رواية عشاق الصعيد الفصل الثالث 3 بقلم اية الابشيهي
عُشاق الصعيد
(3)
(3) بالصعيد بالتحديد محافظة سوهاج
بجناح فهد
ليل: -فهد!!...... فهد
فهد: -ادخلي يا ليل
دلفت للداخل لتتجول بنظرها في انحاء الغرفة..... كانت معظم ما بها باللون الأسود والفضي أقل ما يقال عنها أنها مملكة خاصة بالفهد
قاطع تأملها صوت الفهد الهامس: -طالما بتحبيها كدا انقلي إقامتك فيها
تراجعت للخلف: -اااا
فهد: -خلاص هتفضلي تقولي ااا كتير
ليل: -انت اتحولت؟!
اقترب ليُزيح حجابها بهدوء: -يعني ايه اتحولت؟!
-بتتكلم عادي مش صعيدي
اتسعت ابتسامته: -قولتلك وانتي معايا اتكلمى عادي انما برا اتكلمي زيهم.... زي ما ورد بتعمل
=طب انا مش فاهمه انا ليه لازم اتكلم صعيدي..... ما اتكلم عادي
فهد: -يا ليل افهميني
ليل: -انا عاوزة اتعامل عادي واعيش زي ما كنت عايشة في بيتي
لم يدرك ما يقوله: -عشان الكل يقول انك تربية نبيل.....
شعرت بغصة في حلقها: -كمل..... كمل يا فهد.... عشان الكل يقول اني تربية نبيلة صح!!!
فهد: -ليل انا آسف..... مش قصدي صدقيني
ليل: -ولا يهمك اقعد عشان تاكل
فهد: -طب لو مش زعلانه مني بصحيح كُلي معايا
ليل (بابتسامة مكر): -ااا ينفع عصير
فهد (بفرحة): -طبعا.........اتفضلي يا ليل قلبي
قعدت جانبه واخدت العصير وبدأت تشربه بهدوء وعينيها على فهد وتعبيرات وشه وهو بياكل....... بصلها بطرف عينه وعرف هيا عملت ايه
فهد(بمكر): -تسلم ايدك يا قلبي الاكل تحفة
ليل: -بجد!!! حلو؟!
فهد: -جدا جدا.... تدوقي؟!
ليل: -لالالا
فهد: -لا لازم تدوقي.... افتحي بوقك
ليل: -يا فهد عليه شطة
جذبها إليه: -تعالي بقي عشان انا كنت شاكك فيكي..... كل دي شطة حطهالي يا مفترية
ليل: -وسع يا فهد.... انت اللي غلطت فيا الاول
فهد: -غلطت فيكي ازاي بقي يا اختي!!
قلدت طريقته وهو بيتكلم: -چهزي الوكل وهاتي فوچ.... انتي اللي اتجبيه يا ليل عشان ما اخربطش وشك بيه...... تخربط وشي انا!؟؟
فهد: -ههههههههههه والله انتي قمر كدا وانتي بتقلديني
ليل(بهيام): -وانت قمر اوي وانت بتضحك
اقترب منها: -صوح الحديت ده؟!
ليل(بتوهان): -هااا
اقترب منها اكثر ولكن قاطعهم دلوف ورد
ورد: -واااه وااه..... انت اهنه يا فهد
فهد: -لع يا اختي اهناك...... انتي ازاي تدلي على الأوضة اكديه من غير ماتخبطي
ورد: -كنت فاكرة ان ليل اهنه لوحدها..... زي عوايدها
بصلها ورفعلها حاجبه مع ابتسامة صغيرة
ليل: -قصدها يعني باجي اروقها مش اكتر.... ولا ايه يا ورد
ورد: -لع بتيچي تقعدي اهنه
قربت منها وخبطتها في كتفها: -قصدها باقعد شوية لما اخلص ترويق مش كدا.... يالا بينا
فهد: -ليل
ليل: -نعم!؟
فهد: -تعالي..... روحي انتي يا ورد وليل هتيچي وراكي
ورد: -حاضر
فهد: -اقفلي الباب وتعالي
قفلت الباب وقربت منه: -نعم!
فهد: -كنتي هتطلعي كدا؟!
ليل: -كدا ازاي؟!
فهد: -طرحتك!؟
حطت ايدها على شعرها: -يا خبر مااخدتش بالي
فهد: -اتفضلي
ليل: -شكرا..... عن إذنك
بعدت عنه عشان تمشي
فهد: -ليل
=نعم؟!
-زعلانة مني!؟
=كنت
-ودلوقتى؟!
=تقريبا لا
فهد (بغيره): -هو اللي جيه يقعد جانبك في المحاضرة دا..... تعرفيه
ارتسمت ابتسامة حب على شفتيها: -لا ما اعرفوش معرفة شخصية..... اعرف بس انه صاحب علاء ابن خالي
فهد: -انا قولت انه نطع والاشكال دي ماتعرفش الا اللي شبهها
ليل: -هاااا !!!
فهد: -لا حبيبي مافيش
ليل: -طيب انا رايحه ل ورد
فهد: -ماشي حبيبي..... اوعي تنسي الحجاب.... والله نفسي تلبسي نقاب عشان مااحدش يلمحك اصلا
ليل: -اشطا اشطا.... سلام
فهد: -طب بتحبيني مش كدا
=لا
-بتموت فيا
*****************
بالأسفل في المندرة
عزت: -انا چولت اللي عندي يا هنية
هنية: -كيف يعني يا حچ..... ورد لازم تتچوز من ولد عمها
عزت: -هتعرفيني الصوح اياك!!
هنية: -ماقصديش يا حچ..... انا بچولك على عوايدنا..... ولا ايه
عزت: -عوايدنا تداس بالچزم قصاد اني اديت كلمة وقصاد ان الطار يقف يا مرت اخوي
هنية: -طب والحديت ده ما عيمشيش مع ولدك فهد لي؟!
عزت: -اسمعي يا هنية...... انا خابر زين دماغك فيها اي..... فقصري في الكلام امعايا ومش حُرمه اللي هتعرفني الصوح
هنية: -ودا اخر حديتك يا حچ
عزت(بمكر): -ايوا يا هنية..... بس انا رايد اسألك على حاچة...... هو لو فهد ماكنش اتچوز من بت عمه ليل بالذات كنتي هتبچي على نار اكديه........ولا عشان هيا بت نبيلة؟؟
بصتله بغيظ وسابته ومشيت...... وهو فضل يفكر هيعمل ايه عشان مايكنش ليها احتكاك بليل خصوصا بعد ما ورد تتجوز
********************
بغرفه ورد
ليل: -انتي بتقولي ايه؟!
ورد: -والله دا اللي حصل...... بابا اللي قالي كدا
ليل: -قالك كدا ازاى يعني...... فرح ايه ده اللي بعد اسبوع!؟
ورد: -خلاص يا ليل اهدي...... احمدي ربنا انك انت وفهد بتحبوا بعض....... انما انا بقي مااعرفش حاجة عنه غير*اللهم صلي على كامل النور*
*ليل: -انتي بتضحكى هو ده وقته؟!
ورد: -ومااضحكش ليه؟!.... هيبقي جواز وغم من الناحيتين...... بعدين بالراحة كدا! هو فهد عرف اصلا؟؟... مش يمكن هو اللي يأجل!
ليل: -فهد؟؟! يأجل!!!...... حبيبتي عمي لو قال لفهد الفرح بعد ساعة هيقوله طب ما تخليها بعد نص ساعه انا فاضى
ورد: -ههههههههههه دي حقيقة...... بيحبك خالص...... يا رب ارزقني بواحد زي اخويا كدا يا رب
ليل:-انا هنزل لعمي اتكلم معاه
ورد: -لا استني اوعي تنزلي دلوقت
ليل: -ليه يعني؟!
ورد: -مرات عمك تحت معاه
ليل: -انهي واحدة فيهم
ورد: -مرات عمك خيري..... هنية البومة
ليل: -ودي ايه اللي خرجها من اوضتها.... مش عاملة فيها السفيرة عزيزة هيا وعمتك ومش بينزلوا خالص
ورد: -اقعدى وانا هقولك
ليل: -قعدنا..... قولي
ورد: -بتتكلم مع بابا عشان موضوع جوازي
ليل: -ماله موضوع جوازك؟!
ورد: -عشان مش هتجوز ابنها وهتجوز من برا العيلة
ليل: -اااه...... بس فهد قايلي ان عمي كان قايلهم من زمان انك هتتجوزي أحمد عشان تقريبا الطار يقف؟؟ صح؟!
ورد: -ايوا..... بس طبعا انتي عرفاها مايهمهاش الا الفلوس ومصلحتها...... مش في دمغها طار ولا غيره
قطع كلامهم صوت خبط على الباب
ورد: -ادخل
الخادمة: -ست ورد سي الاستاذ الدكتور أحمد وخايته تحت ريدين يشوفوكي
ورد: -وابوي فين عاد؟!
الخادمة: -رحب بيهم ورجع المندرة تاني
ليل: -هو عمي چاعد لحاله؟!
الخادمة: -ايوا يا ست ليل
ورد: -طب انزلي ضيفيهم عم ادلي لتحت
الخادمة: -تؤمري بالإذن
ورد: -شوفتي.... هيفضل ينُطلي كل شوية
ليل: -انتي مش كنتي لسه بتدعي ان ربنا يرزقك بواحد زي فهد..... طب ما اهوه
ورد: -طب وسعي بچا اكديه..... هاتي الطرحة دي..... إما طفشته دلوچيت مابچاش ورد عزت بت القناوي
