recent
روايات مكتبة حواء

رواية ضحية العادات والتقاليد الفصل الثالث 3 بقلم ميمي

الصفحة الرئيسية

رواية ضحية العادات والتقاليد الفصل الثالث 3 بقلم ميمي 


 حلقة_3

ﺑﻨﺖ ﻋﻤﻲ منال حجرتها ﻧﻬﻴﺖ ﻋﻠﻴﻬﺎ ﻣﺎ ﺗﺘﺰﻭجش حد ﻏﻴﺮﻱ ﻭﻟﻮ ﺗﺰﻭﺟﺖ والمصحف طلقة في رﺍﺳﻬﺎ ﻭﺭﺍﺱ ﺍﻟﻠﻲ بياخذها ﻭﻋﻤﻲ نتبروا منه ..
عمامي : ﻻ ﺣﻘﻚ احني ﻣﻦ غدوا نطلعوا لطرابلس ونحكوا مع ﻋﻤﻚ ونخطبوها منه ومايكونش ﺧﺎﻃﺮﻙ ﺍﻻ مجبور انت ﺍﻟﻐﺎﻟﻲ ولد ﺍﻟﻐﺎﻟﻲ .. ما انولدتش ولاتسمي مراة اللي تكسر ﺧﺎﻃﺮﻙ .. مش ﻣﻘﺒﻮلة ابدا ..
قيس : والله نعرفكم ماتقصروا ﺑﺲ حزت في خاطري ﻋﻤﻲ ﻳﺮﻓﻀﻨﻲ .. شن شاف مني .. شني اني مش راجل في عينه وعين بنته .. ﺣﺘﻰ ﻟﻮ عايشين في طرابلس وخذوا ﺍﻃﺒﺎﻉ اهل طرابلس .. يقعدوا ﻣﻨﺎ وفينا .. وبنته احني ﻋﻤﺎﻣﻬﺎ ﺍﺣﻖ ﺍﻟﻨﺎﺱ ﺑﻴﻬﺎ ..
عمامي : من توا ﺍﻋﺘﺒﺮ انه القصة انتهت واعتبرها مرتك من توا ..
________________________________💔💔💔
منال توا احكي
منال .. في يوم من الايام ﺟﻴﺖ ﻣﻦ ﺍﻟﻤﺪﺭسة وشفت الصالة متاعنا معبية رجالة كلهم لابسين عربي وجرود ﻋﺮﻓﺖ انه هاذم اﻋﻤﺎﻣﻲ ..
خشيت وما اهتميتش .. ﺑﻌﺪﻳﻦ ﺳﻤﻌﺖ ﺻﻮﺗﻬﻢ ﻋﺎﻟﻲ وعياط ﻃﻠﻌﺖ ولقيت ﺍﻣﻲ ﺗﻀﺮﺏ في ﺧﺪﻭﺩﻫﺎ ﻭﺗﻀﺮﺏ يد بيد ..
منال : شن فيه ﻣﺎﻣﺎ شنو صار .. ﺍﺷﺮﺗﻠﻲ ﺍﺳﻜﺘﻲ .. قعدت نصنت معاها ..
عمامي : ﻋﻴﺐ ﻋﻠﻴﻚ يا ياسين ولد ﻋﻤﻬﺎ ﻭﺗﺮﺩﻩ .. ﻫﻮ ﺍﺣﻖ ﻭﺍﺣﺪ فيها .. ولد ﻋﻤﻬﺎ ﺳﺘﺮ ﻭﻏﻄﺎء ليها .. وبنتك مايخذها حد غير قيس ..
منال واني نشبح لامي : هاذوا شن جايين يخرفوا .. امل : بالله عليك اسكتي ﻣﺼﻴﺒﻪ وطاحت ﻋﻠﻰ روسنا .. شوي و ﻃﻠﻌﻮا ﻣﻨﻪ متعفلقين .. جي بوي و ﻋﻴﻮﻧﻪ ﻧﺎﺭ ..
ياسين : ياربي كيف الراي .. قالوا انه قيس حجر منال يعني ماتتزوجش غيره ..
امل : ﻭﻳﻦ ﻋﺎﻳﺸﻴﻦ احني شنو التخلف هاذا شنو يحجرها وينهي عليها .. فيه ﻗﺎﻧﻮﻥ توا خلي نمشوا نشكوا فيه ..
ياسين : مافيش ﻗﺎﻧﻮﻥ يحمينا ﻣﻦ القبايل وحكمهم .. وبعدين هاذوا اهلي .. ﻳﻌﻨﻲ ﻟﻮ درت اي ﺷﻲ ﺿﺪﻫﻢ يقدروا يطلعوني ويهججوني حتي من حوشي .. وبعدين ماتنسيش انه قيس واصل في الدولة يعني مستحيل .. شبح لي منال .. ﺑﺎﺑﺎ حبيبتي وافقي ع قيس وخلاص ..
منال : ﻣﺴﺘﺤﻴﻴﻴﻴﻴﻞ نوافق انه ناخذ ﺍﻟﻬﻤﺠﻲ هاذا .. ﻭﺍﻟﻠﻪ ﻟﻮ نموت ﻭﻻ نولي مرت واحد زيه .. خليتهم وخشيت لداري .. لعند الليل خذيت التلفون وكلمت ﻋﻤﺮ ..
منال : عمر ..
عمر : عيونه ..
منال : يسلمولي عيونك .. ﻫﺬﺍ ولد ﻋﻤﻲ حجرني ..
عمر : ﻳﻌﻨﻲ ﺷﻨﻮ ..
منال : شنو عرفني .. قالوا ﻳﻌﻨﻲ ﻣﺎ نتزوجش غيره .. ﻭﻟﻮ ﺧﺎﻟﻔﺘﻬﻢ ننقتل ﺍﻧﻲ ﻭﺍﻟﻠﻲ بياخذني ..
عمر : هاذوا ﻭﻳﻦ ﻋﺎﻳﺸﻴﻦ ﺷﻨﻮ التقاليد الهمجية هاذي ..
منال : شن بندير هاذوا اﻋﻤﺎﻣﻲ تعرف نكرههم والسبب عقليتهم والتخلف والجهل اللي هما عايشين فيه .. عندهم ﺍﻟﻤﺮاة ﺍﺩﺍﺓ بس ﻟﺨﺪﻣﺔ ﺍﻟﺮاﺟﻞ وصغاره .. ﻣﺎ عندهاش ﺍﻱ ﺣﻘﻮﻭﻕ ..
عمر : مادوريشي يا ﺣﺒﻲ ﻟﻮ نهد الكون ونقلب الدنيا قلب ع خاطرك .. ناخذك يعني ناخذك ..
منال ﺿﺤﻜﺖ : ربي ﻳﺨﻠﻴﻚ ليا ومايحرمني منك ..
قعدت ﻣﺴﺘﻤﺮة ﺑﻌﻼﻗﺘﻲ مع ﻋﻤﺮ .. ومش هامني شي .. ﻭﻣﺮﺕ شهور ﻭ ﻋﺎﺩﻱ ماحدش تكلم ع القصة ﺑﺲ انتشرت قصتي للناس ﻛﻠﻬﺎ .. ولد ﻋﻤﻲ حاجرني وناهي عليا ومعاش جي حد خطبني لانهم خايفين .. ﻭﻛﻞ حد يجي ﻳﺨﻄﺐ ﺑﻌﺪﻳﻦ ﻳﻌﺮﻑ انه ولد ﻋﻤﻲ حاجرني يمشي ومعاش يجي .. ﺑﺲ ﻋﺎﺩﻱ يحسابوني اندور فيهم .. ﻋﻤﺮ ﺣﺒﻴﺒﻲ ﻳﻜﻔﻴﻨﻲ ومش راح يسيبني ..
________________________________💔💔💔
نرجعوا لي قيس خليه يحكي
قيس .. ﺑﻌﺪ ﻣﺎ مشوا اﻋﻤﺎﻣﻲ لحوش ﻋﻤﻲ ورفضهم حتي هما وموافقش يعطي ﺑﻨﺘﻪ .. خلاص حجرتها ونهيت ﻋﻠﻴﻬﺎ .. ﻭﺑﺲ ﺗﻔﻜﺮ ﺗﺘﺰﻭﺝ حد غيري تنقتل .. ﺑﺲ قتلهم معاش حد يمشيلها ولا يتواصل معاهم .. بنته وحجرتها ونهيت ﻋﻠﻴﻬﺎ وماتتزوجش حد غيري .. ﻣﺼﻴﺮﻫﺎ ﺗﻘﺒﻞ ﻭﺭﺟﻠﻴﻬﺎ ﻓﻮق ﺭﺍﺳﻬﺎ ..
ﻣﺮﺕ شهور ﻭ ﺍﻣﻲ ﺗﻠﺢ ﻋﻠﻴﻪ انه نتزوج .. مش موافق نتزوج .. ﺑﺲ ﺍﻣﻲ مرضت وقعدت تبكي تبيني نتزوج .. قلتلها ﺑﺮﺍحتك ..
بصرﺍحة نبي نكسر ﺧﺸﻤﻬﺎ لما ﺗﺴﻤﻊ اني ﺧﺎﻃﺐ ﻏﻴﺮﻫﺎ ومش مدورها .. ﻭﻏﺼﺒﺎ ﻋﻠﻴﻬﺎ ترضي بيا .. مشت ﺍﻣﻲ ﺧﻄﺒﺘﻠﻲ ﺑﻨﺖ ﺧﺎﻟﻲ ﻓﺎطمة .. آية ﻣﻦ ﺍﻟﺠﻤﺎﻝ ﺍﻟﻌﻴﻮﻥ ﺧﻀﺮ ﻭﺍﻟﺸﻌﺮ ﺍﺻﻔﺮ ﻭﺍﻟﻮﺟﻪ ﻣﺮﺍﻳﺎ .. مشيت لحوش ﺧﺎﻟﻲ ﻭﺧﻄﺒﺘﻬﺎ .. وجي وقت المقابلة الشرعية .. طلعت قعمزت جنبها متحشمة ومنزلة راسها ..
قيس : ما تحشميش مني خلاص اني قريت عليك الفاتحة يعني انت مرتي توا ..
فاطمة : انت كنت ﺍﻣﻨﻴﺘﻲ ﻭﺍﻟﻴﻮﻡ انت ليا يعني تحققت امنيتي ..
قيس ضحك : كنت نعلم بنظراتك وحبك ليا ﺑﺲ كنت لاهي في هالدنيا والشغل اللي فوق راسي وزي ماتعرفي اني راجل الحوش ..
فاطمة : اي حقا انت محجر بنت ﻋﻤﻚ وناهي عليها .. قيس : ﺍﻳﻲ ..
فاطمة : ﻟﺤﺪ ﺍﻻﻥ ..
قيس : ﺍﻱ ..
فاطمة : ناوي ﺗﺘﺰﻭﺟﻬﺎ امالا ..
قيس : ﺍﻱ ﻫﻬﻬﻬﻪ ..
فاطمة : باهي واني ..
قيس : خيرك انتي ..
فاطمة : كيف ﺗﺘﺰﻭﺝ عليا وتبين نقبلها ..
قيس : مش متزوجها توا اني .. ومش في ﺑﺎﻟﻲ اساسا ﺑﺲ لانها بنت ﻋﻤﻲ ﻭﻣﺎ نبيهاش تمشي ﻟﻠﻐﺮﻳﺐ .. مخليها ﺑﻜﻴﻔﻲ ..
فاطمة : ﻳﻌﻨﻲ مش ﻧﺎﻭﻱ ﺗﺘﺰﻭﺟﻬﺎ توا ..
قيس : ﻻ ﺍﻃﻤﻨﻲ ..
فاطمة قعدت تبتسم ..
قيس قعدت نضحك ع ابتسامتها : ﻟﻴﺶ تضحكي ..
فاطمة : قالولي ﻋﻠﻴﻚ ﻋﺼﺒﻲ وتكشخ ديما ..
قيس : ﻭﻗﺖ ﻋﺼﺒﻴﺘﻲ .. ﺗﻼﻓﻲ ﺷﺮﻱ .. ﻭ ﻭﻗﺖ ﻫﺪﻭﺋﻲ خوذي عيوني واللي تبيه مني ..
ﺿﺤﻜﺖ واني نشبحلها ﻭﻣﺒﺘﺴﻢ .. بنت ﺧﺎﻟﻲ متربية معانا وديما مع ﺧﻮﺍﺗﻲ اغلب وقتها تقضي فيه عندنا .. ﻓﻌﺎﺩﻱ واخذ ﻋﻠﻰ عيلتهم وهيا واخذة علي عيلتي ..
ﺑﻌﺪﻳﻦ ﺍﻟﺘﺤﻘﺖ بشغلي وكان ﻭﺿﻊ ليبيا ﻣﻦ ﺳﻲﺀ للأسوء .. الناتو هدد انه يقصف ليبيا وفعلا طلع القرار .. ﻧﻘﻠﻮﻧﻲ ﻣﻦ ﻣﺮﻛﺰ اللي اني فيه لعند طرابلس .. كان ﻻ ليلنا ﻟﻴﻞ ﻭﻻ نهارنا ﻧﻬﺎﺭ .. ﺟﻬﻮﺩ ﻣﻜﺜﻔﻪ .. ﺍﻟﻮﺿﻊ ﺻﺎﺭ خطير هلبا واعلنوا الحرب علينا وبدي القصف .. واعلن قرار الناتو بالقصف ..
جتنا اخبار بانه بيتم استهداف ﺍﻟﻤﺰﺭعة التابعة للعقيد وحياش صغاره .. مشينا ﻧﺴﺘﻔﻘﺪ ﺍﻟﻤﻜﺎﻥ واحني في الطريق شفت حوش عمي .. ﻗﺮﻳﺐ ﻣﻦ ﺍﻟﻤﺰﺭعة ﺑﻨﻔﺲ المنطقة .. ﻳﻌﻨﻲ ﻟﻮ ﺍﻟﻤﺰﺭعة ﺗﻌﺮﺿﺖ ﻟﻠﻘﺼﻒ ﻣﻤﻜﻦ ﻋﻤﻲ وعيلته يريحوا فيها .. خذيت السيارة ومشيت لحوش ﻋﻤﻲ .. خشيت لقيت ﻋﻤﻲ قاﻋﺪ .. ﺳﻠﻤﺖ ﻋﻠﻴﻪ صح انه فيه بينا ﺧﻼﻑ ﻭﻣﺎ موافقش يعطيني بنته .. ﺑﺲ في الاخر يقعد ﻋﻤﻲ ﻣﻦ ﺩﻣﻲ ﻭﻟﺤﻤﻲ والظفر ﻣﺎ يطلعش ﻣﻦ ﺍﻟﻠﺤﻢ ..
قيس : كيف ﺍﻻﺧﺒﺎﺭ وكيف الحال ..
ياسين : الحال الحمد لله و ﺍﻻﺧﺒﺎﺭ عندك .. ﺷﻮفت ﻋﻴﻨﻚ ﻋﻄﻠﺖ ﺍﻟﻤﺪﺍﺭﺱ ﻭﺍﻟﺠﺎﻣﻌﺎﺕ وقعدت ﺍﻧﻲ ﻭﻣﺮﺕ ﻋﻤﻚ والصغار قاعدين في الحوش ..
قيس : ﻋﻤﻲ راهو طرابلس مش امان توا والناتو ﻣﺴﺘﻬﺪف ﻣﺰﺭﻋﺔ العقيد ﻗﺮيبة من حوشك .. وتعرف انه حوشك قريب من مقرنا وقريب من معسكرنا وزي ماتعرف هاذا كله مستهدف ..
ياسين : ﻻ مافيش كدب الكلام هاذا المزرعة اللي جنبي ﻣﺎ فيها ﺷﻲ بيش يقصفوها ..
قيس : يا ﻋﻤﻲ ماهو اولاد واحفاد العقيد قاعدين في المزﺭعة .. والناتو اكيد عنده ﻋﻠﻢ ﺑﺎﻟﺨﺒﺮ ﺣﺘﻰ العقيد عطانا أمر ﻳﻄﻠﻌﻮا ويسيبوا ﺍﻟﻤﺰﺭعة .. ﻋﻤﻲ خوذ ﻋﻮﻳﻠﺘﻚ حتي انت واطلع .. راهو طرابلس بتحول ﻧﺎﺭ .. ياسين : وحوشي ..
قيس : في أﻣﺎﻧﺘﻲ ﺍﻧﻲ اهني قاعد في طرابلس .. سكره واعطيني ﺍﻟﻤﻔﺘﺎﺡ ﻭﻣﺎ نخليش حد يقرب منه .. توا نرفعك لحوش بوي تقعد مع بناويت خوك مافيش حد غريب وانت ﻋﻤﻬﻦ .. هذا الحوش امان ليك ولعيلتك .. هما ﻫﺪﻓﻬﻢ ﺳﻘﻮﻁ طرابلس وبس ..
عمي : ﺍﻧﺸﺎﻟﻠﻪ ..
قيس : توا لموا حوايجكم وحاجاتكم الضرورية واللي خايفين عليها .. خلي نطلعكم من طرابلس راهو الوضع معاش يطمن ومرات معاش تقدر تطلع ..
________________________________💔💔💔
ﻟﻤﻮا حاجاتهم وحوايجهم ﻭﻃﻠﻌﻮا .. شبحت لي منال فاتت جنبي .. شديت ﻳﺪﻫﺎ ..
قيس : البسي وشاح ﻭﺍﻃﻠﻌﻲ ﺍﻟﻄﺮﻳﻖ مش ﺍﻣﺎﻥ ..
منال : وانت شن دخلك ..
قيس دفيتها : ﻋﻤﻲ ﺣﺠﺒﻬﺎ .. ﻣﺎ عندناش مراة غادي مش متحجبة وتلبس هكي .. ﻭﻫﺎذﻱ ﺑﻨﺖ ﻋﻤﻲ ﻳﻌﻨﻲ ﻋﺮﺿﻲ ﻭﺍﻟﻨﺎﺱ غادي ﺗﻌﺮﻓﻨﻲ ﻭﺗﻌﺮﻑ ﺧﻮﺍﺗﻲ ﻣﺴﺘﻮﺭﺍﺕ ..
ياسين : يا ﺑﺎﺑﺎ ﺍﻟﺒﺴﻲ ﺣﺠﺎﺏ ..
هيا مابتش ﻋﺎﻧﺪﺕ مشت ﺍﻣﻬﺎ ﺟﺎﺑﺖ الوشاح وخلاته علي ﺭﺍﺳﻬﺎ ..
امل : ﺍﻣﺸﻲ مش ناقصين ﻋﻨﺎﺩك توا .. خلي ننجوا ﺑﺎﺭﻭﺍحنا ..
ولعت ﺍﻟﺴﻴﺎﺭة وطلعنا .. هلبا بوابات توقف فينا .. ولما نوريلهم رتبتي يطلعونا .. شبحت لي منال .. لقيتها تشبح ﻟﻌﻴﻮﻧﻲ في اﻟﻤﺮﺍﻳﺎ .. ﺍﺑﺘﺴﻤﺖ .. ﺩﺍﺭﺕ وجهها ﺑﺘﻜﺒﺮ .. عطك ﻣﺮﺽ تحسابيني ميت ع هالخليقة .. طبعا قلت الكلام هذا ﺑﺪﺍﺧﻠﻲ .. ﻭﺻﻠﺘﻬﻢ قريب من المدينة ..
قيس : ﻋﻤﻲ من هنايا تقدر تكمل وتوصل لحوشنا اكيد تعرفه وين ..
ياسين : ﺍﻱ ﻧﺸﺎﻟﻠﻪ ..
قيس : ﺍﻧﻲ توا نكلم ﻋﻤﻲ منصور ﻳﺴﺘﻘﺒﻠﻚ ..
ياسين : سامحني وليدي نعرفك ماتقصر تعبتك معانا ..
قيس : ولو انت عمي وواجبي هذا مادرت شي ..
خليته ﻭﺭﺟﻌﺖ ﻟﻠﻤﻘﺮ متاعي .. كلمت ﻋﻤﻲ منصور ع التلفون الارضي ردت عليا مراته ..
قيس : اهلين عمتي .. ﻋﻤﻲ ﻳﺎﺳﻴﻦ ﺟﺎﻳﻜﻢ في اﻟﻄﺮﻳﻖ قولي لي ﻋﻤﻲ ﻳﺴﺘﻘﺒﻠﻪ ..
مرت عمي : ادلل اكيد توا نقوله ..
سكرت الخط .. قعدت في اﻟﻤﻘﺮ و ﺍﻟﺨﻮﻑ بياكلنا .. في الليل داروا علينا ﻏﺎﺭة .. خذينا ﺳﻼحنا ﻭﻋﺘﺎﺩنا ووقفنا .. ﺑﺲ ﻣﺎ نقدروش .. ﻫﺠﻮﻣﻬﻢ قوي واحني ﻣﺎ عندناش ﺍﻻﻣﻜﺎنيات بيش نواجهوهم .. ﺑﺪي ﺍﻟﻘﺼﻒ ﻳﻀﺮﺏ ﻭﺍﻟﺼﻮﺕ مرعب .. ﺗﻜﺎﺩ ﺍﻟﻘﻠﻮﺏ ﺗﺼﻞ الي ﺍﻟﺤﻨﺎﺟﺮ .. ﻣﻦ ﺷﺪﺓ ﻫﻮﻝ ﺍﻟﻤﻮﻗﻒ .. كانوا ﺍﻟﻀﺒﺎﻁ ﺍﻟﻜﺒﺎﺭ ﻳﺪﻋﻤﻮا فينا ويشجعونا ﺑﺎﻟﻤﺪﺡ ﻭﺍﻟﺸﻌﺎﺭﺍﺕ ﺍﻟﺤﺮﺑﻴﻪ .. قعدنا نهتف ونشجعوا ﺑﻌﺾ ..
لا اله الا الله الله .. ﻣﻨﺼﻮﺭين بعون الله ..
بالروح بالدم نفديك يا ليبيا
قعدنا نهتفوا ع خاطر نشجعوا ﺍﻟﺠﻨﺪﻱ ﻭﺍﻟﺸﺮﻃﻲ اللي خايف ﺣﺘﻰ ﻟﻮ جانا ﺍﻟﻤﻮﺕ ﻧﻤﻮتوا ﺑﻌﺰﻡ مش ﺑﺨﻮﻑ ... ﺍﺳﺘﻤﺮ ﺍﻟﻘﺼﻒ ﺳﺎﻋﺎﺕ ﻃﻮﻳﻠﻪ .. ﻳﻘﻄﻊ ﻭﻳﺮﺟﻊ . قعدنا ﺍﻳﺎﻡ و ﺍﻧﻘﻄﻌﺖ ﺍﻟﺨﻄﻮﻁ ﺣﺘﻰ ﻣﺎ قدرتش نكلم ﺍﻫﻠﻲ بيش نطمنهم عليا .. نعلم انه امي توا قلبها اكيد نار .. تفكيري قعد مع ﺍﻫﻠﻲ وتعلقت ﺭﻭﺣﻲ فيهم .. ونفكر ﻟﻮ ﻣﺘﺖ ﻣﻨﻮ بيقعد ﻟﺨﻮﺍﺗﻲ .. بالسيف قدرت ناﺧﺬ ﺍﻻﺫﻥ ﺑﺎﻻﺗﻔﺎﻕ مع ﻋﻘﻴﺪ وبعد الف حيلة بيش وافق .. خذيت السيارة وطوالي لحوش ﺍﻫﻠﻲ .. طقيت ﺍﻟﺒﺎﺏ .. فتحت اختي اخلاص وقعدت تعيط و ﺗﺒﻮﺱ فيا .. ﺟﺖ ﺍﻣﻲ تبكي وقعدت تحضن فيا ..
خيرية ( ام قيس ) : ياوليدي ﻳﺎ ﺷﻤﻌﺔ حوشي والله ﻣﺎ قدرت نغمض ﻋﻴﻨﻲ واني قلبي ﻧﺎﺭ ﻋﻠﻴﻚ ..
قيس ﺑﺴﺖ ﻳﺪﻫﺎ ﻭﺭﺍﺳﻲ : اني كويس يماا ﺑﺲ نبي نرﺗﺎﺡ .. ﺟﺖ ﺍﺧﺘﻲ احلام ..
احلام : ﺧﻮي انت خش دوش واني توا نوتيلك حوايجك ..
قيس شبحت لقيت ﻣﺮﺕ ﻋﻤﻲ ﻳﺎﺳﻴﻦ واقفة : ﻫﺎ ياعمتي امل كيف حالك ..
امل : حمد لله ع سلامتك اوليدي كويسة بخير والحمد والشكر لله ..
قيس : امالا وين ﻋﻤﻲ ﻳﺎﺳﻴﻦ مش قاعد وماجانيش .. امل : ﻃﻠﻊ مشي لي ﻋﻤﺎﻣﻚ يشوف فيهم ..
قيس : ﺧﻴﺮ ﺍﻧﺸﺎﻟﻠﻪ ..
اﺣﻼﻡ : نوض قيس وتيتلك حوايجك في اﻟﺤﻤﺎﻡ نوض دوش ..
قيس : صحيتي اوخيتي تعبتك معاي .. ﻣﺸﻴﺖ ﻟﻠﺤﻤﺎﻡ ..
شبحت لدار جميلة ﺍﺧﺘﻲ .. فيها ﻭﺣﺪة ﻓﺎتحة الروشن و واقفة ﻭﻻبسة قفطان قصير للركبة ومن دون وشاح .. تكنطيت ..
قيس وبصوت عالي : منو هاذي اللي فاتحة الروشن سكري النمي .. لفت وجهها .. منال هاذي ﺍﻧﺘﻲ ..
منال : ﻻ ظلها ..
قيس : ﻣﻤﻨﻮﻉ تفتحي الروشن وتشبحي وانتي مش لابسة شي ع راسك وقفطانك مش مستور .. ﻋﻴﺐ ﺍﻟﻨﺎﺱ ﺗﺸﻮﻑ في نساوينا طالعات هكي ﻟﻠﺸﺎﺭﻉ ..
________________________________💔💔💔
منال .. ﻣﺎ ﺭﺩيتش عليه ﺩﺭﺕ ﻭﺟﻬﻲ سكرت الروشن وقعمزت .. وبيني وبين نفسي 💭 ﻳﺎﺭﺑﻲ استاحشت ﻋﻤﺮ هللللبا و ﺧﺎيفة ﻋﻠﻴﻪ .. نحس في روحي اهنايا مخنوقة كأني في حبس خاطري نرجعوا لطرابلس .. امتي تكمل هالحرب .. ﺍﻭﻭﻭﻑ .. ﺟﺖ ﺍﻣﻲ ..
أمل : بنتي ﻏﻴﺮﻱ حوايجك ولد عمك قيس جي ..
منال : ﺍﻱ ﺷﻔﺘﻪ قبل شوي ..
أمل : ﺍﻱ امالا ﻏﻴﺮﻱ قفطانك ﻋﻴﺐ تمشي هكي قدامه ﻭﻫﺬﺍ ﻗﺼﻴﺮ .. تشوفي فيهن ﻛﻠﻬﻦ ﻣﺴﺘﻮﺭﺍﺕ ﻭﻻﺑﺴﺎﺕ قفاطين طوال ..
منال : يعني يا ﻣﺎﻣﺎ تبيني نلبس زيهن ..
أمل : ﻣﺪﺍما قاعدين عندهم ﺍﻱ … ﻻﺯﻡ ﻧﻤﺸﻲ ﻋﻠﻰ ﻋﺎﺩﺍﺗﻬﻢ احسن ﻣﺎ ﻧﺤﺴﺴﻬﻢ انه احني ﺟﺎﻳﻴﻦ ﻣﻦ ﻛﻮﻛﺐ ثاني ..
منال : ﻭﺍﻟﻠﻪ ماني مغيراته خليهم اللي بيقولوه يقولوا ..
أمل : ما ﺗﻌﺎﻧﺪيش راهو تشوفي مني اسلوب ثاني معاك ومايعجبكش ..
منال : ﺍﻭﻭﻭﻑ ياماما نبي نروح مليت ..
طلعت وخلتني ..
ﻟﺒﺴﺖ توتة حمرة واسعة شوي ﻧﺺ كم .. نشبح لروحي في المرايا وقلت اممم ﺣﻠﻮة طالعة عليا ..وقفت ع المغسلة وقعدت نمشط في ﺷﻌﺮﻱ ..
قيس ﻓﺘﺢ ﺑﺎﺏ ﺍﻟﺤﻤﺎﻡ : ﺍﺣﻼﺍﺍﺍﺍﻡ المنشف ..
شبحت لقيت المنشف قدامي معلق سحبته .. ومديتله ﻳﺪﻱ وعطيتهوله .. ﻃﻠﻊ ﺭﺍسه شاف لقاني ﺍﻧﻲ .. خذي المنشف ﺑﺴﺮعة وسكر ﺍﻟﺒﺎﺏ .. ﻟﻔﻴﺖ ﺷﻌﺮﻱ فوق .. جيت بنمشي ﺍﻧﻔﺘﺢ ﺍﻟﺒﺎﺏ .. ﺩﺭﺕ ﻭﺟﻬﻲ .. ﻻﺑﺲ كنتيرة داخلية ﺳﻮﺩة وسروال توتة اسود والمنشف ﻋﻠﻰ ﺭﺍﺳﻪ ..
قيس : لو مافيها تعب عليك قولي ﻟﻮﺣﺪة ﻣﻦ ﺧﻮﺍﺗﻲ الغدي ﺑﺴﺮعة لاني جيعان ..
ﻫﺰﻳﺖ ﺭﺍﺳﻲ ﻭﻣﺸﻴﺖ .. خشيت للمطبخ لقيت ﺍﺣﻼﻡ موتية الصفرة وولدها في حضنها ..
منال : قيس يبي الغدي ﺑﺴﺮعة ..
احلام : بالله عليك ارفعيله الصفرة .. ﺍﻟﻔﺮﺥ هذا من بكري يعيط جيعان خلي انرضعه ..
قامت الصفرة وحطتها بين ايديا .. ﻟﻮﻭﻭﻭ نموت مانرفعله الصفرة لعنده شنو خدامته اني .. ﻃﻠﻌﺖ لقيت جميلة ..
منال : جميلة هاك ارفعي الغدي لي قيس ..
جميلة : تلقيه مقعمز في داره ارفعيهوله وما تتحشميش .. وخلتني ﻭﻣﺸﺖ .. شوي وسمعته يعيط ..
قيس : يافرخات وين الغدددددي خلي نتسمسم لقمتين ونتمرقد لانه ﺗﻌﺒﺎﺍﺍﺍﺍﺍﺍﻥ ..
ﻳﺎ ربي كيف بنخش عليه وهو متعصب هكي .. ﻃﻠﻌﺖ أخته اخلاص ..
اخلاص : من جدددك واقفة وصفرة الغدي في يدك وتسمعي فيه يعيط .. ﻣﺎﺕ ﻣﻦ ﺍﻟﺠﻮﻭﻭﻭﻉ ﺍﻣﺸﻲ ﺗﺤﺮﻛﻲ ارفعيهوله قبل ما يبرد ..
منال : ﺍﻱ ﺍﻧﺸﺎﻟﻠﻪ .. خشيت كان مقعمز و متربع ع الارض .. ﻓﺎﺗﺢ ﺍﻟﺘﻠﻔﺰﻳﻮﻥ و يتفرج ع الاﺧﺒﺎﺭ .. ﺍﻭﻝ ماخشيت عيط ..
قيس : معقولة غدي ﺳﺎعة .. ﺩﺍﺭ وجهه لقاني قدامه .. ﻫﺎﺍ شني مافيش حد غيرك يجيبه ..
منال : ماتبيشي نرده ..
قيس : حطي الصفرة اهنايا ..
حطيتها وجيت بنطلع ﺷﻔﺖ ﺍﻟﺘﻠﻔﺰﻳﻮﻥ جايبين ﺍﻟﺠﺎﻣﻊ ﺍﻟﻘﺮﻳﺐ ﻣﻦ مدرستنا قاصفينه وطايح .. عيطت ﻳﺎﺍﺍﺍ حليلي ﻫﺬﺍ ﺍﻟﺠﺎﻣﻊ جنب حوشنا .. ﺗﻘﺮﺑﺖ ﻟﻠﺘﻠﻔﺰﻳﻮﻥ نشبح .. ﻳﺎ ﺍﻟﻠﻪ كيف مدمر ياحليلي ماكان حوشنا ﺭﺍﺡ فيها .. سترك يا رب ..
قيس : هييييي يافرخة انتي بعدي شوي خلي نتفرج .. واقفة قدام ﺍﻟﺘﻠﻔﺰﻳﻮﻥ .. زي الفيل مغطايته كله ..
منال ﺩﺭﺗﻠﻪ ﻭﺟﻬﻲ : ﻟﻴﺶ ﺗﻐﻠﻂ عليا توا ..
قيس : ﻣﻨﻮ كلمك انتي .. اني نقصد ع اللي واقفة قدام ﺍﻟﺘﻠﻔﺰﻳﻮﻥ ﻫﻪ .. وطبست ناكل و ﻣﺒﺘﺴﻢ ..
منال : ﻣﻠﻴﻖ ..
________________________________💔💔💔
قيس .. ﺍﻭﻝ كاشيك كسكسي حطيته في فمي .. وقالت ﻣﻠﻴﻖ ﺿﺮﺑﺖ الكاشيك ع الصفرة وتنطر : ﺫﻛﺮﻳﻨﻲ ﺑﻴﻬﺎ شن معناها ﻣﻠﻴﻖ ..
منال ﺩارﺗﻠﻪ وجهها هكي 😏 وجت بتطلع ..
قيس : ﺟﻴﺒﻴﻠﻲ الكاشيك تنطر مني غادي ..
منال : نوض جيبه بروحك ..
قيس : انتي ضيفة في حوشي و ﻣﺎ نبيش نهينك .. ﺟﻴﺒﻴﻬﺎ بهدوء احسنلك ..
مشت جابتلي الكاشيك ومدتهولي .. خذيت الكاشيك وشديت يدها وقعدت نشبح لعيونها اللي معذباتني ..
قيس : ﻟﻴﺶ تقوليلي ﻣﻠﻴﻖ ..
منال : ﺍﺣﺴﻦ ﻭﺍﺑﺘﺴﻤﺖ .. وتشح في يدها ﻣﻨﻪ .. هذا خيره قعد مبتسم .. تبي تغير ﺍﻻﺑﺘﺴﺎمة ﻭﻫﻮ زاد شد ﻳﺪها ﻭﻣﺒﺘﺴﻢ ..
قيس : صار اني ﻣﻠﻴﻖ ..
منال : ﺍﻱ ﻭﻫﺬﺍ اكبر ﺩﻟﻴﻞ بعد ﻳﻴﻴﻴﻴﻴﻴﺪﻙ ..
قيس : ﻣﻨﻮ ﻫﺬﺍ ﻋﻤﺮ ..
منال واني نبعد في ﻳﺪﻩ وسمعت اسم ﻋﻤﺮ رفعت ﺭﺍﺳﻲ ﺑﺴﺮعة ﻭﻓﺘﺤﺖ ﻋﻴﻮﻧﻲ : منوووو ...
قيس : ﻋﻤﺮ ولد ﺍﻻﺳﺘﺎﺫ ﺣﺴﻦ شن قصتك معاه ..
منال : ﻡ ﻡ ﻣﻤﺎ ﻣﺎ نعرفاش ﻣﺎ نعرفاش ..
قيس : واضح ﻣﻦ ﺍﻟﻤﺌﻤﺌﻪ متاعك ماتعرفيشي .. توا في بالك تقولي ﻫﺬﺍ من وين ﻳﻌﺮﻓﻪ .. ﻭﺍﻧﻲ من توا نقولك النملة ﺍﻟﻠﻲ تفوت ﻣﻦ تحتي نعرفها شنو ادير .. يعني ما ﺗﺘﻮقعيش اذا ﺍﻧﻲ اهني ﻭﺍﻧﺘﻲ في طرابلس انه اني ﻣﺎ نعرفش ﺍﻧﺘﻲ شن اديري او ع شنو ناوية .. هذيكا ﺍﻟﻤﺮة لما سمعتك تكلمي في ﻭﻟﺪ .. خذيت ﺍﻟﺮﻗﻢ ﺍﻟﻠﻲ تتصلي بيه .. ورفعته ﻟﺸﺨﺺ ﺻﺪﻳﻖ ﻋﺮﻓﻠﻲ ﺻﺎﺣﺐ ﺍﻟﺮﻗﻢ .. دورت منو ﺻﺎﺣﺒﻪ .. ﻃﻠﻊ ﺍﺳﻤﻪ ﺣﺴﻦ ﺻﺎﺩﻕ ﺍﺳﺘﺎﺫ ﺟﺎﻣﻌﻲ .. ﻋﻤﺮﻩ فوق ﺍﻝ 50 سنة .. ف سألت ع عيلته ﻭﻋﺮﻓﺘﻬﻢ .. عرفت انه ولده الكبير ﺍﺳﻤﻪ ﻋﻤﺮ .. في الليل و ﺍﻟﺴﺎﻋﻪ 1 ﺍﺗﺼﻠﺖ بيه .. رد عليا ﺍﻟﻮﻟﺪ .. ﻋﺮﻓﺘﻪ هو ﻧﻔﺲ ﺍﻟﺼﻮﺕ ﺍﻟﻠﻲ ﺍﻧﺘﻲ كنتي تحكي معاه ..
منال : ما كلمتاش اني ..
قيس : اكذبي ع الكل بس مش ع الشرطي وخصوصا ﻭﺍﺣﺪ زي اني ﺑﺎﻟﺬﺍﺕ ماتقدريش نعرف الكذب ﻣﻦ عيونك .. ﻣﻨﻮ هاذا عمر وشن علاقتك بيه ..
منال قعمزت جنبه : شن تبي ﻣﻨﻲ انت فهمني .. مش خطبت انت .. خليني في حالي ﺣﺮﺍﻡ ﻋﻠﻴﻚ .. ﺍﻧﻲ ﻣﺎ نبيكش وما نحبكش ومش طايقة العيشة معاكم ..
قيس : سألت ﺳﺆﺍﻝ ما ﺗﺘﻬﺮبيش ﻣﻨﻪ واطلعيلي في ﺩﻣﻮعك .. شديتها ﻣﻦ ﻳﺪﻫﺎ .. ﺍﻧﺘﻲ بنت ﻋﻤﻲ ﻳﻌﻨﻲ ﻋﺮﺿﻲ وشرفي .. كيف تبيني نقبل انه عرضي وشرفي ﻳﻠﻌﺐ ويمرح ﺑﻜﻴﻔﻪ ..
منال : ﺷﻨﻮ انت ماتلعبش وماتمرحش ﺑﻜﻴﻔﻚ .. ﻋﻠﻴﻚ ﺣﻼﻝ وعليا ﺣﺮﺍﻡ ..
قيس : اني راجل ومايعورني شي وما ننعابش ﻟﻮ ﻟﻌﺒﺖ ﻭﺳﺮﺣﺖ ﻭﻣﺮﺣﺖ مافيش ﺣﺪ يقدر يقولي انت ﻏﻠﻄﺖ .. ﻣﺎ ننكسرش وما ﺗﺘﺸﻮهش ﺳﻤﻌﺘﻲ .. ﺑﺲ انتي بنت تعرفي ﺷﻨﻮ يعني بنت انتي زي المرايا .. لو ﺍﻧﻜﺴﺮﺕ ﻟﻮ ترقعيها ﺑﺄﻟﻒ لصقة ماتتصلحش ﻭﻻ ترجع ..
اني قاعد نحكي معاها وخشوا صغار ﺍﺧﺘﻲ تكنطيت ﺍﻃﻠﻌﻮ ﺑﺮﺍﺍﺍ .. اﻃﻠﻌﻮااا .. اسمعيني كويس انتي يافرخة بالذااات امشي كويس احسنلك والا وربي والمصحف موتك ع ايديا كنهذا ..
منال : انت فهمني شنو دخلك .. مش ﻋﺎﻳﺶ ﺣﻴﺎﺗﻚ زي ماتبي وبتتزوج .. ﻓﻚ تحجيرك عليا وخليني حتي اني نتزوج ﺍﻟﻠﻲ نبيه زي ﻣﺎ انت بتتزوج وتتهني مع ﻏﻴﺮﻱ ..
قيس : ياربي ﺍﻧﺘﻲ قداش غبية .. كيف تقولي هكي قدﺍﻣﻲ .. اني نتزوج اللي نبيها .. وانتي ماتتحشميش مش خايفة توا نكسرلك فمك .. كيف تقولي قدامي نتزوج اللي نبيه .. اني خلاص حجرتك ومستحيل نخليك .. يعني مسكر راسي ع الشي هاذا خصوصا بعد ماحبيتك وعشقتك انتي ملكي خلاص .. واسألي ﻋﻠﻰ الراجل منا لما يعشق كيف .. ﻣﺎ يتخلاش ع الشي اللي ملكه لعند موته ..
منال : ﻫﻬﻪ عشق وحب .. ﻟﻴﺶ انت ﺗﻌﺮﻑ تحب .. ﺍنت ﻣﺎ ﻋﻨﺪكش ﻏﻴﺮ انك ﺗﺄﻣﺮ وتعيط ﻭﻳﺠﻴﻚ كل شي ع الجاهز والمراة ﻻﺯﻡ تقعد ﺧﺪﺍمة تحت رجليك .. زي ماولت احنينة ﺧﺪﺍمة ﻋﻨﺪ جدي ..
قيس : يعني الكلام هذا تربايت حناك .. معناها ﻣﺎ قالتلكش كيف ﺟﺪﻱ ﻛﺴﺮ ﻛﻠﻤﺔ ﺑﻮﻩ ع خاطرها .. ماقالتلكش انه سيب نساوينه ع خاطرها وظلمهم .. ﺑﺲ هيا تبي تكسرله راسه قدام القبايل ﻭﺗﻜﺴﺮ ﻛﻠﻤﺘﻪ .. واحني عندنا كلمتنا ﺍﻏﻠﻰ ﻣﻦ دمنا .. ﻳﻨﻬﺪﺭ ﺩﻣﻨﺎ وما ﺗﻨﻜﺴﺮش كلمتنا .. ﻭﺍﻧﺘﻲ زي حناك .. ﻣﺎ ﻋﻨﺪكش ﺍﺣﺘﺮﺍﻡ ﻭﺗﻘﺪﻳﺮ ﻟﻌﺎﺩﺍتنا ولتقاليدنا ولاهلنا ..
اني قاعد نحكي خشت ﻓﺎﻃﻤﻪ ﺧﻄﻴﺒﺘﻲ .. ناضت منال ﺑﺴﺮعة .. ﺟﺖ ﺳﻠﻤﺖ عليا وتشبح لي منال .. ﻭﺟﻮ ﻫﻠﻬﺎ وﺳﻠﻤﻮا عليا .. وقعمزوا .. ﺍﻧﻲ ﺭﺟﻌﺖ ناكل .. قعمزت ﻓﺎﻃﻤﻪ وخواتي ﻭﺧﻮﺍﺗﻬﺎ يهدرزن جنبي .. ﻛﻤﻠﺖ ﺍﻻﻛﻞ ..
قيس : اخلاص قيمي الصفرة الحمد لله شبعت ..
اخلاص : حاضر هي ..
جت جنبي ﻓﺎﻃﻤﻪ ..
فاطمة : استاحشتك ..
قيس : ﺷﻜﺮﺍ تستاحشك العافية ..
فاطمة : خيرك شن فيه شنو اللي مضايقك ..
قيس : مافي ﺷﻲ ﺑﺲ ﺗﻌﺒﺎﻥ مالياش ﺳﺎعة مروح ..
حطيت المخدة ﻭﺗﻤﺪﺩﺕ .. خشت منال .. ﺟﺎﻳﺒﻪ العصير .. وقعدت اتضيف فيهن ..
ﻣﺮﺕ ﺧﺎﻟﻲ : ﻣﻨﻮ ﺍﻟﺤﻠﻮة هاذي ..
ﻣﺮﺕ ﻋﻤﻲ ﻳﺎﺳﻴﻦ : ﻫﺎذﻱ منال ﺑﻨﺘﻲ الكبيرة ..
مرت خالي : بسم الله وتبارك الرحمن .. ندور في بنية لي وليدي محمد شن رايك تعطيهولنا ..
اخلاص : يا خااااالتي .. ﻭﺍﺷﺮﺗﻠﻬﺎ عليا .. هاذي هيا منال ﻧﻔﺴﻬﺎ ﺍﻟﻠﻲ حجرها قيس ..
مرت خالي : ﻳﺎﺍﺍﺍﺍ ﻭﺍﻟﻠﻪ ﻣﺎ نعلمش انه هيا ﺍﻟﺴﻤﻮحة هاذي ..
قيس ﺭﻓﻌﺖ ﺭﺍﺳﻲ : الحوش قداش كبير يعني مالقيتوش مكان تلتموا وفيه وتهدرزوا ﺍﻻ جنب راسي ﺗﻌﺒﺎﻥ ﻭﺍﻟﻠﻪ ياناس نبي نرتاح ..
مرت خالي : ﺍﻱ ﻭﺍﻟﻠﻪ ﺣﻘﻚ ..
ناضن من جنبي .. وسكرن ﺍﻟﺒﺎﺏ ﻭﺭﺍﻫﻦ .. قعدت نتفرج ع الاخبار ﻭﺷﻮﺷﺖ ﺍﻟﻘﻨﺎﺓ عرفت انهم قصفوها .. ﻏﻔﻴﺖ لعند العصر ونضت .. بدﻟﺖ حوايجي .. ﻭﻃﻠﻌﺖ لقيت ﻋﻤﻲ ﻳﺎﺳﻴﻦ ﺟﺎﻱ .. ﺳﻠﻤﺖ ﻋﻠﻴﻪ وقعمزنا نهدرزوا .. و وصينا ﻋﻠﻰ شاهي وقعدنا نشربوا .. هرب الضي واحني مقعمزين نحكوا .. ناديت علي خواتي .. وقتلهن يوتن الشماعي ولامبات الشحن ولامبات القاز لانه في عجز في شركة الكهرباء واحتمال ينقطع بالايام .. طلعت اني و ﻋﻤﻲ ومشيت انلف ع عمامي ﺳﻠﻤﺖ ﻋﻠﻴﻬﻢ ﻭﺯﺭﺗﻬﻢ ﻭﺷﻔﺖ شن فيه وشن مافيه وروحنا للحوش في الليل .. لقيت الحوش ظلام .. والنساوين مفرشات برا في الجنان ومقعمزات يهدرزن ..
قيس : ﻫﺎﺍﺍﺍ ﺍﻟﻴﻮﻡ توا تموتوا من النو ..
ﺍﻣﻲ : ياولدي كان جت ع النو ساهلة .. ﺍﻟﻠﻪ يصبر ويعوض ﺍﻟﻨﺎﺱ ﺍﻟﻠﻲ انهدمت احياشها ﻭﺍﻟﻠﻲ ضاع ﺷﺒﺎﺑﻬﺎ ﺍﻟﻴﻮﻡ .. ﺍﻟﻠﻪ ﻻ تسامح من كان السبب ..
قيس : ﺍﻧﺸﺎﻟﻠﻪ اميمتي ﻣﻨﺼﻮﺭﻳﻦ ﺑﺄﺫﻥ ﺍﻟﻠﻪ ..
قعمزت ﺍﻧﻲ ﻭﻋﻤﻲ معاهن .. وقعدنا نحكوا في قصص ﺍﺟﺪﺍﺩنا ﻭﺍﻣﻲ تهدرزلنا ﻋﻠﻴﻬﻢ .. ﻭﻛﻞ حد يحكي قصة .. لمة ﺣﻠﻮة .. شوي وقعمزت ﻭﺣﺪة جنبي .. وحطت ﻳﺪﻫﺎ ﻋﻠﻰ ﺭﺟﻠﻲ .. شبحت .. لقيتها ﻓﺎطمة حضنتها ولفيتها بيد وحدة ..
قيس : ﻫﺎﺍﺍ استاحشتيني .. ﻭﺿﺤﻜﺖ ..
فاطمة : بعد يدك توا امك او حد يشوفنا ..
قيس : والله ﻣﺮﺗﻲ ﻫﻬﻬﻪ ..
فاطمة : شن عندك مع منال الظهر كنت تحكي معاها ..
قيس : مافي شي كلام وبس ..
فاطمة : وشنو هو ..
قيس : مايخصكش .. بعدت وجهها متكنطية .. اشبحيلي جاي واسمعيني .. منال بنت ﻋﻤﻲ ﻭﺣﺎجرﻫﺎ اذا مش ﺍﻟﻴﻮﻡ غدوا نتزوجها .. اذا انتي تقدري وتتقبلي وتتحملي براحتك .. واذا ماتتحمليش ومش قادرة تتقبلي الفكرة براحتك ﻣﻦ توا ننهوا القصة ونفسخوا ..
فاطمة : لكن اني نحبك ..
قيس : واني ﻣﺎ قلتش نكرهك .. ﺑﺲ ﺗﻌﻠﻤﻲ كيف ﺗﺤﺘﺮﻣﻴﻨﻲ وتحترمي ﻣﺘﻄﻠﺒﺎﺗﻲ .. اني راجل لو نمشي في الشارع الناس تجي تعرض عليا في بناتهم بيش نتزوجهم .. ﻫﺬﺍ ﺷﺮﻉ ربي ﻣﺤﻠﻞ 4 .. واني نبي ﻧﻜﺜﺮ نسبنا وخصوصا اني ﻣﺎ ﻋﻨﺪيش ﺍﺥ .. نبي نجيب اولاد يحملوا ﺍﺳﻤﻲ .. وينذاع صيتي ﺑﻴﻬﻢ .. ﺟﺪﻱ ﻟﻮ ﻣﺎ ماتزوجش ﻋﻠﻰ ﻣﺮﺗﻪ ﺍﻻﻭﻟﻰ راهو لا جي ﺑﻮﻱ ولا جو اﻋﻤﺎﻣﻲ .. واهو تشوفي ﺍﺳﻤﻪ ينذكر ﻟﻠﻴﻮﻡ .. والسبب زيجاته و ﻛﺜﺮة اولاده ﻭﻛﺜﺮة ﺍﻫﻠﻪ ﻭﺳﻤﻌﺘﻪ .. ﺳﻜﺘﺖ .. ونادتها ﺍﻣﻬﺎ انهم بيروحوا .. سلموا علينا وروحوا .. كلمت خواتي وقتلهن ﺭﺷﻦ ﺍﻟﺴﻄﺢ امية وفرشونا خلونا نرقدوا ﻓﻮق ..
خليتهم ﻭﻃﻠﻌﺖ جنب ﺟﻤﺎﻋﺘﻲ نهدرزوا ونحكوا ع الوضع .. في الليل موخر روحت للحوش ظلام بالسيف نقدر نشبح من ضي القمر اللي جاي ﻣﻦ ﺑﺎﺏ ﺍﻟﺴﻄﺢ ..
خشيت ﻟﻠﺤﻤﺎﻡ .. دوشت .. ﻭﻃﻠﻌﺖ في الدار بشرط ... نبي نغير .. جيت بنخش ﺍﻧﻀﺮﺑﺖ ﺑﺸﺨﺺ عيطت ..
منال : يا ﻣﺎﺍﺍﺍﺍﺍﻣﺎ تعااالي اني خاااااايفة ..
قيس : اسسسسسسس ﻟﻤﻴﺘﻲ ﺍﻟﺠﻴﺮﺍﻥ بصوتك .. وحطيت ﻳﺪﻱ ﻋﻠﻰ فمها والدنيا ظلام ..
منال : قيس بعد من عليا ..
قيس : ﺍﻣﺸﻲ اركبي فوق مع البنات ..
منال : من بكري نبي نركب وماعرفتش من وين وكيف حوشكم كبير هلبا ..
قيس : وليش ﻧﺰﻟﺘﻲ في الاساس ..
منال : كنت نبي ﺍﻟﺤﻤﺎﻡ ..
قيس : اوووف خليك اهني في مكانك وما تتحركيش .. ﺑﺲ نلبس حوايجي ونجيك ..
منال : ﺷﻨﻮﻭﻭﻭ ..😨
ضحكت .. وخشيت للدار نتلمس في ﺍﻱ ﺷﻲ ﻟﺒﺴﺖ ﻭﻃﻠﻌﺖ نشوف في ظلها .. شديتها ﻣﻦ ﺯﻧﻮﺩﻫﺎ .. انخلعت ..ماتخافيش ﻫﺬﺍ اني .. ﺷﻨﻮ مش مولعات الشموع واللامبات والفوانيس .. قبل مانطلع وصيتهن ..
منال : رقدوا ﻛﻠﻬﻢ وطفوهم .. ﺑﺲ ﺍﻧﻲ نبي الحمام ماتحملتش ﻭﻧﺰﻟﺖ .. لكن ماعرفتاش وين ..
قيس شديت يدها وسحبتها ﻭﺧﻠﻴﺖ يدها ﻋﻠﻰ ﺑﺎﺏ ﺍﻟﺤﻤﺎﻡ : ﻓﻮﺗﻲ ﻫﺬﺍ ﺍﻟﺤﻤﺎﻡ ..
منال : ما تمشيش بالله عليك نخاااف ..
قيس ﺿﺤﻜﺖ قداش ما انها صغيرة وبريئة : اهو قاعد واقف خوذي راحتك وما ﺗﺨﺎفيش ..
منال : اوف ياربي نسيت انه عندكم هلبا صراصير .. قيس : ﻳﻴﻴﻴﻴﻴﻴﻲ شوفي قداش فيه منه ﻛﻮﻣﻪ تقول ﺟﻴﺶ .. خبطت باب الحمام ﻭﻃﻠﻌﺖ تعيط ..
منال : ﻻ ﻻ يامامي نخاف ..
قيس ﺿﺤﻜﺖ ﻣﻦ ﻛﻞ قلبي : هههههه نبصر نبصر خشي ﻭﺍﻟﻠﻪ مافيه حاجة ..
منال : وكان طلعلي ..
قيس : اعطيهولي واني ناكله قدامك ..
منال : ﺍﻳﻴﻴﻊ مصح وجهك ..
قيس : ع منو مصح وجهك يافرخة .. خشت ﻟﻠﺤﻤﺎﻡ ﻣﺎ ﺭﺩتش .. ﺑﻌﺪﺕ ﺷﻮية من ع ﺍﻟﺒﺎﺏ .. خذيت طرف دخان وقعدت ندخن ﻛﻤﻠﺖ .. وﻃﻠﻌﺖ ..
منال : ﻛﻤﻠﺖ ..
قيس : ﻳﺎ ﺻﻠﻮﺍﺕ ﻋﻠﻰ ﻣﺤﻤﺪ واخيرا ﻓﻀﺖ .. ﺟﺖ ﺗﻘﺮﺑﺖ ﻣﻨﻲ وشدت ايديا ..
منال : ﺍﻧﺪﻟﻴﺘﻚ ﻣﻦ ريحة دخانك ..
قيس : ﻫﺎﺍﺍﺍ ﻭﺍﻟﻠﻪ ﺍﻛﺘﺸﺎﻑ ﻣﻬﻢ .. امشي انتلفي قدﺍﻣﻲ ﺍﻣﺸﻲ .. شديت ﻳﺪﻫﺎ .. وركبنا فوق ..
منال : دروجكم عاليات بالسيف تقدر تركبهم ..
قيس : انقيمك .. ﺳﻜﺘﺖ .. ﻫﻬﻬﻪ ركبنا .. طلعنا للسطح الله جو يجنن الهوا البارد ﻳﻀﺮﺏ في وجهك .. شبحت لقيت ﺧﻮﺍﺗﻲ مفرشات ورقدات في جهة .. وحوش ﻋﻤﻲ ﻓﺎﺭﺷﻴﻦ هما وصغارهم في جهة .. ﻭﺍني ﻓﺎﺭﺷﻴﻠﻲ ﻭﺍﻣﻲ جنب ﺭﺍﺳﻲ في جهة .. ﺗﻤﺪﺩﺕ في فراشي وخذيت طرف دخان تاني .. ﻭقعدت سارح جيت بنرقد .. ﺷﻔﺖ منال وقفت ..
قيس : ﻫﺎﺍﺍ شن مزال تبي ..
منال : وانت خيرك ﻣﺮﺍﻗﺒﻨﻲ ..
قيس : الدنيا ﻟﻴﻞ ارقدي ..
منال : عطشانة ونبي اميه ..
قيس : اوينه الطرمس وفيه اميه مصقعة ﺍﺷﺮﺑﻲ منه .. ﺟﺖ جنب الطرمس ..
منال : مافيش كباية ..
قيس : خلاص ارقدي ﺩﻭﺧﺘﻴﻨﻲ ..
منال : وانت ﻣﻨﻮ جي جيهتك انت ﺣﺸﺮﺕ روحك بروحك ﻭﺍﻟﻠﻪ ﺍﻟﻠﻪ ..
لقيت كباية ﺑﻼﺳﺘﻚ جنب ﺭﺍﺱ ﺍﻣﻲ .. حذفتها وجبتها في راسها قصدا ..
منال بعياط : ﺍﺧﺨﺨﺨﺨﺦ ﻫﺎذا ﺷﻨﻮ ..
قيس : ﺻﺎﺭﻭﺥ ﺍﻣﺮﻳﻜﻲ ﻣﻦ الناتو ﻣﺨﺼﻮﺹ لدماغك .. ﻭﺿﺤﻜﺖ ﻭﻟﻔﻴﺖ ﺭﺍﺳﻲ نسمع فيها اتمتم مع ﺭﻭﺣﻬﺎ خليتها ورقدت ..
________________________________💔💔💔
اليوم الثاني .. قيس ..
الفجر .. جي الضي في عيني .. نضت .. شبحت ﺧﻮﺍﺗﻲ لقيتهن كلهن راقدت .. ﺑﺲ فيه منهن مش متغطيات .. نضت غطيتهن .. شبحت لي منال .. هااااذي وين تحساب روحها راقدتلي في بجامة نص جسمها برا ومش متغطية فوق منها .. ﻣﺎ دققتش كويس ﻋﻠﻴﻬﺎ خذيت ﺍﻟﻐﻄﺎء لوحته ﻋﻠﻴﻬﺎ واني ﺩﺍﻳﺮ ﻭﺟﻬﻲ ﻭﻧﺰﻟﺖ ..
ﻭﺍﻟﻠﻪ جيعان ياربي .. وكلهن راقدت .. شبحت لي ﺳﺎﻋﺘﻲ لقيتها ﺍﻟﺴﺎعة 5 ﺍﻻ ﺭﺑﻊ .. اوووف معقولة ياقيس نايض قبل الشحاتة وبنتها .. مشيت ﺗﻤﺪﺩﺕ في داري .. ﺑﻄﻨﻲ ﺗﺼﻮﺻﻲ ﻣﻦ ﺍﻟﺠﻮﻉ .. نضت قليت 4 دحيات وحطيتهم في ساندوتش وقعدت ناكل .. ﺑﻌﺪﻫﺎ خشيت لبست توتة ﻭﻃﻠﻌﺖ نجري .. قعدت نجري في الشارع متاعنا ساعة و ﺭﺟﻌﺖ ﻣﻴﺖ ﻋﺮق .. ﻓﺘﺖ طول ﻟﻠﺤﻤﺎﻡ دوشت .. اتذكرت انه مادخلتش معاي حوايج جيت من برا ع الحمام طول .. لفيت المنشف ﻋﻠﻰ ﺧﺼﺮﻱ ﻭﻓﺘﺤﺖ ﺍﻟﺒﺎﺏ .. جيت بنطلع ﻭﺍﻧﻀﺮﺑﺖ في منال .. المنشف شوي وطاح في اخر لحظة شديته ربنا ﺳﺘﺮ وما انخلعتش ﻫﻬﻬﻬﻪ .. هيا ﺷﺎﻓﺘﻨﻲ بالمنشف طبست راسها طووول ..
قعدت نمشي من اهني ﺗﺠﻲ من اهني نطلع من غادي تطلع من غادي .. وقفت وشديت المنشف بيش مايطيحش ..
قيس : ﺍﻣﺸﻲ بسرعة ﺍﺳﺘﺮﻱ عليا راهو بالسيف شاد المنشف .. ﺿﺤﻜﺖ ﻭﻓﺎﺗﺖ ﻟﻠﺤﻤﺎﻡ تجري .. حقك ﺍﻟﻠﻴﻞ ﻛﻠﻪ تشربي في اميه .. كيف ما تسكنيش في ﺍﻟﺤﻤﺎﻡ ..
خشيت لداري ﺗﻌﻄﺮﺕ ﻭﻟﺒﺴﺖ حوايجي .. ﻭﺗﻤﺪﺩﺕ ورقدت .. ارتحت ﺷﺒﻌﺎﻥ ﻭﺟﺴﻤﻲ ﺧﻔﻴﻒ ﻭﺗﻌﺒﺎﻥ ﻣﻦ الجري وكيف مدوش يعني مصقع .. وع طول في سابع نومة ..
نضت ﻋﻠﻰ ﺻﻮﺕ الصغار وعياط ﺍﻣﻬﺎﺗﻬﻢ ﻋﻠﻴﻬﻢ .. شبحت ﻟﺴﺎﻋﺘﻲ لقيتها 10ﻭﻧﺺ .. نضت ﻋﻠﻰ ﺣﻴﻠﻲ .. مشيت للمربوعة .. لقيت ﻋﻤﻲ قاعد ومنال راقدة في حضنه ونسمع فيها تقوله ..
منال : ﺑﺎﺑﺎ امتي ﻧﺮجعوا لطرابلس ﺍﻟﻌﻴﺸﻪ اهنايا خانقتني ..
عمي ياسين : يا ﺑﺎﺑﺎ طرابلس ﺣﺎﻟﺘﻬﺎ ﺍﺳﻮﺀ ﻣﻦ اهنايا بأﻟﻒ ﻣﺮﻩ .. طرابلس توا والعة ﻧﺎﺭ ..
قيس خشيت عليهم : ﻋﻤﻲ ﺻﺒﺎﺡ ﺍﻟﺨﻴﺮﺭ ..
منال ناضت ﺑﺴﺮعة ﻣﻦ حضنه ﻭﻃﻠﻌﺖ ..
عمي ياسين : هلا ياولدي ﺻﺒﺎﺡ ﺍﻟﻨﻮﺭ ..
قيس : شن مافيش اي اخبار ..
عمي ياسين : لا ﻭﺍﻟﻠﻪ ﺷﻮﻓﺖ ﻋﻴﻨﻚ انقطعت ﺍﻻﺧﺒﺎﺭ .. ﺍﻟﻘﻨﺎﺓ ﺿﺮﺑﻮﻫﺎ .. والضي مافيش ..
قيس : ﺷﻐﻞ ﺍﻟﺮﺍﺩﻳﻮ خلي نسمعوا ﺍﻻﺧﺒﺎﺭ .. شغلناه .. وكان خطاب للعقيد معمر .. سمعنا ﺍﻟﺨﻄﺎﺏ ﻭﻫﻮ ﻳﺸﺪ في عزيمة الليبين ﻭﻳﻠﻌﻦ في الناتو ..
قيس : ﻋﻤﻲ طرابلس خلاص بتسقط بطيح ..
عمي ياسين : ﻟﻴﺶ كيف عرفت ..
قيس : ﺷﻮﻑ كلام معمر ﺗﺸﺠﻴﻊ ﻣﻜﺜﻒ ﻳﻌﻨﻲ ﺍﻟﻮﺿﻊ ﺻﻌﺐ ويبي يرفع ﻣﻦ ﻣﻌﻨﻮﻳﺎﺕ ﺍﻟﺸﻌﺐ ..
عمي ياسين : لا اله الا الله استرها يارب .. ﻫﻮ ﻭﺣﺪﻩ ﺍﻟﺴﺘﺎﺭ ..
قيس : ﺍﻧﺸﺎﻟﻠﻪ ﻳﺎ ﻋﻤﻲ يسترنا .. هاذا الناتو ﻛﻼﺏ مرات يخشوا علينا بعد ما اطيح ليبيا .. وهما ﺳﺎﻗﻄﻴﻦ واحني عندنا نساوين ياخوفي ايدوسوا شرفنا ويقتلونا ..
عمي ياسين : ﻭﺍﻟﺤﻞ ..
قيس : اي ﺣﻞ .. كله في يد الله توا ..
عمي ياسين : النساوين خايفات ..
قيس : اي من ﺣﻘﻬﻦ .. ﺑﺲ ﻋﻤﻲ خلي نطلعوهم من الجو هاذا ..
عمي ياسين : وشن بنديروا ..
قيس : خلينا نمشوا لعمامك في الجبل فوق .. عندهم مزارع تهبل ..
عمي ياسين : مافيش ﺧﻄﺮ ..
قيس : ﻻ الوضع ﺍﻣﺎﻥ غادي .. حتي لو خشوا مايزبطه حد المكان هاذاك لانه الداخل هلبا .. وطرابلس صامدة باذن الله ..
عمي ياسين : امالا خلاص هيا ..
قيس ناديت ﺧﻮﺍﺗﻲ : شن رايكن نمشوا للمزارع في الجبل تمشن
خواتي بصوت واحد : ايييييه ياسلام ياريت ..
قيس : امالا خلاص وتن اموركن وحاجاتكن ونطلعوا طول ﺍﻧﺸﺎﻟﻠﻪ ..
مشيت غيرت حوايجي لبست بدلة عربية ولفيت شال ع راسي .. وناديت قتلهم اوتيتوا .. قالوا ﺍﻱ .. ﻣﺸﻴﺖ لقيت منال ﻻبسة سروال امريكي وبلوزة قصيرة وبوت طويل وطاقية تقول كايبوي طالعة ..
قيس : ع وين ان شاء الله ياروح امك انتي بلبستك هاذي وين تحسابي روحك تحشمينا قدام الناس .. فنصت فيها .. خشي البسي عبايتك ..
منال : يييع مانلبسش في عباية ﺍﻧﻲ ..
قيس : ورحمة بوي اللي تحت ترابه ماك ماشيتها بمنظرك هاذا .. شنو ﻣﺎ فيش ﻏﻴﺮ بنت ﻋﻤﻲ ﻋﺎﺭضة ﺟﺴﻤﻬﺎ وحوايجها هكي ﻭﺗﻤﺸﻲ ﺑﻴﻦ الناس .. شنو احني ديوث ﻣﺎ عندناش ﻏﻴﺮية ع نساوينا او ماعندناش ﺷﺮﻑ ..
قعدن ﺧﻮﺍﺗﻲ ﻳﻘﻨﻌﻦ فيها ﻭﺍﻣﻬﺎ وهيا معندة ماتلبسش ﻋﺒﺎية .. ﻫﺬﺍ الكلام وﻋﻤﻲ مهناش مشي لحوش ﻋﻤﻲ ﻳﺒﻠﻐﻪ ﺍﺫﺍ يبي يمشي معانا
قيس : ﻭﺍﻟﻘﺮﺍﻥ ﺍﻟﺸﺮﻳﻒ ورحمة بوي ﻣﺎني متحرك ﺧﻄﻮة ﻭﻫﺎذﻱ لابسة هكي و ﺑﺪﻭﻥ عباية ..
منال : ههههي ﺷﻨﻮ ﻫﺎذﻱ .. ﻋﻨﺪﻱ ﺍﺳﻢ راهو ..
قيس : سكري فمك احسن مانضربك ونكسرهولك مرة وحدة .. مش كان اهلك اهني وامك واقفة نسمحلك انه ﺻﻮتك يعلي عليا .. وربي ندفنك في مكانك ومايقدر حد يتكلم .. المراة اللي تعلي في ﺣﺴﻬﺎ عندنا .. نقصوا لسانها ونحذفوه ...
_______________________________
💔💔💔
اسفة متابعيني الحلوين لهيت في كتابة مشروع تخرجي دعواتكم مناقشتي قريبة ادعولي .. ع العموم شن توقعاتكم ورايكم نكمل او نوقف ونعرف مقصرة لكن هانت ..

google-playkhamsatmostaqltradent