رواية بناتي للبيع الفصل الثاني 2 كاملة - محمد مالك
البارت الثاني
للكاتب المصري محمد مالك
جميع الحقوق محفوظة
رضوي .. عفوا .. مش فاهمه حضرتك تقصد ايه ؟!
الرجل ويدعي فؤاد .. قصدي اني هاخد منك ال ٣ بنات دول قصاد المبلغ دا .. ٢ مليون دولار !! شوفي بقي كام بالمصري !!
رضوي .. انت بتقول ايه حضرتك ؟! يعني ايه تاخد بناتي .. برضوا مش فاهمه انت تقصد ايه ؟! قصدك يعني اني ابيعلك بناتي ولا ايه بالظبط ؟!
فؤاد .. لا لا متفهمنيش غلط .. انا مش قصدي اني تببعيلي بناتك خالص
رضوي .. اومال تقصد ايه حضرتك ؟!
فؤاد .. قصدك انك تسيبيهم عندي وانا اللي اربيهم
رضوي .. ده علي اساس اني امهم ومش عرفة اربيهم ولا ايه ؟!
فؤاد .. برضوا مش دا قصدي يا مدام رضوي !!
رضوي .. طيب يبقي حضرتك المفروض توضح قصد حضرتك ايه بالظبط عشان افهم بس !!
فؤاد .. بصي انا راجل غاوي كل حاجة جميلة .. اي شئ في الدنيا جميل بحب استحوذ عليه واحتفظ بيه عندي في القصر بتاعي .. انا بقدر الأشياء الجميلة جدا مهما كانت .. بشر .. جماد .. حيوان .. اي شئ
رضوي .. ما اظنش برضوا اكون فهمت قصد حضرتك اوي يعني .. بس تقريبا كدا اللي انا فهمته انك عايز بناتي عندك عشان جمالهم ؟!
فؤاد .. فعلا .. بناتك جمال نادر جدا عشان عايز احتفظ بيهم في القصر بتاعي
رضوي .. معلش انا اسفة في اللفظ اللي هاقوله .. حضرتك غريب جداا علي فكره ؟!
فؤاد .. غريب ليه ؟! انا انسان بيقدر الجمال والأشياء النادرة ويحب يحافظ عليها جداا .. وبصراحة كدا انا حبيت بناتك جداا وحابب انهم يعيشوا عندي في القصر بتاعي
رضوي .. ممكن سؤال بعد اذن حضرتك؟
فؤاد .. اتفضلي
رضوي .. هو حضرتك متزوج ؟!
فؤاد يبدوا انه انزعج بشدة من هذا السؤال .. بدأ يتوتر ورضوي تلاحظ ذلك .. امسك بالسيجار من علي مكتبه وقام بإشعاله بالولاعة واخذ يدخنه ورضوي تلاحظ رعشة يده التي يمسك بها السيجار
رضوي .. انا اسفة لو السؤال ضايق حضرتك ؟!
فؤاد .. لا لا ابدا .. انا مش متجوز
رضوي .. تمام .. يعني افهم من كدا ان حضرتك معندكش اولاد ؟!
فؤاد .. لا معنديش اولاد
رضوي .. تمام حضرتك
فؤاد .. قلتي ايه ؟!
رضوي .. مش عرفة بجد ارد اقلك ايه .. دي طلب غريب فعلا وعمري ما كنت اتوقعه انه يطلب مني ابدا .. انا لما جيت لحضرتك هنا كنت مفكره ان حضرتك هتشغلني عندك ولا حاجة !! وبعدين انا لا يمكن استغني عن بناتي ابدا .. دا انا روحي فيهم وهما كمان متعلقين بيا اوي
فؤاد .. بصي يا مدام رضوي .. محدش قالك انك هتستغني عن بناتك تماما .. انتي هتسبيهم عندي لمدة ٥ سنين وبعد كدا هترجعي تاخديهم لحضنك تاني
رضوي .. واشمعني ٥ سنين يعني ؟!
فؤاد .. من غير اشمعني .. بس اللي اقدر اقولهولك انك هترجعي تلاقيهم حاجة تانية خالص برنسيسات بجد .. هتشوفيهم في صورة عمرك ما تحلمي ابدا انك تلاقيهم فيها ..
رضوي .. هههه .. والله ما انا فاهمه حاجة خالص ؟!
فؤاد .. بقلك ايه .. دا الكارت بتاعي فيه عنوان القصر بتاعي مستنيكي بكره انتي والبنات ع العشا وهناك هفهمك كل حاجة بالتفصيل .. اتفضلي
رضوي متردده في اخذ الكارت ولكن تأخذه في النهاية
رضوي .. ماشي حضرتك
فؤاد .. هنتظرك الساعة ٨ بالليل .. لا تيجي قبلها ولا تيجي بعدها .. تمام ؟!
رضوي مندهشة .. شكل حضرتك بتحب المواعيد المظبوطة جداا .. وانا كمان بحب احترم مواعيدي اوي
فؤاد .. يبقي اتفقنا .. شرفتي يا مدام رضوي
وتعود رضوي الي المنزل قلقة في حيرة شديدة لم تدرك حتي الان مقصد هذا الرجل ولماذا طلب منها بناتها مقابل هذا المبلغ الكبير من المال ؟! وحضرت اليها ام نيفين لتعرف منها ماذا حدث
ام نيفين .. ايه عملتي ايه ؟! طمنيني
رضوي .. رحلته يا ستي .. وطلع هو اللي في الصورة ع فكره .. شكله وحش جدا !! استغفر الله العظيم
ام نيفين .. وكان عايز منك ايه بقي ؟!
رضوي .. عايز بناتي !!
ام نيفين .. يعني ايه ؟!
رضوي .. عايز ياخد مني بناتي ويديني ٢ مليون دولار !!
ام نيفين .. انتي هتتريقي ولا ايه ؟!
رضوي .. صدقيني دا اللي حصل بجد
ام نيفين .. ياخد بناتك ويديلك ٢ مليون دولار ؟! دا مجنون دا ولا ايه ؟! وياخد بناتك يعمل بيهم ايه ؟!
رضوي .. مش عرفة !! بس قال انه بيحب يحتفظ بكل حاجة جميلة عنده في القصر بتاعة
ام نيفين .. يعني عايزك تبيعيلة بناتك ؟!
رضوي .. انا كنت فاهمه كدا في الاول .. بس لما سألته قالي ان دا مش قصده خالص
ام نيفين .. اومال قصدة ايه المنيل علي عينه دا ؟!
رضوي .. قصده .. انه يخلي البنات عنده لمدة ٥ سنين وهارجع واخدهم بعدها .. هيكونوا وقتها بقوا برنسيسات!!
ام نيفين .. برنسيسات !! يعني ايه ؟!
رضوي .. معرفش .. هو اللي قال كدا
ام نيفين .. عليا النعمة الراجل دا مجنون ومش طبيعي
رضوي .. بس دا حط شطة الفلوس ع المكتب وفتحها قدامي وكانت مليانه فعلا روزم دولارات بجد
ام نيفين .. ايه !! يبقي كان بيتكلم جد بقي ؟!
رضوي .. ايوا كان بيتكلم جد طبعا .. تصدقي انا مخي دلوقتي عمال يودي ويجيب .. يكنش عايز البنات عشان يشغلهم في البطال وليعوذبالله !! يخرب بيته لو كان دا قصده !!
ام نيفين .. مش عرفة بصراحة .. مفيش حد مضمون الزمن دا يا اختي !! بس لو كان دا فعلا قصدة هيدفعلك المبلغ دا كله عشان كدا ؟! انتي عرفة دول يساوا كام بالمصري ؟!
رضوي .. وبرضوا برجع واقول انه شكله انسان محترم جدا ومش باين عليه انه بتاع حاجات زي دي ؟! بس برضوا بقول ان الناس الوحشة بتعرف تبان قدام الناس انها كويسة ويقنعوهم بده كمان !!
ام نيفين .. وانتي هتجنني نفسك ليه ؟! سيبك منه خلاص ولا كأنك شفتيه ولا كلمتيه من اساسه
رضوي .. بس انة بقول لو فعلا هياخد البنات عشان يربيهم كويس ويخليهم برنسيسات زي ما بيقول وفوق دا هاخد مبلغ كبير زي دا .. يبقي انا الكسبانه طبعا .. واديكي شايفة الظروف اللي انا فيها .. يا سلام دا الفلوس دي هتخليني ملكة بجد !!
ام نيفين .. لا يا رضوي .. انا مش مرتاحة للحكاية دي .. مفيش حد هيدفع فلوس كتير اوي كدا الا لما يكون في مصلحة وراها .. انسي الموضوع دا احسن
رضوي .. ع العموم هو عازمني ع العشا عنده في القصر بتاعة بكره الساعة ٨ بالليل .. انا بقول اروح يمكن افهم اكتر هو عايز ايه بالظبط .. وهو وعدني انه هيفهمني كل حاجة
ام نيفين .. براحتك يا حبيبتي .. بس خلي بالك من نفسك دا اللي اقدر اقولهولك
وفي اليوم التالي تذهب رضوي الي القصر في الموعد المحدد ومعها بناتها الثلاث وهناك تشاهد قصر فخم جداا .. تحف وانتيكات في جميع انحاء القصر .. خدم وحشم .. ولكن تشاهد شئ غريب .. تري مجموعة كبيرة من صور فتيات في قمة الجمال مختلفة الاعمار معلقة ع حوائط القصر وعلي كل منها شريط اسود يدل علي وفاة صاحبة تلك الصورة فتندهش وتقول لنفسها
رضوي .. يا ساتر .. البنات القمر دي كلها ميته !! وياتري دول يقربوله ايه ؟! دا قالي انه مش متجوز ومعندوش عيال !!
