رواية اهدتني معاقا (لكنه القدر) الفصل العاشر 10 بقلم اسماء عبدالهادي
على _ياماما بدافع ايه هيه معملتش حاجه ،هيه زيك قلبها مكسور على ابنها
سماح بتعصب_لاااا محدش مكسور كسرتى ابدا ،انا الود ودى اجوز اختك النهارده قبل بكرة علشان تجيبلى الواد ،بس اقول ايه لسه مجلهاش نصيبها
امتعض على من كلام والدته_طب انا خارج عايزة حاجه من برا
سماح بضيق_روح ياخويا ،وسيبنى هنا اهرى وامكت فى نفسى
على_يا ماما انا غلبت معاكى عايزة ايه بس
سماح بشوق وحسرة _عايزة حفيد ليا اشيله بين ايديا
على _حاضر ياماما،قولى يارب
على فى نفسه _لاحول ولا قوة الا بالله،ربنا يهديكى ياماما
كان على عكس امه تماما راضى بقضاء الله وعلى ثقه أن الله سيعوضه عن موت ولده
*****
فرح _يامن انا مرعوبه بكرة اول يوم امتحان ليا ،حاسه انى مش فاكره حاجه
يامن_لا ياحبيبتى متخافيش،دى مش ثانويه عامه يا فرح ،ده انتى مكنتيش عاملة كده فى الثانوى
فرح _معرفش قلقانه وحاسه انى مذاكرتش كويس
يامن_لا ذاكرتى ياحبيبتى ،وكويس جدا كمان يلا روحى نامى علشان تبقى مركزة
رن هاتفها ،دى نغم بتتصل هشوفها عايزة ايه
فرح _السلام عليكم ،نغم حبيبتى اخبارك
نغم_زى الزفت يافرح ،انا مش فاهمه ولا فاكرة حاجه
فرح _هدى نفسك بس يا نغم ،ده بس من التوتر احنا عملنا اللى علينا وذاكرنا وان شاء الله خير ،يلا ننام شويه علشان نقوم الفجر نراجع قبل الامتحان
نغم_حاضر يافرح ادعيلى ،
فرح_ماشى ياحبيبتى تصبحى على خير
انهت فرح محادثتها مع نغم فوجدت يامن ينظر إليها ويضحك
نظرت له ببلاهه_فى ايه يا يامن بتضحك ليه
يامن وهو ما زال يضحك _بضحك عليكى
احتقن وجه فرح من الغضب_ليه شايفنى اراجوز قدامك ،عدى كدا يا يامن
يامن_استنى يابت انتى زعلت ليه بس
فرح_اه زعلت ومخصماك وابعد من قدامى دلوقتى
يامن _وانا اقدر على زعلك بردو يافرحة قلبى
فرح_ايوة قدرت شايفنى مرعوبه ومتوترة علشان الامتحان وحضرتك قاعد بتضحك عليا
يامن وهو يضحك مرة اخرى _ما هو علشان كده بضحك
فرح_وبتعترف كمان ،امشى يايامن من قدامى بدل ما ازعلك
يامن وهو يصطنع الجديه _تزعلى مين يابنت انتى ،نسيتى نفسك ولا ايه
فرح وقد وصلت الى حد الانفجااار_يااااامن
يامن _خلاص والله انا اسف ،انا كنت بضحك علشان كنتى خايفه ومتوترة ولما كلمتى صاحبتك اتبدلتى تماما،وبقيتى تهديها انتى وتخففى توترها ،
فرح _يعنى كنت عايزنى اعمل ايه ،كان لازم تهديها واقولها مفيش حاجه مستاهله كل ده
يامن _طب قولى لنفسك يا مجنونه
فرح _انا مجنونه طب والله لمطلعه الجنون ده عليك
ادعى يامن الخوف واختبأ فى امه _الحقينى ياماما بنتك المجنونه دى
احسان _فى ايه يا ولاد ،كبرتوا خلاص على شغل العيال ده
يامن _قوليلها ياماما
محمود _ايه اللى بيحصل ده،والله عال فين المذاكرة يا اساتذة
فرح وهى تجرى باتجاه والدها _بابا يامن بيضايق فيا وانا عندى امتحان الصبح
محمود يوبخ يامن_كده بردو يا يامن ،اختك عندها امتحان وانت قاعد تهزر
يامن_يابابا والله بخرجها عن جو الرعب اللى هيه معيشه نفسها فيه ،بش شكلها مش متحمله هزار
محمود _طب تعالى يلا صالح اختك
فرح _لا انا مش عايزة اكلمه
يامن_خلاص بقا يافرحه قلبى ،انا زعلتك فى ايه بس انا قصدى انك تنسى الخوف ده ،بعدين اهون عليكى انا يامن حبيبك
فرح بعند _اه تهون
يامن باصطناع الحزن_بقى كده ،طيب عن اذنكم انا رايح اوضتى
جرت فرح عليه والقت نفسها بين احضان اخيها _اسفه يا يامن سامحنى ،انا متوترة اوى ومش عارفه بعمل ايه
اخد يامن يداعب شعرها_يابنتى مفيش حاجه مستاهله ،سيبيها لله وانا واثق انك هتنجحى وترتبى على الدفعه كمان
فرح_صحيح يا يامن
يامن _صحيح يافرحه قلب يامن،يلا على اوضتك وهصحيكى الفجر باذن الله
*****
فى الصباح
عاد امجد اخيرا بعد غياب دام شهر كان فيه بعيدا عن والديه والفيلا
جرت عليه امال وامطرت عليه بوابل من القبل فهى تحبه وتدلله كثيرا
ثم قالت بعتاب_كده يا امجد تسافر وتغيب الفترة دى كلها ،،وحشتنى اوى
امجد وهو يقبل رأس امه _وانا جيت اهو يا ماما ،اكيد كنتم مرتاحين منى
امال_اوعى تقول كده يا امجد ازعل منك انت متعرفش انت بالنسبالى ايه يابنى ،بس انا زعلانه منك وابوك مقهور اوى
امجد_فى ايه يا ماما
امال_كده تضيع السنه منك وامتحاناتك بدأت من اسبوع يابنى وانت ولا انت هنا
امجد بثقه_الامتحانات لسه مبدأتش بعد يومين هتبتدى
امال باستغراب _ ازاى الجدول نزل وكلنا شوفناه واول يوم كان من اسبوع
جلس امجد على الاريكه الناعمه ووضع ساقا فوق الاخرى_لا ده قبل ما اغيره
امال بعدم بفهم _تغيره
امجد_ انتى مستقليه بابنك ولا ايه ،مكالمة واحدة بس لمدير الجامعه الامتحان اتأجل لحد ما ارجع من السفر
امال بفرحه _انت بجد مش معقول يا ميدو
قام امجد من مكانه _بقولك ايه ياقمر انتى ،انا رايح اخد شاور واريح شويه عايز بعد لما اصحى الاقى اكله حلوة
امال_حاضر ياقلبى ،هوصيهم ف المطبخ يعملوا احلى اكل
امجد _لا انا زهقت من الاكل ده،عايز اكله كده غريبه انا مأكلتهاش قبل كده حاجه كده دسمه ومسبكه بعيدا عن الاكل اللى بناكله كل يوم انا مليت منه
امال وهى تفكر _حاضر ياميدو هشوف كده ،بس انت مش هتطمن على ابوك
امجد بلا مبالاه وهو يصعد السلم _هوا اتحسن صح'سلميلى عليه
****
بينما امال تجلس تفكر فى الاكل التى ستطلبه من الطباخ فى المطبخ جاءها اتصال
امال_هاى ست احسان ،عاملة ايه
احسان _الحمد لله،اخبارك ايه يا امال هانم
امال_كويسه ،
احسان _انا تقريبا خلصت طلب حضرتك فكنت عايزاكى تشوفيه علشان لو عندك تعديل اعدله قبل ما اخلص
امال_تمام يا احسان مفيش مشكله،هنتقابل عند رشا زى كل مرة ،بقولك يا احسان ،متعرفيش اكله غريبه اعملها لابنى لانه زهق من الاكل اللى بنعمله
احسان بتفكير_عندى طلب حضرتك يا امال هانم ،
امال بفرحه_انقذتينى يا احسان بجد ،امجد كان هيزعل اوى وانا مش بقدر على زعله ،
احسان _وانا ميرضنيش زعل ابنك ابدا ،ساعتين بالظبط ويكون الاكل جاهز
امال باندهاش_انتى اللى هتعمليه بنفسك
احسان_متخافيش انا نضيفه جدا فى الاكل
امال_مش قصدى طبعا ،بس انا فكرتك هتقوليلى على الطريقه ،طيب قوليلى العنوان وهبعت السواق ياخد الاكل
احسان_ماشى .......
امال_ميرسى بجد يا احسان،هبعته بعد ساعتين
احسان _ان شاء الله
***
رجع يامن الى المنزل بعد ما اوصل اخته للجامعه بعد ما اصر هو على توصيلها بنفسه فى أول يوم لها ليبث فى قلبها الطمأنينه،الحت عليه فرح كثيرا أن يوصلها فقط الى موقف الاتوبيس وستكمل وحدها لكنه رفض
يامن_السلام عليكم ياامى
احسان _وعليكم السلام يا حبيبي ،حمدا لله على السلامه
يامن_الله يسلمك،متأخرة يعنى على الغدا مش زى عوايدك ،تحبى اساعدك
احسان _لا ياحبيبى الاكل بتاعنا خلص من بدرى ،تحب اغرفلك تاكل
يامن_لا هستنى فرح اكيد ،بس ده اكل مين؟؟!
احسان _ربنا يوفقها يارب ،بدعيلها وبدعيلكم طول الوقت
يامن_مقلتيش ياامى ليه الاكل ده
احسان _ده اكل رايح لمدام امال ،زبونه عندى ،ابنها نفسه فى اكله جديده وانا قلت اخليه يجرب المحشى والبط بتاعى
يامن_ربنا يجازيكى خير يا امى ،اكيد هيأكل صوابعه وراه ،محدش يقدر يقاوم اكل احسن شيف فى الدنيا
احسان _ربى يباركلى فيك ياحبيبى ،يلا ادخل ذاكرلك شويه امتحانك بكرة وانت ضيعت وقت كتير وانت بتوصل اختك
يامن_ماشى ياامى ،عن اذن حضرتك
بعد عدة دقائق انتهت احسان من الطعام وانتظرت السائق
جاء السائق وسلمته الطعام _ابقى سلملى على امال هانم،بالهنا والشفا
السائق_اتفضلى يافندم امال هانم باعته لحضرتك الفلوس دى
احسان _لا والله ابدا ،دى حاجه بسيطه علشان ابنها بس
واتفضل الطبق ده ليك
السائق_شكرا لحضرتك
***
وصل السائق الى الفيلا واعطى امال الطعام
السائق:اتفضلى ياهانم ،الست احسان بتسلم على حضرتك وبتقول لحضرتك بالهنا والشفا وكمان مرضتش تأخد الفلوس وبتقول انها حاجه بسيطه لامجد باشا
امال _الست دى بيزيد اعجابى بيها يوم عن يوم ،شكرا يا عم على
السائق:تحت امرك يا امال هانم
****
استيقظ امجد من النوم اخيرا ،ثم واخذ حمامه وارتدى ملابسه ووضع البرفيوم الخاص به ونزل الى اسفل
امجد_صباح الخير يا ماما
امال_قول مساء الخير ،كل ده نوم يا ميدو
امجد_ايه الريحه الجميله دى اما واقع من الجوع ،ريحه الاكل تحفه
امال_يلا ياحبيبى ،الاكل جاهز من بدرى
امجد_وهو يتناول الطعام بشراهه،واو يا امال الاكل تحفه اوى
سعدت امال أن الاكل اعجبه_بالهنا والشفا يا حبيبى ،هوا ده طلبك
امجد _بالظبط ،كل فترة اعمليلى منه ولا اقولك كل يوم
امال_كل يوم ايه بس ياامجد ، الاكل مش عاملينه هنا
امجد _جايبنه من مطعم يعنى ؟!
امال_لا الست احسان اللى بعمل عندها هدومى ،هيه اللى اقترحت تعملك الاكل ده وماشاء الله نفسها جميل اوى فى الاكل
امجد _اها طب وصيها بقا تعملى حاجات من دى كل يوم
امال_دى خياطه ياامجد مش طباخه ،ومش هينفع اطلب منها كل يوم،انا هخلى الطباخ يعمل اكل زيه
امجد _لا انا عايز اكل الست دى ،دايما الناس دى بتكون عندها تكات معينه فى الاكل
امال_هحاول ياامجد
*****
انتهى الوقت المحدد للامتحان وتم السماح للطلبه بالخروج من اللجنه
خرجت فرح ونغم من لجنه الامتحان سعيدتين
نغم _ها يافرح عملتى ايه
فرح _شكلك مبسوطه ،يبقى الامتحان كان كويس
نغم_اه الحمد لله ، كان سهل جدا
فر ح_ان شاء الله ياحبيبتى،فعلا الامتحان كان كويس جدا يارب نقفل المادة دى
يلا نروح علشان نستعد للمادة الجاية ،
نغم_اوكى يلا ،انا هوصلك ،مفيش اعذار اخوكى مش معاكى النهارده
فرح_بس كده هتعبك معايا
نغم_ولا يهمك يافرح
اوصلت نغم فرح الى منزلها اصرت فرح أن تنزل نغم من السيارة وتدخل معها قليلا لتعرفها على والدتها
احسان _فرح حمدا لله على السلامه،عملتى ايه
فرح_الحمد لله ياماما كان كويس جدا
يامن_فرحه قلبى طمنينى،معرفتش اذاكر من القلق
فرح _الحمد لله اطمن يا يامن حليت كويس الحمد لله
يامن بسعاده _مش قلت لك
فرح _نغم صاحبتى معايا
احسان _وسايباها يابنتى برا دخليها بسرعه
يامن_هروح اوضتى علشان تاخدوا راحتكم
دخلت نغم المنزل فوجدته منزل متواضع جدا مقارنه بفيلتها الضخمه ،لكن احست فى هذا المنزل منذ الوهله الاولى بدفأ العائلة والحب الذى حرمت هى منه
احسان _اتفضلى يا حبيبتى ،عاملة ايه يا نغم
نغم_الحمد لله ياطنط كويسه ،اخبار حضرتك ايه
احسان _كويسه الحمد لله يابنتى،ها عملتى ايه فى الامتحان طمنينى
شعرت نغم بالسعاده لسؤالها تذكرت والدتها وكيف كانت تهتم بها _الحمد لله كان جميل جدا الامتحان
احسان_ربنا يوفقكم يارب وميضيعش تعبكم ابدا
نغم_امين،طيب انا هستأذن انا علشان متاخرش
احسان_ابدا والله ما يحصل ،انتى هقعدى تتغدى معانا الاول
نغم باحراج _مرة تانيه يا طنط ،شكرا لحضرتك
فرح_دى اكل ماما هيعجبك جدا ،اوعى تفوتى الفرصه دى من ايدك
احسان _يلا يافرح خدى نغم على الاوضه هجهزلكم الاكل هناك علشان تكونوا على راحتكم
نغم بتردد _بس ياطنط
فرح وهى تدفعها من الخلف_يلا يا نغم بقا ،عايزة تزعلينى منك
نغم _بس كده مش هسبب لكم ازعاج
احسان _اوعى تقولى كده يابنتى ،ده البيت بيتك وانا بعتبرك زى فرح بالظبط وتيجى فى اى وقت
نغم_شكرا ياطنط ربنا يخليكى
فرح _اتفضلى يا ستى دى اوضتى ايه رايك فيها
نغم_جميلة ورقيقه زيك بالظبط يا فرح
ازاحت فرح حجابها ففرغت نغم فمها فى اعجاب شديد _واو يا فرح شعرك جميل اوى وطويل ماشاء الله
فرح _عنيكى اللى جميلة يا نغم
أحضرت احسان الطعام وتناولته الفتاتان فى جو من المرح والالفه افتقدته نغم كثيرا فى فيلتها
نغم _الاكل جميل اوى تسلم ايدك مامتك بجد ،انا هتعود على كده ومش بعيد هتلاقينى ناطة عندكم كل يوم
فرح _يا سلام ده انا اكون سعيدة بده ،ده بيتك التانى يانغم ،اينعم مش زى الفيلا ،بس انا بعتبره مملكتى الصغيرة وبحمد ربنا على النعمه دى جدا
نغم_بالعكس،هتصدقى لو قلت لك انى لاول مرة احس بالراحه والامان من بعد موت ماما ،احساس فقدته جدا يا فرح ،انا مبسوطه انى معاكى هنا .ثم أكملت بتردد فرح فى حاجه كنت عايزه اقولك عليها بس ..بس خايفه تفهمينى غلط
فرح _قولى يانغم،متقلقيش هفهمك غلط ،،قصدى هفهمك صح هههه ،قولى بقا فى ايه
نغم_فرح أنا...
فرح_انتى ايه سامعاكى
نغم_فرح والله محصلش، حاجه بينا .ده ده كلام عادى بس
فرح_انا مش فاهمه حاجه،،احكى يانغم متردده ليه
نغم_بصراحه بقا ،انا بحب واحد
فرح بصدمة_نعم
نغم بخوف_شوفتى اهو انتى فهمتينى غلط
فرح_لا انا بس اتفاجئت كملى
نغم_اكمل ايه بس كده
فرح_نعم ياختى هوا ايه اللى بس كده ،قولى حبيتيه امتا وازاى وفين وعرفتى ازاى انك حبيتيه،مش يمكن اعجاب بس
نغم_معرفش ازاى وامتى يافرح،بس انا متعلقه بيه جدا لما بشوفه او اسمع صوته برتبك وبكون مبسوطه اوى ،بيشغل تفكيرى كل لما اجى انام بفضل افكر فى شعره الاسود الناعم وعينيه البنيه الجميله ،هو وسيم اوى يافرح وعليه حضور يلفت الانظار ولا جسمه الرياضي ...
فرح_حيلك حيلك يابنتى ،انتى كده بتحملى نفسك ذنوب ،ازاى تسمحى لنفسك تبصلى لولد لدرجه انك تعرفى كل تفصيله فيه كده
نغم_يا فرح الكلام ده من زمان قبل ما اتعرف عليكى واعرف انه ده غلط
فرح _وعرفتيه فين ،الاستاذ ده
ابتلعت نغم ريقها_هوا صاحب شهاب اخويا
فرح بامتعاض _ كماااان ،يعنى على حسب كلامك على اخوكى ،يبقى شاب مش كويس ،ازاى تعلقى نفسك بحد زى ده يانغم ،ده مينفعكيش يا نغم
نغم_بس انا متعلقه بيه جامد يا فرح
فرح _انتى على علاقه بيه او صرحتى له بحاجه
نغم_لا طبعا محدش يعرف حاجه بده غيرك فضلت حابسه احساسى ده فى قلبى وبس،لكن انا بكلمه عادى هو صاحب اخويا ونعرف بعض من زمان بس مفيش اى علاقه بينا
فرح_نغم كل اللى حصل ده من بدايته غلط ،انتى سمحتى لنفسك تكلمى الشاب ده وكمان متغضيش بصرك وتبصى له بالطريقه دى غلط ،شوفتى نتيجته ايه قلبك اتعلق بيه غصب عنك يانغم
نغم بتنهيده_اعمل ايه يا فرح قوليلى
فرح_ولا حاجه ،انتى هتقطعى اى رابط يوصلك بالولد ده نهائى وكمان هتمسحى رقمه من عندك ،ولو جيتى تفكرى فيه حاولى تشغلى تفكيرك باى حاجه تانيه والاستغفار مثلا
وادعى ربنا كتير انه يريح قلبك ياحبيبتى
انتى بنت كويسه وتستاهلى حد يحافظ عليكى ،مش شاب صايع يغرقك معاه انتى تستاهلى حد يحبك بجد ويجى يطلبك من اهلك ويعترف بده قدام الناس كلها
نغم بتنهيدة ضيق_هحاول يا فرح ،ادعيلى ،الموضوع ده هيبقى صعب اوى
فرح _متقلقيش ،انا معاكى ومش هسيبك
انتظروووونى البارت الجاى بدايه للاحداث المشوقه
نغم كانت معجبه بمين؟!
الايام الجايه هتكون فرح بالنسبه لفرح ولالا
