبتلى مبلغ كبير اتصرف منه لااى احتياجات العماره من نصيبها وقالتلى هتبقى تكلمنى
عمر اتفاجئ وطلع كارت : لما تكلمك اتصل عليا وادينى الرقم ممكن
البواب : ان شاء الله يا بيه
مشى عمر ومتفاجئ سافرت فين فريده ومع مين دخل العربيه عمال يفكر اتصل ب رامى :
عمر : رامى فريده راحت فين
رامى: ايه الدخله دى قول ازيك
عمر بعصبيه: فريده مش ف بيتها والبواب قالى انها سافرت سافرت مع مين وفين
رامى سكت لحظات: معرفش
عمر بعصبيه: عاوز تقنعنى انك متعرفش يارامى فريده فين ..والمفروض اصدق
رامى : بصراحه كده لو اعرف مش هقولك .. هى طلبت منى كده
عمر اتفاجئ: هى طلبت كده
رامى: ايوه قالتلى لا عاوزه تسمع عنك حاجه ولا اوصلك عنها حاجه
عمر متفاجئ: يعنى هى فعلا هتنسانى
رامى: بتقول ايه ؟
عمر قفل الخط وهو مش مصدق الكلام ال سمعه من رامى وان فريده تعمل كده معاه وقررت فعلا تسيبه وتنساه .....
__________________________________________
مرت 3 سنين ع سفر فريده واتغيرت شكلا .. غيرت لون شعرها وقصته وطريقه لبسها .. بقت حاجه تانيه خالص وبقت شخصيه بيزنس مشهوره فى يوم وفريده ف مقر الشركه مع خالد بعد اجتماع وخلص :
خالد: وحشتينى
فريده باابتسامه: انا مغبتش الا يومين بلاش بكش ونركز ف الشغل
خالد مسك ايد فريده وبيقرب منها : الساعه ال مش تكونى فيها قدامى بيبقى سنييييين
فريده بصت لخالد: يبقى مش هنشتغل
وانا عاوزاك ف موضوع واصبر كل حاجه لوقتها
خالد : ماشى ياستى ..انا صابر اهو بقالى 3 سنين اهو لما اشوف
فريده بتضحك: انا عاوزه افتح سلسله مطاعم
خالد: ودا ليه
فريده : رصيدى هنا ف الشركه كبير وعاوزه اشتغل ف تخصصى بقى انت ناسى انا خريجه سياحه وفنادق
خالد: وليه اخدتى القرار دا عاوزه تنفصلى عن الشركه بعد ما اسهمك كبرت
فريده بتضحك: انا هبيع شويا اسهم صغننه وابتدى ب 6 مطاعم .. عاوزه اشتغل ف حاجه بحبها والشهاده ال اخدتها تعمل حاجه بقى
خالد بانت عليه ملامح الضيقه
فريده مسكت ايده: مش هسيبك متقلقش هتلاقى ناطالك ف الشركه ع طول وانت هتكون معايا
خالد: يعنى هتقبلى شركا ادخل معاكى شريك
فريده : امممم بصراحه لا انا عاوزه اعمله مستقله بنفسى بمساعدتك
هتساعدنى ولا اطلب من بره
خالد : ومين دا ال يقدر يقربلك ..بس بشرط
فريده: خير
خالد: تلبسى الخاتم
فريده تنحت: الخاتم
خالد: ايوه واعتبريه خطوبه ومش هنتجوز الا لما تقولى انتى وتحددى الميعاد
فريده حاولت تتوه ف الكلام: انا بكلمك ع ايه وانت بتتكلم ع ايه
مسك خالد ايدها وشدها ناحيته وعينه ف عينها: فريده انا بحبك وكفايه علينا 3 سنين كده خلينا ناخد خطوه ف علاقتنا
فريده اتجمدت مكانها وقلبت الموضوع هزار: ماشى ع الخاتم هشوف البسه امتى
خالد: يوم ما تفتتحى المطعم الاولاانى ..
يوم الافتتاح والكل يعرف انك خطيبتى رسمى
فريده: ماهما عارفين ياخالد وبيعاملونى ع اساس خطيبتك
خالد: بس مش رسمى
فريده مش عارفه ترد قفلت الموضوع وبتلم اورقها: خلاص خلاص ..المهم اخدت موافقتك وابتدى ف التدوير ع مكان وهقولك
خالد: اوك وهستناكى
خرجت فريده ومش فاهمه اصرار خالد دلواقتى ع خطوبه ليه رسمى
وكان السبب ان خالد قابل رامى وفريده كانت مش موجوده
***فلاش باك ***
فى يوم خالد كان ف الشركه ورامى جه يقابله هو وفريده يسلم عليهم
خالد: رامى
رامى: خالد باشا
سلم خالد ع رامى وقعدوا وطلبوا قهوه يشربوها
خالد: ايه المفاجاءه الحلوه دى
رامى: انا كنت فى مقابله شغل وراجع باريس لاقيت قدامى وقت قلت اجى اشوف ديدا واشوفك هى فين صحيح
خالد: سافرت امبارح وراجعه بكره ان شاء الله سفريه شغل كده
رامى بيضحك: ماشاء الله ديدا اتغيرت خالص شكلا ومضمونا سيده اعمال صحيح .... يلا مفيش نصيب اشوفها مره تانيه بقى
خالد: الحمد الله انها بقت احسن وبدءت حياه جديده زى مانت عارف واتأقلمت بسرعه
رامى : مكالماتى معاها وزياراتى الخفيفه حسيت بفرق لكن بفرق ف الشكل والسلوك لكن قلبها متغيرش
خالد استغرب من كلام رامى: تقصد ايه
رامى : مقصدش حاجه .. انتم مش ناويين تتجوزوا و هتعملوا زى ناس وتفركشوا
خالد بيضحك: ايه هتفركش انت وهنا
رامى: لا عمر ال فركش خطوبته ومتجوزش
خالد اتفاجئ: متجوزش
رامى : من بعد ماسافرتوا بشهر بالظبط فسخ الخطوبه لكن علاقته بياسمين كويسه صداقه حتى ياسمين قريب هتتخطب من ال بتحبه
خالد مش عارف يرد : بجد
رامى اتنهد: بصراحه لولا ديدا قالتلى مش عاوزه تعرف ولا اعرف حاجه عنها ولا عنه كنت قلتلها بس انا شايف انها كده كويسه طول ماانت معاها يا خالد
خالد: اه ..اه
رامى مسك ايد خالد : خالد هطلب منك طلب .. لو ديدا لسه عمر ف قلبها ومش نسيته قولها انه فسخ خطوبته ومتجوزش لغايه دلواقتى مقضيها شغل بس ..يمكن فرصه بعد غيابهم يتقابلوا
خالد تنجح لرامى : ها ... ان شاء الله ..ان شاء اللهرامى: هقوم انا بقى يادوب الحق طيارتى وسلملى ع ديدا قولها ديدا الصغيره بعتلها سلام وبوسه كبيره
خالد : يوصل يوصل
مشى رامى وخالد قاعد حس انه ف ازمه وان ديدا لو عرفت هتسيبه فقرر يسرع بارتباطه بيها اول ما ترجع من السفر
_________________________________________
اختارت فريده مكان المطعم وجهزته وعملت افتتاح وعزمت الشخصيات المهمه وسمته **ICE World ** وعزمت رامى وهنا وراحوا يوم الافتتاح وكانت ديدا مستنياهم ف استقبلهم وهى واقفه لاقت كائن صغير قريب منها وبصوت طفولى ديدا ديدا .. حضنت فريده الطفله الصغيره وبصت لاقت رامى وهنا
فريده وهى حاضنه البنت : حبيببه قلب ديدا من جوه ديدا الصغيره
رامى بيضحك: عاوزين نسلم احنا كمان ولا ايه
هنا: انسى مدام اتقابلوا مش هتعرف تسلم
فريده بتضحك: معلش ياجماعه اصلها وحشتنى اووووى
رامى بيبص ع ديدا : ايه يابت الحلاوه دى كل ما اغيب ارجع اشوفك الاقيكى احلويتى .. هنا جهزى الاوضه ال ف الدور التانى ف البيت لضرتك
فريده خبطته : ياسلام انا اقعد ف اوضه انا اقعد ف دور بحاله
رامى بيضحك: ماهو انت تاخدى الدور التانى وهى الاول الترتيب مهم يا ديدا
هنا بتضحك : هروح اطلبلكم اتنين لمون بقى
كلهم ضحكوا ودخلوا قعدوا هنا ورامى وسابت فريده الصغيره مع فريده الكبيره
هنا بتبص ع المطعم: المكان والديكور تحفه ..جامده فكره ديكو الايس ف كل حته دا تحس بتراوه مش حر
رامى : ديدا وافكارها المجنونه
هنا بصت ع ديدا : مش لو كانت مع عمر كانت الظروف اتغيرت وكانوا احسن
رامى بيتنهد: النصيب بقى يا هنا
هنا : انت عارف ان عمر جى سان فرانسيسكوا يومين يحضر ميتنج هنا
رامى بص ل هنا: اوعى تقوليله ع مكان فريده مهما حصل يا هنا اوعى
هنا : لا متقلقش معانى كنت بفكر ف كده
قضوا يوم الافتتاح مع فريده وكل الضيوف مشيوا وفريده مبسوطه بالنتيجه وان المكان عجب الكل قعدت ترتاح وماسكه كوبايه المايه سئلها خالد وفاجئها
خالد: فين الخاتم يا ديدا
فريده اتفاجئت وبصت ع ايدها: موجود
خالد: فين مش لبستيه ليه
فريده : اصل نسيته احطه ف الشنطه وسيبته ع الكومدينو
خالد: كوميدينو ولا نستيه ف الدرج
فريده قامت وبتضحك: مش فارقه المهم انى نسيته سورى يا خلودى
خالد مسك ايد فريده : ياريت تفكرى بسرعه وتاخدى قرار ال فات مش اد ال راح
فريده تنحت ل خالد : اوك
______________________________________________
مرت مده ومطعم **ice world** الكل سمع بيه وعجبه فكرته واكلااته والايس كريم ال فيه فى يوم عمر راح سان فرانسيسكو وكانت ياسمين موجوده ف نفس التوقيت فاتفقوا يتقابلوا ف المطعم دا وراح عمر استنى ياسمين لغايه ماجت وقعدوا
عمر بيبص ع الديكور: حلوه فكره الايس كريم دى ورسوماتها المحفوره
ياسمين: الكل بيقول ان صاحبه المطعم واحده مغرمه بالايس كريم والايس كريم هنا تحفه هطلب اتنين
عمر : لا مش عاوز هاخد عصير
ياسمين: فين هديه عيد ميلادى ال وعدتنى بيها ولا هتملص
عمر بيضحك: لا معايا اهو وانتى قابلتى ايهاب
ياسمين مبتسمه: قبل ما اجيلك خلاص هانت نفذ كلام بابا ومشروعه عليه اقبال من شركات كتير وبقى ناجح كلها كام يوم وهيجى يخطبنى رسمى
عمر باابتسامه : مبروك
ياسمين : بعد ما اتفقنا اننا نكون اصحاب وتساعدنى ارتبط باايهاب مقابل صفقه مع بابا وساعدتنى مش كنت هحصل ع السعادى دى كلها وكنت اتمنى ليك كده مع فريده
لاحظت ياسمين وش عمر ال اتغير : يلا لبسنى السلسله
قام عمر يلبس ياسمين السلسله ف الحظه دى كانت فريده خارجه تبص ع المكان ولاحظت وجود عمر واتفاجئت وفرحت ف نفس الوقت وشويا بصت لاقت معاه ياسمين حست بوجع ف قلبها وخصوصا لما شافتهم بيضحكوا وبيلبسها سلسله دخلت تانى مكتبها ومن غير ما تحس دموع نزلت من عنيها ...!!
عمر خرج وهو وياسمين من المطعم وهو خارج من الباب سمع حد بيتكلم وقال اسم ديدا ** انسه ديدا بنت حلال من ساعه ما جت من مصر وهى واقفه مع اى حد محتاج شغل وخصوصا مصريين ووعدت هتشغل مجموعه كبيره ف المطعم التانى ** اسم ديدا علق مع عمر وياسمين ندت عليه وراح ركب العربيه ومشى ..!!
__________________________________
فى يوم عمر راح البيت عند باباه علشان هنا كانت هناك مع فريده الصغيره وراح يتغدى معاهم ..!!
عمر شاف فريده الصغيره : ديداااااااااااا حبيببه خالو
هنا: وام ديدا ملهاش حضن كده
عمر حاضن ديدا : لما اشبع
هنا : يبقى مش هتشبع يلا علشان هنتغدى
راح عمر وهنا قعدوا ع السفره مع باباه ومامت هنا ومفيش حد اتكلم
باباه: هتفضل قاعد ف الفندق كده بتيجى زيارات بس
عمر: مش انا عملت ال يريح حضرتك وقلتلى اعمل ال يريحك سيبنى براحتى
باباه: خلاص موضوع عدى عليه 3 سنين انسى بقى وعيش
عمر ساب الشوكه وبص لباباه: لما حضرتك تنسى امى وعمر عز الدين ..انا هنسى فريده .. بعد اذنكم
قام عمر من ع الاكل بعد ماهنا مسكت فيه زقها وطلع اوضته
هنا لباباها: انت عارف يا بابا ان عمر بيحب فريده بجد وفريده بتحبه
والاتنين سابوا بعض علشان حضرتك ترتاح ليه كل ما تشوفه تكلمه كده
باباها: ومين قالكم انى مرتاح وانا شايفه دافن نفسه ف الشغل وناسى نفسه
مامت هنا : بصراحه يا رافت انت زودتها فرقت بينهم وكنت فاكر الموضوع سهل
ابنك مش زيك
بصلها ابو عمر وساب الاكل وطلع ل رامى ف اوضته :
عمر: ايوه يا بابا حضرتك عاوز تقولى حاجه تانى
باباه: لامتى هتفضل كده
عمر: لغايه مااموت
باباه اتعصب: بنت عمر بتكرر ال عمله ابوها تانى فيا
عمر جاب اخره وصوته على : بنت عمر مش زى عمر ابوها
ولا انا زيك ..... عمر عز الدين معملكش حاجه مغلطتش ان حب انسانه قبل ما حضرتك ترتبط بيها ومن وقت ارتباط ب امى قطع علاقتهم ببعض لغايه ما ماتت وهو حصلها ... من ذنبه ان حبك الوحيد حب من طرف واحد ...حضرتك ال غلطت وفرقت بينهم من غير ما تسئل ... عمر عز الدين ربى بنته ع الحب وحضرتك ربتنى ع حب الفلوس ونفسى .... اسف جداااا انا حبيبت فريده وبحب فريده وهفضل احبها لغايه ما اموت ....(بيخبط عمر ع صدره ) لو حسيت بكم الالم ال بحسه من وقت ما سبتنى وقلبى بيوجعنى كل يوم ,,,بكم الحسره انى ضيعتها وكفتك ال طبت وهى فضلتك عنى ...لو عاوزه تأذيك كانت وافقت واتجوزنا ومهتمتش لامرك ..لكن عمر عو الدين علمها ان الحب حياه مش حب فلوس ....
ابو عمر واقف مش قادر يتكلم : عمر .. انا
عمر : حضرتك حبيتك ولغايه دلواقتى وبالرغم انك عرفت ان امى حبت غيرك ولسه بتحبها ... تخيل انى بحب واحده وعارف انها بتحبنى والسبب فراق مش شخص تانى لا ابويا ..ابويا المفروض يدور ع سعادتى بالعكس دمرنى ....
اخد عمر الجاكت ومشى بره الفيلا وابو عمر دخل اوضته ومسك صوره فريده ام عمر وحضنها وعمال يعيط ويتأسفلها ع ال عمله وانه منفذش وصيتها ... هنا سمعت كل الحوارات دى ودخلت ع باباها لاقته بيعيط وعمال يقول : سامحينى يافريده سامحينى يافريده .... اخدت نفسها وراحت لعمر الفندق
عمر: خير يا هنا فى ايه تانى
هنا: من غير عصبيه انا جايه اقولك حاجه مهمه معانى حاسه انه هتبهدل بس مش قادره استحمل اشوفك كده ...!!!
عمر : خير
هنا : ديدا .... انا عارفه هى فين ..!!
عمر اتفاجئ : بجد ..فين قولى بسرعه
هنا: سان فرانسيسكو مطعم **ice world** هى صاحبته
اتفاجئ عمر وقبل ما تكمل مسك تليفون يحجز تانى يوم لسان فرانسيسكو
_____________________________________________________
فى نفس اليوم فريده كانت مع خالد
خالد : فريده لسه مقررتيش ف موضوعنا
فريده اتوتر: هفكر ياخالد بس نخلص من الالتزمات ال عندنا
خالد: فريده
فريده حست انها معلقه خالد : لما ارجع من مصر يااخالد نعلن خطوبتنا
خالد : بجد
فريده بصت لخالد: بجد
خالد فرح جدا وكان هيطير من السعاده وفريده مسكت السلسله وحست بنغزه ف صدرها بس حست انها ظالمه خالد معاها فقررت تاخد خطوه ممكن يكون خير ليها ... وفعلا الوقت ال وصل فيه عمر مطار سان فرانسيسكو فريده كانت فريده وصلت لمطار القاهره ...راح عمر سأل ع فريده عرف انها مسافره وراجعه بكره حجز ف فندق وقعد مش مصدق انه هيشوف فريده بعد غيال 3 سنين حاسس انه روحه بترجعله ..وهو قاعد موبيله رن وكانت هنا :
عمر: الو
هنا: ازيك ياابيه عاملت ايه
عمر: وصلت من شويا وللاسف لاقيتها مسافره وراجعه بكره
هنا بصوت فرحه : طيب بابا عاوز يكلمك
عمر : بابا
باباه: عمر
عمر: ايوه
باباه بنبره حزن: سامحنى يابنى ع ال عملته معاك وفيك وانى منفذتش وصيت امك .... انا بصيت لجروحى ووجعى ومفكرتش انت اد ايه ممكن تتوجع وظلمت فريده بذنب هى مش مسئوله عنه سامحونى
عمر مش مصدق: بابا انت بتتكلم بجد
باباه: مترجعش ياعمر الا وفريده معاك وتكون مراتك فاهمنى مترجعش لوحدك
قفل عمر مع باباه وهو مش مصدق ال سامعه وحس ان الدنيا ابتدت تصالحه تانى بعد ما عذبته وقرر مش يرجع الا لما يقابلها وترجع معاه ...
فريده وصلت المطار واخدت تاكسى ع المقابر وزارت امها وابوها
فريده: بابا ..ماما .. وحشتونى اوى ,,انا غبت عليكم لانى كنت مشغوله اوى اسفه ... انا افتتحت مطعم جديد بتاعى لوحدى بفلوسى وسميته ice world وفيه ركن خاص بالايس كريم ال بحبه وعمر بيحبه ...المهم انا جيت اطمنكم عليا ... (مسكت السلسله وحضنتها اوى ) عمر افندى انا بعتب عليك انت مقولتليش ان النسيان صعب كده والفراق بيوجع كده انا بموت كل يوم بليل لما ببقى لوحدى لا قادره انساه ولا قادره ارتبط بغيره .. ..الفراق صعب اوى ياعمر افندى انت كنت عايش ازاى بيه وبوجعه ومش عارفه هفضل اعيش بالوجع دا ولا هيتداوى .... !!
وقفت شويا ومسحت دموعها وراحت ع الشقه شافتها وباتت فيها ورجعت تانى يوم الصبح وراحت المطعم ..... عمر عرف انها ف المطعم فقرر يروحلها وصل المطعم دخل س|أل عليها لاقاها ف المكتب خبط ع الباب :
فريده: اتفضل
عمر فتح الباب براحه وبيبص ع فريده لاقاها متغيره عن الاول شكلا بقت احلا وقف مكانه
فريرده بتبص مين دخل واتفاجئت: اتفضل ... عمر ؟
عمر باابتسامه: وحشتينى يا ديدا
فريده اتصلبت مكانها : عمر
عمر قرب منها : وحشتينى يا ديدا
افتكرت ديدا ياسمين وع انه متجوز فوقت نفسها : اتفضل يا مستر عمر اقعد
قعد عمر : عامله ايه ياديدا وحشتينى
فريده: احم.. الحمد الله ازيك وازاى رافت بيه
عمر: كله تمام ..وانتى واضح انك بقيتى بيزنس ومن مشهوره
فريده بصت لعمر : خير ..فى خدمه
عمر: ايوه..عايزك
فريده: اتفضل
عمر: عاوز اتكلم معاكى
فريده متوتره تليفون جالها : ثوانى هرد ع الموبيل
اخدته وخرجت بره المطعم عمر حس انها بتهرب خرج وراها لاقاها فعلا خارجه بره المطعم ورايحه ناحيه عربيتها جرى عليها بسرعه ومسكها من دراعها وبص لاقاها دموع نازله من عنيها
عمر : فريده ..انا مش قادر اعيش من غيرك ...انا بموت من غيرك .. كفايه فراق كده يافريده لا انتى قادره تعيشى كده ولا انا قادر اعيش كده ليه نظلم حبنا ونتعذب كده
فريده ساكته وعمر بيتكلم: مينفعش بعد ما الاقيكى ببساطه كده تسبينى ... مينفعش يا فريده ...انا بحبك ومحبتش غيرك...
فريده بصوت مخنوق : قدرنا نكون بعاد
عمر مسكها من دراعها الاتنين : قدرى انى بحبك واحبك
ومش ههرب من قدرى دا ال هو انتى يا فريده
فريده : مينفعش ياعمر تعمل كده لياسمين
عمر : ياسمين ... ياسمين احنا انفصلنا بعد الخطوبه بشهر وهى هتتخطب قريب من الشخص ال تحبه
فريده بصت ع ايده مفيش دبل : انفصلتوا
عمر: وجيتلك لاقيتك سافرتى وقتها كنت هتحدى بيكى العالم كله علشان متبعديش عنى
فريده مقدرتش تتمالك نفسها رمت نفسها ف حضن عمر وعيطت
عمر حضنها : وحشتينى يا ديدا وحشنى حضنك ووجودك معايا
فريده : وانت كمان ياعمر وحشتنى ... وحشتنى
افتكرت باباه بعدت عنه: باباك ياعمر
عمر: رافت بيه اخيرا بعد 3 سنين اتاكد اننا بنحب بعض وموافق ع ارتباطنا ولو عاوزه تتاكدى هسمعك الموافقه حالا
اتصل عمر بباباه واداه لفريده الموبيل :
فريده: الو
ابو عمر: سامحينى يا فريده ع ال قلته وعلمته معاكم ... سامحينى انى فهمت متاخر ان ال قدر اختارهم صعب اشخاص يفرقهم ..مستنيكى مع عمر علشان نعمل الفرح ونفرح
فريده مش مصدقه ال سمعته دموع نزلت من عنيها بصت لعمر وحضنته
عمر : يلا جهزى نفسك هنسافر ونتجوز
فريده : بالسرعه دى
عمر: وهنتسنى ليه تانى واحنا مع بعض
ف الحظه دى كان خالد واقف بعيد وشافهم وسمع الحوار وحس بخنقه ودموع نزلت من عينه لانه خلاص خسر فريده ....!!!
______________________________________________
عمل عمر وفريده فرحهم وعزموا كل حبايبهم واصحابهم وخالد وياسمين حضروا الفرح وهنا ورامى وفريده الصغيره وكان جمع كله سعاد وكانت فريده زى القمر بالفستان وهى وعمر اسعد اتنين ف الدنيا عمر مسك مايك وطلب من الكل ينتبه لكلامه
عمر: لو سمحت انتبهوا هنا لدقيقه
انا من موقعى هذا عاوزكم تشهدوا ع كلامى دا
فريده .... اوعدك انى مش هسيبك ابدا ابدا ومش هيفرقنا الا الموت
فريده.... اوعدك هفضل جنبك لغايه ما تبقى كركوبه وسنانك تقع حتى لو اارعيتى
فريده...انا محبتش ولا هحب ولا حبيتك غيرك
فريده.... قدرى انى احبك انتى ..
انتى قدرى واجمل هديه ربنا بعتهالى
فريده ... بحبــك ,,,لالالالا بعشـــقك موووووووووووووت
الكل صفر وهيص وفريده راحه ناحيه عمر وحضنت رامى كان واقف شايف حزن ف عين خالد رغم ابتسامه
رامى : ان شاء الله نصيبك هيكون مع ال تستاهلك وتحبك وتحبها
خالد: القدر مينفعش ندخل فيه هو بيحصل بس
رامى: فريده بعتالك العلبه دى
مسك خالد العلبه : انا كنت متاكد ان ايديها رافضه اى حاجه من اى حد غير عمر
عمر واقف مع فريده بفستان الفرح وبيوشوشها: انتى عارفه نفسى ف ايه ؟
فريده: ايه
عمر: ايس كريم
فريده بتضحك: وهتجيبه منين دلواقتى
راح عمر شاور باايده لاقى ان ال بيتوزع ع المعازيم ايس كريم مش عصاير ولا مشروبات فريده شافت كده وقعدت تضحك: مجنون والله مجنون
عمر: مجنون بيكى .. ياقدرى ..يااجمل قدر شوفته ف حياتى
يا حبيببتى يا مراتى يا ام عيالى
فريده : يخليك ليا يا احلى حب واحن شخص واطيب قلب عرفته وحبيته
عمر خلى فريده مقرب الايس كريم واخد منه وحط منه ع بوقها زى اول مره : عمر رافت كلينكس جاهز يافندم
راح باسها قدام الكل وهما ماسكين الايس كريم والكل صقف ليهم وكانت فرحه كبيره مفتقدنها الجميع ......
________________________
***بعد مرور 6 سنين ****
عمر قاعد مع بنوته بياكلوا ايس كريم قدام ال tv : وهى دى حكايه ايس كريم ديدا وعمر
بنوته الصغيره: يعنى يا بابى انت عرفت مامى بالايس كريم واتجوزتوا بايس كريم
عمر بيضحك : الايس كريم هو ال معيشنا يا نغومتى
ف اللحظه ديه فريده بتصرخ ع عمر : عمرررررررررررررررر يا عمرررررررررر
عمر بيبص لبنته : نغموتى اسيبك دلواقتى واشوف كعبورتى خلى بالك ع ادم لغايه مااجى
خرج عمر لاقى فريده ف المطبخ : انت سايبنى لوحدى كده
عمر حضن فريده وكانت حامل : هو النونو رقم 3 مزهقك ولا ايه
فريده: هانت اهو قرب يجى ويزهقك انت واخواته انا كفايه كده رضا 3
عمر: لا رضا ايه عاوز البيت عيال عيال منك ويبقوا شبهك كل مااروح حته الاقيهم
فريده : انت عاوز تموتنى
عمر: مش كفايه انه كل سنتين بتحملى دا لسه عمر وفريده و رامى وهنا ورافت وامل ......فريده: انت متجوز ارنبه
عمر وهو حاضنها من ضهرها : وحشتينى
فريده باابتسامه: انت اكتر
عمر: هو انا قلتلك انا بحب قد ايه انهارده
فريده باابتسامه: لا انهارده مش قلت
عمر حضنها اوى: علشان انا مش بحبك
انا بعشقك يا قلب عمر وروح عمر واحلى زوجه وام لااولادى
فريده: علشان انت احلى عمر قابلته ف حياتى ياقدرى ال كنت مستنياك ..
ياقدرى ال حبيته
عمر: قدرى انا انى احبك يااحلى الاقدار
عمر شاف فريده ماسكه ايس كريم : لا انتى قاصداها بقى
فريده بتضحك : نفسى راحتله حامل بقى وكده
عمر: طيب هاتى ايس كريم
فريده : لا
ف اللحظه دى بنتهم نغم دخلت :مامى انا عاوزه ايس كريم زى بابى
ضحك عمر وفريده وشال بنتهم وخرجوا قعدوا وقعدوا يهزوروا ويضحكوا ..
توتا توتا خلصت الحدوته حلوه ولا ملتوته
____________________________________________________
تمت بحمد الله #قدرى_ان_احبك
رأيكم فــ القصه
اتمنى تكون عجبتكم
________________________________
الغرض من كتابه القصه :
1_ الام والاب اشخاص مش بيتكرروا فى حياتنا فقدانهم بيسبب وجع ووجودهم جنه تقدريهم ومصالحتهم واجب لانهم بيحبوا اولادهم اكتر من نفسهم ... نتفهم غضبهم .. عصبيتهم... لان مفيش حد هيحبنا ف الدنيا زيهم .. لغه الحوار تفرق بين الاباء والامهات وابنائهم اخلقوا لغه حوار معاهم واكسبوهم مش تتجنبوهم لان ممكن ف لحظه مش تلاقوهم معاكوا وساعتها مش هينفع الندم واسأل ال فقد امه او ابوه او الاتنين .... بر الوالدين من وصايا الرحمن ورسوله
2_الاب اول حب لفتاه واول راجل يتعامل معاه اى ولد
فغياب الاب يعنى غياب الامان والوحده ف الدنيا لبنت او الولد
#فقدان الاب احساس مفيش حد هيفهمه غير الا جربه ...
قربوا لامكم وابوكم فقدانهم اصعب مما فى الخيال
_البنت لما بترتبط وتتجوز بتدور ع الشخص ال يكون ابوها ف احتواءه وحنانه قبل ما يبقى جوزها والولد لما بيرتبط ببنت بيدور ع تكون زى مامته فى حنانها وعطفها واحتواءها قبل ما تبقى مراته .. لان الام والاب مش بيتكرروا
ويابخت ال يتجوز ال بر بااهله ومراعيهم سواء بنت او ولد لان دا راجعله
3_فى علاقه بين ولد وبنت الكل يشوفها حب لكن معناها الحقيقى #صداقه
الاتنين عارفين حدودهم وعايشين حياتهم ومتمسكين ببعض ... اوقات بتبقى صداقه البنت لولد اجدع من ميت ولد وصداقه الولد لبنت اقرب من ميت بنت مش سهل تتوجد بس موجوده الصداقه دى
4_ ال بيحب بجد مش بينسى .. بيتعود مع احتفاظه بذكرياته لنفسه
وال بيحب بجد مهما غاب عنه حبيبه بيفضل فى باله لانه ف قلبه ...
5: الحياه اختبارات والحب اكبر اختبار نتعلم منه لما نخطئ الاختيار انه ميتكررش
6_ال انجرح مينفعش يعامل الناس كلها بقسوه لان هما كمان بينجرحوا وكل شخص يختلف عن التانى بجرحه ..فنراعى بعض لاننا بشر مش ملايكه
7_ال بيحب بجد مبيفكرش غير ف سعاده الطرف ال معاه مش بيحسب مع بعض لامتى وهنفضل مع بعض لامتى ... لانه قرر يفضل معاه ويعمل المستحيل علشان يفضل معاه من غير استسلام بيبقى دنيته وحياته
8_ الحب حياه بايدك تقرر تعيش او تموت
لما تفشل فى اختيارك دا مش ذنب الحب ولا ذنب الشخص ال ارتبطت بيه ..بيبقى نتيجه اختيارك وقرارك انت المسئول عنه ..علشان كده عيش ف حياتك الطبيعيه بالحب علشان تقدر تعيش الحب ال انت عاوزه مش تتوهم به...
9_ مينفعش ترتبط بشخص ع امل انك هتحبه بعدين ويكون بتحبه لانك بتظلمه وبتظلم نفسك معاه ودا اكبر غلط .. او تستغل خب شخص ليك علشان تنسى بيه شخص تانى ... خخد وقتك وطيب جروحك لان المشاعر وجرح القلوب الم مش سهل علاجه وبياخد وقته
10_اى حاجه بسيطه (ورده_شيكولاته_بسكويت_ايس كريم ) لو ال بتحبه عارف بيحب ايه وزعلان منك مجرد انك جبتله حاجه بيحبها هيفرح وهينسى انك زعلته لانك عارف بيحب ايه وبتحبه ..
11_ القدر مش بيتهرب منه .. بيتواجه
12_اياكم والكراهيه ..
الكراهيه هتضرك وهتضر اقرب ناس ليك قبل ما تضر ال بتكرهم
13_ لماربنا يكتب لااتتنين يبقوا مع بعض قدرهم مع بعض
مهما طال الزمن هيجمعهم مع بعض
لان ال بيختارهم رب الاقدار صعب يفرقهم الاشخاص ...
فاارضى بقدرك وسيب امورك لربنا لانه اعلم بيك عنك وعن غيرك
قدرى ان احبك ل يارا سمير
