رواية فيلا نوال البارت الخامس 5 بقلم كوكي سامح
ودخلت نوال وشافت؟..
فى الڤيلا
الست نوال مفيش زيها بس فيها عيب بتصدق اى حد وبيضحك عليها بسهوله وجلال دخل عليها بالسهوكه ده حتى ملكه هانم الله يرحمها مكانتش موافقه عليه لحد ما ادحلب وعرف موضوع الشيخ اللى قال لملكه هانم هتخلف بنت وتسمى الڤيلا على اسمها
.. عرف ازاى يا نرجس
.. معرفش بس بينى وما بينك انا سمعته كان بيكلم ابوه الدجال ده فى التليفون وقاله انه هو السبب فى جوازه من نوال هانم وكان عاوز منه فلوس وجلال لما كان بيكلمه كان بيترعب منه يختاااى يجعل كلامنا خفيف عليه
.. معقول فى اب يستغل ابنه كده وكمان يساومه
.. اسمعى التقيل بقى!
.. ايه هو قولى بسرررعه؟
.. انا عرفت ان نوال هانم عرفت ان جلال عامل حساب من وراها فى البنك
.. عادى وفيها ايه ما هو محامى وبيكسب
.. يا بنتى افهمى من سنه نوال هانم كانت عامله مشكله كبيره هى وجلال بسبب ان حسابها فى البنك نقص ملايين والبنك بلغها
.. يمكن هى سحبته
.. بقولك عملت مشكله لما عرفت وكانت فى وقتها عامله لجلال توكيل وسحبت التوكيل منه وعرفت انه عامل حساب لنفسه وهو اللى سحب فلوسها
.. وخدت فلوسها منه
.. اه خدتها وسامحته أصلها مسحوره بالحب
عنان قالت فى سرها علشان كده عاوزه تكتب فلوسها بأسم ولادها ههههه وجلال عامل فيها بيه وهو حته نصاب وكمان حمار وقالت بت يا نرجس تعرفى طريق الدجال ده
.. دجال مين!؟
..الدجال ابو جلال
.. اه اعرفه بس انتى عاوزاه ليه يا عنان
.. من كلامك يدل ان شاطر وانا بحب واحد وعاوزه اسحرله علشان يتجوزنى
.. بصراحه هو شاطر مش شايفه ابنه جلال عايش فى العز والست نوال متمسكه بيه ازاى علشان عامل ليها عمل يا ختااااى يجعل كلامنا خفيف عليه
.. فين عنوانه بالظبط
.. انا اعرف انه عايش فى بلد ارياف
.. يعنى بعيد يا نرجس
.. ساعه ونص وتكونى عنده
.. خلاص ان شاء الله بكره هستأذن نوال هانم واروح اشوف حالى وخدت منها العنوان وقالت فى سرها انا يا انت يا جلال..
فى المكتب
دخلت نوال وشافت بنت وشاب بيعملوا علاقه مع بعض وجلال بيصورهم ومعاه كاميرا حديثه بيصور بيها
.. يا نهار اسود انت بتعمل ايه
.. نوال ايه اللى جابك
نوال دخلت ووقفت قصاد الكاميرا ودموعها نازله ومش مصدقه نفسها وقالت ترضاها عليه يا جلال بيه قصدى يا محامى يا كبير ياللى بدافع عن القيم والمبادئ وبتجيب حق المظلوم معقول ابو ولادى قواد رددت البنت عليها وقالت لو سمحت عاوزين نخلص شغلنا
= نوال زقتها بقوه وقالت يلا يا سافله من هنا ده مكتبى بس انا مش هسيب اشكالكم ومسكت تليفونها وبتتصل بالشرطه
.. نوال بلاش علشان خاطر ولادنا كده هنتفضح وانا هسيب شغلى رددت وقالت واللى زيك لازم ياخد عقابه رد وقالها بلاش مسكته من قميصه وقالت انت عرتنى وهتعر ولادى يا فاجر يا قليل الاصل وناكر الجميل مسكها من رقبتها وابتدى يخنقها ونوال على صرخه واحده ولادى ولادى..
فى الڤيلا
= قامت عنان من النوم على صوت هيا بتعيط وحاولت تسكتها والبنت على صرخه واحده وشالتها وقالت مفيش حل غير ان اطلع لمدام نوال ولما طلعت فضلت تخبط ومحدش رد اتخضت وفتحت الباب وملقتش حد فى الاوضه وبصت فى الساعه وكانت 4 الفجر واستغربت وقالت معقول لسه مرجعتش وكمان جلال ونزلت ودخلت على اوضه نرجس وقالت لها الحقى مدام نوال وجلال بيه لسه مرجعوش
.. يمكن سهرانين بره
.. بس انتى ناسيه ان نوال خرجت وكان شكلها مضايق يا ترى راحت فين؟
.. عنان خليكى فى حالك وملكيش دعوه عاوزه تاكلى عيش متدخليش فى اللى ملكيش فيه وريحى دماغك احنا مالنا
.. طيب واللى بتعيط دى؟
.. يمكن جعانه ولا عندها شويه مغص
.. خلاص قومى حضرى اى أكل ل هيا
.. حاضر هقوم يا عنان هانم
= وفعلا قامت وعملت أكل للبنت وسابته يبرد فى المطبخ والڤيلا كلها ساكته وعنان معاها هيا وبتحاول تسكتها وخرجت الجنينه وقالت تتمشى بالبنت بس هيا على صرخه واحده
عنان.. يوووه اسكتى بقى يا بنتى انا زهقت ونفسى انام
. نرجس خرجت وراها وقالت انا داخله انام وياريت تاخدى هيا على اوضتها الجو برد اوى
.. انا فعلا متلجه بس قولت يمكن تسكت عندك حق انا هدخل جوه وهأكلها ويارب تنام
= وفعلا سمعت كلام نرجس ودخلت الڤيلا وراحت المطبخ وخدت اكل هيا وطلعت على اوضتها والبنت رفضت الأكل ونامت وسابتها نايمه وخرجت بره الاوضه وطلعت على فوق ومشيت فى الطرقه ومشيت لحد اوضه نوال وفتحتها ودخلت تفتش يمكن تعرف حاجه عن جلال وقفلت الباب وراها وفتحت الدولاب وفضلت تتدور بس ملقتش حاجه مفيده وخرجت وقفلت الباب ولا كأنها عملت حاجه ودخلت اوضتها وكملت نوم
فى منزل عنان
الام مش بتنام ومنهاره على فراق بنتها الوحيده ومن وقت ما عنان هربت وبنت خالتها قاعده مكانها وقالت يا خالتى لازم تنامى وتريحى جسمك علشان نقدر ندور عليها
.. انا تعبت يا أمل وعنان وحشانى دى شبابى وبنت عمرى لو ماتت كنت ارتاح بس انا معرفش لها طريق وانا عملت اللى عليه والشرطه بدور
.. يا خالتى الكلام ده مبقاش ينفع مفيش غير حل واحد
.. ايه هو ابوس ايدك قوليه يمكن نلاقيها
.. مفيش حل غير شيخ او حد بيفهم فى الاسحار انا سمعت ان الناس دى بتعرف
.. اسحار اعوذب بالله
.. يا خالتى واحنا هنأذى حد دى وسيله يقولنا على طريق عنان طيب انا هحكيلك حاجه كان فى ناس انتى عارفاهم الجيران اللى قصدنا فاكراهم
.. انا مش فاكره غير عنان وبس
.. المهم ابنهم اتخطف واتصل بيهم ناس قال ايه عاوزين فديه والكارثه انهم محلتهمش اللضدا وطبعا خافوا يبلغوا الشرطه علشان التهديدات بس فضلوا يفكروا انهم مش معاهم حاجه طيب ابنهم اتخطف ليه وهيجيبوا فلوس منين المهم بقى ان فى واحده بنت حلال قالت لهم على راجل بيفهم فى الحاجات دى بس بياخد فلوس
..انا ادفع عمرى كله علشان بنتى ترجع ها ولقوا ابنهم ولا ايه؟
.. اه راحو للراجل ده وعرفوا ان اللى خاطف تبقى سلفتها وقال ايه علشان غيرانه منها كانت بتلاعبها يعنى علشان كانت بتعايرها انها مبتخلفش
.. لا حول ولا قوة الا بالله الزمن ده بقى اسود ومنيل استغفر الله العظيم سامحنى يارب الناس هى اللى بقت وحشه
.. شوفتى بقى ايه رأيك تجربى
.. انتى تعرفى طريقه
.. لأ مش بالظبط انا كنت اعرف انه من بلد ارياف هسأل واجبلك العنوان ونروح انا وانتى بس النهار يطلع وان شاء الله خير يمكن يكون سبب فى رجوعها
.. يارب يا بنتى مع انى بخاف من الناس دى وبحس انهم كدابين
.. بقولك ده راجل ومسمع جامد انا سمعت عليه انه واصل اوى فى الحاجات دى وبيعرف وبيجيب التايهه بس بياخد فلوس كتير
.. وماله انا هتصرف بس بنتى ترجع
.. ان شاء الله يا خالتى
فى الڤيلا
عنان نايمه فى اوضتها والباب اتفتح عليها وحست بحد بيلمس جسمها وبيهمس فى ودانها وبيقول نوال ماتت وقامت مفزوعه وقالت مين؟
