رواية اسرار حماتي الفصل الثاني 2 كاملة

رواية اسرار حماتي الفصل الثاني كاملة 

اللي انا شوفتها في البيت دي تبقى أمي الله يرحمها ..

انا متأكد ومقدرش اتلخبط في حاجة زي دي ، حتى الجلابية اللي لابساها دي هي آخر جلابية كانت لابساها قبل ما تموت ، اليوم اللي جاتلها فيه أزمة قلبية وملحقناش حتى ننقلها المستشفى ..

في اللحظة دي انا كنت متأكد ان وجود حماتي في البيت يوم كمان هو خطر وخطر كبير أوي ..

الست دي لازم تسيب البيت فورا بس الأول انا لازم افهم هي بتعمل ايه بالظبط ..

بس هعرف دا ازاي وهي خلاص احتلت الأوضة وحولتها لمكان غامض مقفول ..

انا لازم أدخل الأوضة دي وافهم ايه اللي بيحصل جواها بالظبط ، بس هدخل الأوضة ازاي اصلا وهي مبتخرجش منها نهائي ..

فكرت كتير في طريقة تخليها تخرج من الأوضة ولو ساعة واحدة علشان اقدر ادخل جوا واعرف ايه اللي هي مخبياه بالظبط ..

ولقيت فكرة كويسة ..

استغليت حكاية الفيروس اللي في البلد دي وقولتلها هي ومراتي اني هجيب حد يعقم البيت كله ويرش مواد كيماوية ومينفعش يكونوا موجودين في الشقة ساعة التعقيم ..

وبالفعل اقنعتهم انهم يستنوا عند مدام رشا اللي في الشقة اللي قصادنا نص ساعة بس لحد ما الناس يعقموا البيت ..

اول ما هي خرجت قفلت باب الشقة و خليت الراجل اللي معايه يرش برا ودخلت انا أوضة حماتي ، وفتحت صندوقها الأسود ..

الأوضة كان شكلها مخيف ..

كتب قديمة في كل مكان ، قديمة جدا ، مكتوبة على جلد حيوانات بخط الايد ، فيها مخطوطات غريبة بحروف وأرقام عربي ، ومخطوطات تانية باللاتينية القديمة وبالهيروغليفي كمان ..

شمع على الأرض ، وصور قديمة جدا لناس ميتين ..

الست دي شغالة في السحر الأسود ..

لكن المنظر المرعب اللي شوفته في اوضتها مكانش منظر الكتب الغريبة ولا منظر الشمع ، ولا النقوش اللي ظهرت على الحيطان فجأة مش عارف ازاي ..

الحاجة المرعبة في القصة ان شنطتها اللي كانت جاية بيها مكانش فيها هدوم ، كان فيها 11 جمجمة ل 11 جثة ..

كل جمجمة فيهم مكتوب عليها اسم صاحبها ..

دسوقي ، زينات ، رجب ، دلال ، عتمان ، زينب ، عبد البر ، فوزية ، جاد ، فايق ، و خديجة ..

يا رب يكون اللي انا فهمته غلط وتكون دي مجرد صدفة ..

انا اعرف اسامي 3 من اصحاب الجماجم دي ..

رجب خالي ، وعتمان جوز خالتي وخديجة .. أمي ..

تفتكر دا ممكن يكون مجرد تشابه اسامي ؟

يعني صدفة اني اشوف أمي هنا في البيت بعد موتها ب 13 سنة ؟ وصدفة اني الاقي جماجم باسم أمي وخالي وجوز خالتي ..

بعد ما شوفت المنظر دا اترعبت اكتر ما كنت مرعوب ، وزاد خوفي وقلقي من الست دي ومن اللي بتعمله ..

رجعت كل حاجة مكانها وخرجت وقفلت الأوضة ، والراجل كان خلص تعقيم ، كان فيه مشوار مهم لازم اعمله عشان اتأكد من اللي في دماغي ..

عديت على شقة مدام رشا عشان اخد مراتي وحماتي من هناك قبل ما انزل ..

ضربت الجرس ، خرجت مدام رشا ، قولتلها ابعتي الجماعة بقى وقوليلهم خلاص يقدروا يرجعوا الشقة ، قلت لمراتي اني رايح مشوار ومش هتأخر ، دخلت الشقة هي وحماتي وأنا نزلت على السلم ، بس لقيت مدام رشا بتنادي عليا وأنا نازل ..

- استاذ محمد ، يا استاذ محمد

= أيوه يا مدام رشا ، اؤمري

- انا عايزة اقولك حاجة

= خير

- الست الكبيرة اللي كانت هنا دي تبقى حماتك فعلا ؟

= أيوه

- بص ، انا عارفة ان اللي هقوله دا غريب ، ويمكن متصدقوش ، انت عارف ان الشيخ مصطفى جوزي بيشتغل معالج بالقرآن وياما ربنا كتب لناس كتير الشفا على ايده من السحر والمس وحالات كتير عالجهم من غير اي مقابل لوجه الله كدا

= عارف يا مدام رشا ، عارف ، ايه علاقة حماتي بالحكاية دي ..

- حماتك يا استاذ محمد وراها سر غريب الله اعلم هو ايه ، بس مصطفى جوزي بيقول ان الست دي ميتة وان اللي كانت قاعدة معانا مش هي ، ده شيطان متمثل في صورتها ..

الفصل الثالث من هنا 

تعديل المقال