رواية ابنتي ولكن الحلقة العاشرة 10 كاملة بقلم ياسمين علي
احمد : اهدي طيب انا اسف .. انتي مش وحشة .. انتي جميلة ف كل حاجة حتي ف خناقتنا كنت بشوفك جميلة .. انتي لسه ف نظري محترمة .. لو مكنتش شايفك كدا مكنتش خدتك غصب عنك .. نادين انا بحبك .. انا اسف ع كل حاجة عملتها ضايقتك .. انا... *وبيبصلها لقاها نايمة* .. ضحك .. هو وقته نوم دلوقتي .. ومشي وصلها للبيت ..
احمد : نادين .. نادين .. اصحي
نادين : ايه دا انا فين
احمد : أنتي ف عربيتي .. انتي مش فاكرة حاجة ولا ايه
نادين : اه .. اه افتكرت
احمد : طيب احنا وصلنا خلاص .. يلا اطلعي ارتاحي
نادين : انا مش عاوزة ادخل
احمد : نعم اومال هتروحي فين
نادين : مش عارفة بس انا زعلانة من بابا
احمد : بصي اينكان اي حصل بينكم انا مش هسألك ايه هو .. بس هو لو عمل حاجة غصب عنه ف هو بيحبك واكيد مش قصده يزعلك .. اوقات احنا بنفهمهم غلط .. ادخلي وهو اكيد مش هيهون عليه زعلك ..
نادين بزعل : حاضر .. ونزلت من العربية .. احمد .. ممكن متزعلش مني لو ضايقتك
احمد ابتسم : مش زعلان ..يلا ادخلي .. ومشي
_____________________________
نادين دخلت قابلت وعد قلبت وشها
وعد : حمدالله ع سلامتك .. انا محبتش انام غير لما اطمن عليكي
نادين : شكرا .. متستننيش تاني .. انا كدا كدا بتأخر
وعد : حاضر .. هو انا ممكن اتكلم معاكي
نادين : انا تعبانة وعاوزة انام .. عن اذنك
__________________________________
*وقت الفطار*
وعد وسالم قعدين ونادين قعدة مبتكلمش حد منهم ..
سالم : رجعتي امتا امبارح يانادين
نادين : مش فاكرة
سالم : مش فاكرة ولا رجعتي متأخر ومش عاوزة تقولي
وعد : لا هي مرجعتش متأخر انا كنت صاحية
نادين : ممكن تخليكي ف نفسك
وعد : حاضر
سالم : قولتلك كلميها باحترام .. دي اختك الكبيرة
*نادين قامت من ع الاكل*
وعد : انت كدا هتخليها تكرهني اكتر
سالم : اسيبها تجرحك بالكلام يعني
وعد : لو سمحت سيبها وانا هحاول اقربها مني ..
سالم : اللي تشوفيه يابنتي ..
وعد : هو انا ممكن اطلب منك طلب
سالم : انتي تطلبي عيني
وعد : انا عاوزك تعين حد عندك ف الشركة .. هو خريخ تجارة انجلش وجايب تقدير كويس .. بس محالفهوش الحظ بسبب الواسطة
سالم : عيوني ماشي اعينه علشان خاطرك قوليلي هو مين بقا
وعد : دا ابن جارتنا ومتربي معايا وف مقام اخويا وانا عاوزة اساعده ..
سالم : يعني هو من اسكندرية .. بس كدا يابنتي هيبقا صعب عليه انه يجي القاهرة كل يوم
وعد : لا متقلقش انا هقنعهم يجوا يعيشوا هنا ..
سالم : خلاص كلميه وخليه يجي يقابلني وانا ان شاءالله هعينه
وعد : شكرا اوي
سالم : وانتي ف كلية ايه ولا اتخرجتي
وعد : كان المفروض اتخرج السنادي بس محضرتش الامتحانات بسبب الحمل
سالم : هو انا كنت عاوز اسألك ع حاجة
وعد : اتفضل
سالم : هو فين جوزك .. اقصد طليقك فينه .. مسافر ولا فين .. لو هنا انا ممكن اكلموا
وعد : مالهوش لزوم انا كدا كويسة جدا .. ولو سمحت بلاش تفتح الموضوع دا تاني .. مش عاوزة افتكروه
سالم بزعل : حاضر
___________________________
نادين ف اوضتها قعدة متضايقة .. مش عارفة هي ليه بتعامل وعد كدا .. مع انها زعلانة من ابوها مش من وعد .. سمعت صوت طفل بيعيط .. خرجت تشوف مين لقيت عائشة بتعيط ف اوضة وعد .. اترددت انها تدخل .. ف الاخر دخلت وشالت عائشة ... وفضلت تلعبها لحد ماسكتت .. ونادين كانت مبسوطة .. لحد ماوعد دخلت الاوضة واستغربت وف نفس الوقت فرحت .. نادين سابت عائشة
نادين : هي كانت بتعيط كنت بشوف مالها .. انا اسفة .. وجت تمشي
وعد : استني يانادين .. دي بنت اختك ليكي الحق تمسكيها عادي .. انا مش هزعل .. بالعكس انا فرحت جدا .. يمكن هي دي تكون سبب ف اننا نقرب
نادين : بس انا مش عاوزة اقرب من حد وخلاص انا قولتلك اسفة .. عن اذنك
وعد : ليه بتكابري وبتتكلمي بطريقة غير اللي جواكي..
نادين : تقصدي ايه
وعد : بصي يانادين انا عارفة انك مش طايقاني ليكي حق .. انتي فاكرة اني جاية هنا اخد اونكل سالم منك
نادين : اونكل ! مبتعرفيش تقولي بابا ولا هو مش ابوكي
وعد : انا عمري ماقولت بابا وصعب عليا اقولها ف يوم وليلة .. بس هحاول اتأقلم واقولها .. المهم انا عاوزة اعرفك انا مش جاية اخده منك ولا اخد حبه .. انا عشت عمري كله محرومة من الاب والام وهما عايشين .. رغم غلطهم سمحتهم علشان محتجاهم بجد .. ربنا عالم بوجعي طول السنين دي ولما عرفت الحقيقة بس حطي نفسك مكاني .. لما تبقي لوحدك ومش عارفة حياتك هتكون عاملة ازاي ولا هتربي بنتك ازاي وفجأة ربنا يبعتلك اب واخت هترفضي تكوني معاهم ؟ .. انا ملقتش حل غير اني اوافق مش طمعانة ف حاجة والله .. وياستي لو انتي شايفاني وحشة .. وسرقت فرحتك والله العظيم ارجع زي ماكنت ومش هزعل منك .. بس محبش انتي تكوني زعلانة مني
نادين دمعت : انتي جميلة اوي .. انا اسفة لو ضايقتك .. ومتمشيش لا خليكي .. زي مانتي محتاجنا انا كنت محتاجة اخت من وقت ما ماما ماتت وانا بقيت لوحدي .. زي ما ربنا بعتنا ليكي انتي كمان ربنا بعتك لينا .. متزعليش مني لو جرحتك .. مكنتش شايفاكي صح ..
وعد بتعيط : مقدرش ازعل منك .. تعالي ف حضني بقا .. حضنوا بعض .. وسالم دخل هو كمان عيط لما شافهم حضنين بعض
سالم : كان نفسي اشوفكم كدا من زمان
نادين ووعد جروا عليه حضنوا .. : ربنا يخليك لينا يارب
سالم : ويخليكم ليا يااحلي بنتين ف الدنيا ... يلا بقا يانادين خدي اختك وانزلوا اشتروا هدوم وكل الحاجات اللي وعد هتحتاجها ..
نادين : حاضر يا بابا .. يلا ياوعد حضري نفسك
وعد : مالهوش لزوم التكلفة دي
سالم : تكلفة ايه بس ياوعد اللي بتتكلمي فيها .. انا كل فلوسي تحت امركم .. واه انا هجيب واحدة ترعي عائشة وقت مانتي متكونيش موجودة
وعد : لا انا هرعها بنفسي .. انا مطمنش ع بنتي وهي مع حد
نادين : مش هينفع ياوعد هتحتاجي واحدة معاكي اكيد انتي مش علطول هتكوني مع عائشة .. واطمني بابا هيجيب واحدة احنا واثقين فيها .. ويلا بقا جهزي نفسك علشان متحمسة ننزل نعمل شوبينج مع بعض
وعد ابتسمت : ماشي ياستي علشان خاطرك
____________________________
*ف فيلا كمال الهلالي*
سلامة : الشغالة اللي بعتها كمال بيه جت وواقفة برا ادخلها ياهانم
نهلة : اه دخلها
... : ازيك ياست هانم
نهلة : انتي اللي كمال بعتك .. شكلك صغيرة .. انتي اسمك ايه
كريمة :خدمتك كريمة ياهانم
نهلة : كنتي بتشتغلي ف حتة قبل كدا
كريمة : ايوة ياست هانم كنت شغالة ف مكان وسيبتوا
نهلة : وسبتيه ليه
كريمة : صاحب البيت كانت عينه زايغة ومرتحتش ف الشغل هناك
نهلة : طيب اطمني هنا مش هتقابلك المشكلة دي .. انا مش عاوزكي هنا خدامة وبس .. انا عاوزكي عيني اللي بشوف بيها .. كل حاجة تشوفيها تقوليلي عليها .. انتي فاهمة
كريمة : حاضر ياهانم .. تؤمريني بحاجة تانية
نهلة : لا روحي شوفي شغلك .. سلامة هيوصلك
______________________________________
نادين : خدي دا ودا ودا وادخلي قسيهم يلا واطلعي وريني
وعد : ليه كل دا
نادين : كل دا ايه يابنتي دا لسه احنا يومنا طويل خشي قيسي ومتتعبنيش .. يلا .. استني كدا الفستان دا هيبقا تحفة عليكي ادخلي قيسيه كمان
وعد : لا دا مفتوح اوي
نادين : تصدقي عندك حق نبقا نجبلوا كارينا
وعد : ممكن ليه لا
نادين : انتي صدقتي ولا ايه انا بتريق .. خشي قسيه بقا
وعد : ماشي براحة .. دخلت قسيته وطالعة قالبة وشها
نادين : تحفة تحفة بجد
وعد : فين دا يابنتي لا مش هعرف اللبسوا وهو كدا بجد
نادين : ياحبيبتي الفستان حلو وشيك جدا .. انتي لازم تاخدي ع اللبس دا هتحتاجيه ف الحفلات وكدا
وعد : ماشي هحاول
نادين : طيب ادخلي غييري عبال مااحاسب .. وعاوزين نروح نقعد ف مكان وتحكيلي بقا قصتك .. عندي فضول اعرف كل حاجة
وعد : ولا وان مبحبش افتكر الحاجات اللي حصلت معايا بس ماشي هحكيلك
______________________________
اسبوع عدا .. سالم وظف عمر ف مكان كويس وبمرتب حلو .. ونادين ووعد اندمجوا مع بعض جدا .. وسيف ونهلة ف مشاكل لانها لسه مصممة علي جوازه من نادين اللي هو اصلا مش ف بالها ..
__________________________
*ف اسكندرية*
فاطمة : يعني خلاص ياعمر قررت هنعيش هناك
عمر : ايوة ياماما انا مصدقت فرصة الشغل دي مش عاوز اضيعها
فاطمة : والله وعد دي بنت اصول وكتر خيرها ع اللي عملتوا . .. بس مش فاهمة ايه حكاية ابوها دي
عمر : مالناش دعوة ياماما .. المهم ان بقا ليها عيلة بدل ماتعيش لوحدها
فاطمة : عندك حق ياعمر والله .. المهم انت هتعمل ايه مع فرح
عمر : هتقدملها ان شاءالله
________________________________
فرح نازلة تجري ع السلم ومبسوطة
سيف : مالك يامجنونة
فرح : باركولي باركولي .. عمر هيجي يتقدملي .. ومش بس كدا دا نقلوا من اسكندرية وهيعيشوا ف القاهرة هنا
نهلة : اييه
كمال : الف مبروك ياحبيبتي .. اهي دي الأخبار ولا بلاش
سيف : مبروك يافروحة .. كبرتي وهتبقي عروسة
فرح : الله يبارك فيكم يارب .. انا هطلع اشوف هلبس ايه بقا
نهلة : مبروك ع ايه ياكمال .. انت موافقها ع الجنان الي هي عاوزه دا
كمال : ايوة يانهلة انا وعدتها انه لما يتقدم هوافق .. انا مش عاوز حاجة غير سعادة بنتي وكفاية اللي انتي عملتي
نهلة : اللي انا عملتوا هو الصح وف مصلحتها .. الولد دا لا يمكن يتجوزها
كمال : هيتجوزها يانهلة غصب عن عين اي حد
نهلة : انت قصدك غصب عني
كمال : بالظبط دا اللي اقصده وكفاية بقا تحرمي عيالك من سعادتهم .. ومشي وسابها
_______________________________
نادين : انتي هتفضلي متخرجيش كدا يابنتي ..
وعد : اخرج اروح فين يعني .. وبعدين معرفش حد هنا
نادين : تصدقي جتلي فكرة .. بس يارب بابا يوافق عليها
وعد : فكرة ايه
نادين : بما انك متعرفيش حد وبردك محدش يعرفك .. انا بقول اننا نعمل حفلة كبيرة ليكي تتعرفي فيها ع الناس
وعد : لا انا ماليش ف الحفلات والكلام دا
نادين : اسمعيني بس والله هتبقا حاجة حلوة جدا وانتي لازم الناس تعرف انك بنت سالم ابو النجا .. بصي انا هقول لبابا ..
وعد :استني يامجنونة انتي انا لسه موافقتش
نادين : لا ماحنا مش هناخد موافقتك اصلا ... يابابا .. ياااباباااا
سالم : ايه صوتكم عالي ليه .. مالكم
نادين : كنت عاوزة اقولك ...
وعد حطت ايدها ع بق نادين : لا يابابا متشغلش بالك دي نادين بيجلها صرع قبل ماتنام متقلقش انا ههديها روح كمل نوم انت
نادين : لا يابابا انا مبيجليش صرع ولا حاجة .. انا كنت عاوزة اقولك اننا نعمل حفلة بمناسبة رجوع وعد ونعرف الناس ع وعد وكدا ايه رايك
سالم : والله فكرة حلوة مجتش ف بالي .. احنا لازم نعرف وعد ع الناس .. خلاص انا موافق
وعد : مالهاش لازمة والله
سالم : لا يابنتي ازاي لازم الناس تعرفك ... نادين انتي عليكي تجهزيات وانا هعزم كل الناس اللي نعرفها
نادين : حاضر يابابا ... بكرا حلو اوي
وعد : انتو مستعجلين ليه كدا
نادين : يابنتي حلاوتها ف شهقتها
وعد : حماوتها .. حماوتها مش عارفة تقولي المثل تسكتي
نادين : اي حاجة المهم الحفلة هتكون بكرا .. انا هصحا بدري اجهز كل حاجة .. واصحا ليه انا مش هنام انا هسهر ارتب كل حاجة .. روحي انتي نامي ومتقلقيش بكرا هيكون يوم جميل اوي وهتفرحيي
وعد : ماشي لما نشوف .. تصبحي ع خير
نادين : وانتي من اهله
__________________________
*تاني يوم*
وعد صحيت من النوم لقيت فستان متعلق لونه موف منفوش وشكله شيك وحلو اوي .. ابتسمت .. سالم دخل
سالم : عجبك
وعد : حلو اوي .. انت اللي جبتوا
سالم : اه .. دا الفستان اللي هتلبسيه ف الحفلة .. عاوزك تبقي سندريلا انهاردة
وعد بضحك: مش للدرجة يعني
سالم : انتي احلي من سندريلا ياوعد
وعد ابتسمت
سالم : للدرجادي كنت غبي لما ضيعتك مني كل السنين دي .. واتحرمت من الابتسامة الحلوة دي .. ياتري سامحتيني ولا لسه ياوعد
وعد حضنته : سامحتك يابابا
سالم دمع : ياحبيبتي يابنتي
نادين : الله الله بقا انا طالع عيني ف الترتيبات وانتو هنا بتوزعوا حنان من غيري
سالم : تعالي ف حضني انتي كمان
نادين حضنته : ياحبيبي يابابا .. يلا كفاية احضان بقا وقولي انت عزمت الناس ولا لسه
سالم : عزمت كله خلاص ..
نادين : حلو وانا خلصت كل الترتيبات .. وكلمت ميك اب ارتيست هتيجي ل وعد كمان ساعة
وعد : يااه انا نمت كتير ولا ايه انتو لحقتوا تجهزوا كل دا
نادين : اه مانتي تنامي وانا اسهر
وعد : ياحبيبتي ربنا مايحرمني منك
نادين : يلا اللبسي الفستان القمر دا بقا .. وانا هروح اجهز .. وانت يابابا اجهز علشان تستقبل الناس
________________________________
*في فيلا كمال*
نهلة : كمال انت جاي بدري يعني
كمال : اه عندنا حفلة ياستي جهزوا نفسكم
فرح : حفلة ايه دي يابابا
كمال : سالم ابو النجا عامل حفلة بمناسبة رجوع بنته
نهلة : رجوع بنته ايه انا مش فاهمة حاجة
فرح : هو اونكل سالم عنده بنات غير نادين
كمال : هو انا اعرف حوار قديم اوي انه كان متجوز واحدة قبل كدا وكانت حامل بس هو طلقها .. بس مكنتش اتوقع ان يجي يوم ويرجع بنته .. واهي رجعت وعملها كمان حفلة
{ سيف سمع الكلام افتكر وعد وانه عمل فيها نفس الي سالم عملوا .. وبيقول ف باله يعني انا ممكن مشوفش بنتي كل الفترة دي }
نهلة : اممم .. بس حلوة الفكرة دي اهو نتعرف عليها يمكن تطلع حلوة وتعجب استاذ سيف .. بدل ماهو مش عاوز نادين
سيف بعصبية : ممكن تسبيني ف حاااالي بقا ..
كمال : ف ايه ياسيف بتكلم مامتك ليه كدا
سيف : قولتلها مليون مرة انا مش عاوز اتجوز .. ومش هتجوز بطريقتها دي تماام ارتاحي بقا ... وطلع ع اوضته.. وفرح طلعت ورا
نهلة : عجبك قلة ادبه دي
كمال : خلاص يانهلة سبيه هو يختار .. يعني اخته تختار وهو نجوزه غصب عنه
نهلة : ومين قالك اني موافقة ع اخته اصلا
كمال : وانتي توافقي ليه هو انتي اللي هتتجوزي ولا بنتك
نهلة : لااا انا هتشل منكم بجد ..
كمال : طب استني لما نروح الحفلة الاول متتشليش دلوقتي
_______________________
*ف اوضة سيف*
فرح : مالك ياسيف .. متعصب ليه
سيف : قولتلها تسبني ف حالي .. حطاني ف دماغها
فرح : اهدا طيب تقول اللي تقوله .. انت اعمل اللي انت عاوزه وخلاص
سيف : لا يافرح مش هسيبها تقول اللي تقولو .. انا مبقتش قادر استحمل طريقتها
فرح : في ايه ياسيف الموضوع مش موضوع ماما .. انت مالك انا اول مرة اشوفك كدا
سيف : انا مش مبسوط يافرح .. انا كنت تاييه ومش عارف انا عاوز ايه .. انا دلوقتي عرفت ايه االي انا عاوزة وايه اللي هيخليني مبسوط
فرح : ايه !
سيف : انا عاوز ارجع لوعد وعاوز بنتي
فرح : يا سلام وانت لما تعوز تسيبها تسيبها بسهولة كدا وترجع تقول عاوزهم !
سيف : كان غصب عني ..
فرح : مافيش حاجة كانت غصب عنك انت مسئول عن تصرفاتك ياسيف
سيف : ماشي انا معترف بغلطي ومستعد اعمل كل اللي هي عاوزة بس ترجعلي .. ساعديني يافرح
فرح : طب بص بكرا ان شاءالله نسافر اسكندرية نشوفها ونشوف هترضا تسامحك وترجعلك ولالا .. بس دلوقتي قوم اللبس علشان نروح الحفلة دي
سيف : مش عاوز اروح ف حتة
فرح : لا ياسيف عيب ممكن اونكل سالم يزعل .. نروح بس الحفلة وبكرا يحلها ربنا ف موضوع وعد
سيف : ماشي يافرح
___________________________
وعد ف اوضتها لبست وخلصت وقعدة .. نادين دخلت
نادين : الله حلوة اوي .. الفستان تحفة .. شبه الاميرات بجد
وعد : انا خايفة اوي انا اول مرة اللبس فستان زي دا وحاسة اني وانا نازلة هقع ع وشي قدام الناس .. الفستان تقيل اوي
نادين : لا ان شاءالله ميحصلكيش حاجة ..
وعد : هما الناس جت ولالا
نادين : اه ف ناس كتير جت تحت
وعد : ربنا يستر
___________________________
سالم : اهلا كمال بيه .. ازيك يامدام نهلة اتفضلوا منورين
نهلة : دا نورك والله يا سالم بيه .. اومال فين نادين وصاحبة الحفلة .. متشوقة جدا اشوفها
سالم : اتفضلوا استريحوا وانا هطلع اجيبها واجي .. اتفضلوا .. وطلع يجيب وعد
{سيف سرحان وبيفكر ف وعد وخايف متسامحهوش ولا ترجع معاه .. وفرح بتتصل بعمر تشوفوا اتاخر ليه}
سالم : وعد ياحبيبتي يلا الناس مستنياكي تحت
وعد : بابا انا خايفة اوي
سالم : انا جنبك متخافيش اي حد هيسأل سؤال انا هرد عليه متقلقيش محدش هيقدر يضايقك
نادين : يلا بقا يابنتي
وعد : حاضر .. يسر خليبالك من عائشة ها ..
يسر : عائشة ف عنيا ياهانم اطمني
ووعد مسكت ايد سالم ونازلوا .. سلموا ع الناس ..
سالم : تعالي بقا ياوعد اعرفك .. ع صديق عمري .. هتحبيه جدا هو وولاده .. وخدها عند كمال .. اعرفكوا وعد بنتي
نهلة وفرح وكمال اتخضوا وواقفوا وسيف ووعد فضلوا باصيين لبعض لمدة دقيقة
سالم : في حاجة انتو تعرفوا بعض
وعد : لا .. بابا عن اذنك انا هطلع اشوف نادين .. وطلعت .. وسالم اتحرج ومش فاهم ايه الي حصل واعتذرلهم ومشي
نهلة : مش ممكن ازايي .. وعد تبقا بنت سالم
سيف اتضايق ومشي وفرح مشيت وراه ..
___________________________
نادين : انتي طلعتي ليه انتي لحقتي تتعرفي ع الناس
*وعد بتعيط*
نادين : مالك ياوعد بتعيطي ليه حد ضايقك !!
وعد : شوفته
نادين : هو مين دا
وعد : سيف
نادين : سيف مين .. ابن كمال الهلالي .. ماله
وعد : سيف يبقا طليقي يا نادين
نادين : ايييه ... اللي عمل فيكي كل دا يبقا سيف .. دا لو بابا عرف هيخرب الدنيا عليهم
وعد : لا يا نادين متقوليش لبابا .. مش عاوزة مشاكل .. انا خلاص بعدت عنه
نادين : يعني عاوزني مقولش لبابا ان سيف ابن كمال الهلالي .. هو دا اللي كنتي متجوزه
سالم : انتو بتقولو ايه !!!
____________________________
في فيلا كمال .. رجعوا من الحفلة كلهم منهم اللي مستغرب ومنهم اللي متفجأ ومنهم اللي حاسس ان كل حاجة خططلها انتهت .. كلهم طالعين ع الاوضة
كمال : استنو عندكم
نهلة : في ايه ياكمال
كمال : انا عاوز افهم ايه اللي حصل .. وشكم قلب لما شوفتوا وعد ليه
نهلة بتوتر : في ايه ياكمال .. احنا بس اتفجأنا وبعدين مانت كمان استغربت
كمال : اه استغربت بس وشي مقلبش ولا مشيت وسيبت الحفلة
نهلة : انت تقصد مين
كمال : هو عارف نفسه كويس .. انا مش اهبل
فرح : طب بابا ممكن نتكلم بعدين
كمال بعصبية : مافيش بعديين .. دلوقتي لازم افهم ..
سيف : عاوز تفهم ايه
كمال : عاوز افهم وشك قلب ليه لما شوفتها ومشيت وسيبت الحفلة
سيف : عاوز تفهم حاضر هفهمك
نهلة : اطلع ع اوضتك ياسيف
كمال : اسكتي انتي مسمعش صوتك .. انطق فاهمني
سيف : جه الوقت اللي يعرف فيه مش هنفضل مخبيين ...
انا اتجوزت وعد .. وطلقتها وهي حامل
كمال : ايييه !!!
